2 SAMUEL 14 - Kathara Bible (BSI)

Absalom Ungkhavai Khangarān

¹ Chitharan awungana Absalomli leishiunghaira kaji Zeruiahwui naomayara Joabna theihaowa.

² Kala Joabna thangkhamei preinao akha Tekoawui eina vāphakhui ngasakta hānga, “Chapkhangachā mi akha sākhaninglu, kala chiwui kachon ngavailu, thaola maneolu, kha atam kasāngkha kathiwui vang chapngachā kahai preiva̱̱ thāda sākhaninglu;

³ kala awungali hithāda ahānglu.” da Joabna preiva̱ chili tui saikora hāngchithei.

⁴ Tekoawui preiva̱ china awungawui ngalemli vāda ngaleili kui mashunzangda khayāshilak eina akhoruma, kala hithāda hānga, “O awunga, khangachonmilu.”

⁵ Chieina awungana “Nawui kasak khi leihaokhala?” da ngahānkai. “Iyavo, I ra̱meinaona,” da preiva̱ china ngahānkai, “Igahara thihaira.

⁶ Narao iwui nao mayarnao khani leisai, kala ani luili ngama̱haowa; chili anili rāmi khavai khipākha maleithuda akhana akhapali sāthathaowa.

⁷ Chiwui vang shimkhurwui mi saikorana narao ili mamayāmada, makathe nao chila, achināli sākathatwui vang athumna ali sāthatra da hānghaowa; chithākha athumna shimluikatla shimān ngasakhaora. Chithāda athumna akhamāng khalei chila shimān ngasakhaiakha igaharawui mingla kala awui atheila okathuili maleiluimara.”

⁸ Chieina awungana preiva̱̱ chili hānga, “Ungulu, nawui tuishot hili ina khak tāminaora.”

⁹ Tekoawui preiva̱ china hānga, “Khangui chi iwuitungli kala ishāvāwui shimkhurwuitungli tāranu, ishāmei, awungali kala wungpamkhongli maphenaranu.”

¹⁰ Awungana hānga, “Kachikathāna nali hangphāphaakha chipā chi ili khuirālu; ana nali masāza̱rarluimara.”

¹¹ Preiva̱ china hānga, “Athut khuiki kajibingna ashee matāngasakranu, kala inaomayarali masāthatranu, awungana nawui Proho Vareli kapomilu da kapona.” Ana hānga, “Prohowui ming singda kahāngna, nanao mayarawui kuisam akha eina tangda machatmara.”

¹² Chieina preiva̱ china, “Ishamei awunga, tui akhamāng kahāng khavai pohaoga.” Awungana, “Hānglu” da hānga.

¹³ Preiva̱ china hānga, “Chithakha, kathāda nana Varewui mibingli mamayāla hikathā ot ngarānkhala? Kaja tuitak hi milaga awungana awui kasham kahai akhali shimli mahounglui kaji hiya, nakhalatta yonkhangasakna.

¹⁴ Ithum thiserra, ngalei kathengli tara̱ heitā kahai makhuilui kapai kathāna; kha raithā kahai nao chi ahokhui khavai apong kaphā mi chiwui manglā Varena makhuithuimara.

¹⁵ Ara hi ishāmei awungali hāngkhavai kharāna, khikhalajila mibingna ili ngachee ngasakhaira; kala narao sha̱naona phaninga kaja, ‘Ina awungali pora, awungana awui raowui kapo chi sāmishapra.

¹⁶ Kaja awungana khuisangmida, ilila kala Varena khami inaolila shimān ngasākki kajiwui eina kanmirada shitsanga.’

¹⁷ Kala narao ina Ishamei awungawui tui eina ili chingrihai ngasakmira da phaninga; kaja ishāmei awunga nava mashun-makhui kathei Varewui kazingrao kathāna. Nawui Proho Varena nali ngasomiranu!”

¹⁸ Chieina awungana preiva̱ chili hānga, “Ina khangahān mathumlakla ngahānkālu.” Kala preiva̱ china, “Ishamei awungana ngahānmilu” da hānga.

¹⁹ Awungana hānga, “Hiwui pongli Joabwui khangarān zangla?” preiva̱ china ngahānkāda hānga, “Ishamei awungana theisera, kaja ishāmei awungana hāngkahai chili khipānakha uishong yāshong machonmakānrarmana. Tui saikora hi narao Joabna ili tamchitheida hāngkhangasakna.

²⁰ Ots hi mashungkhui khavai narao Joabna khangarānsera. Kha okathuili khalei ot saikora, ishāmeina Varewui kazingrao thāda theithangmeiser kajina.”

²¹ Chieina awungana Joabli hānga, “Yanglu, ina mayā kahaina, vālu, yarona Absalomli ahokhuilu.”

²² Kala Joabna ngaleili kui mashunzangda khoruma, kala awungali ningshida hānga, “Aja awungana iwui kapo khuisangmi kahaiwui vang ishameiwui mikyanli ili ngahānkhangai chitheihaira.”

²³ Chieina Joabna ngakarthuida Geshurli vai, kala Absalomli ahokhuida Jerusalemli thānunga.

²⁴ Kala awungana, “Awui shimli ngateida pamngasaklu, iwui ngalemli marāngasakalu” da hānghaowa. Chieina Absalomna awui shimli ngateida pamda awungawui ngalemli mavālakmana.

²⁵ Chitharan Israelwui ngachaili Absalom kathā mayar khamathā maleilakmana; aphei eina thuilaga akui kāshungda khangakhai akhala makāmana.

²⁶ Kala awui kuisam chichāpthang (sam sānghaiakha, kum apeilam chichāchāp jiya) khān onyangakha, awungawui shekel shākhaniwui kharit eina ngaraichai.

²⁷ Absalomwui naomayara kathum, sha̱nao akha da leisai. Naongalāva̱ chiwui aming Tamar hoi; ngalā mathāshuna.

²⁸ Chithāda Absalomna awungawui ngalemli mavālakla Jerusalemli kum khani peida pama.

²⁹ Chieina awungali ahāng ngasak khavai Absalomna Joabli hoi; kha Joabna marāthuwa. Kakhane ana aho ngasaklui, kha Joab marāluithuwa.

³⁰ Chieina awui raobingli hānga, “Yanglu, iwui luiwui thili Joabwui napai lui lei; mei asa̱tāmihaolu.” Chieina Absalomwui raobingna asa̱tāmihaowa.

³¹ Chieina Joabna Absalomwui shimli vāda ahānga, “Kachiwui vang eina nawui raobingna iwui lui sa̱tāmihaokhala?”

³² Absalomna Joabli ngahānkai, “Yanglu, ina nali pao chihorai, hili rālu, kaja awungali angahān khavai nali chihovāda, ‘Khiwui vang ina Geshurwui eina hili ungkhala? Chili pamching kajina iwui vang phākhameina.’ ” Kala Absalomna hāngluiya, “Chiwui vang ara ili awungawui ngalemli vāngasaklu; kala iwuili khayon leiakha ili ana sāthathaoranu.”

³³ Chieina Joabna awungali hānga, kala awungana ali horai. Chiwui vang awungawui ngalemli Absalomna zangda kui ngaleili mashunzang khayākashi mi, kala awungana Absalomli maya̱khui.