2 SAMUEL 11 - Kathara Bible (BSI)

David kala Bathsheba

¹ Kum chiwui mayo atamli awungabing rai vangarar khavai khavā tharan, Davidna awui raobing kala Israel saikora Joabli ngasoda chihovai; athumna Ammonnaobingli angararda athut akhui kala Rabbahli kuinamhaowa. Kha Davidva mavāla Jerusalemli pamsai.

² Thangngashunkha Davidna ngasāmkakhuiwui eina ngakarthuida awunga dolantungli yaothuikakā tharan, sha̱nao akha ra̱vaikasā thei; kala sha̱nao chi azak mathāshuna.

³ Davidna mi chihoda sha̱naopava̱ chiwui pongli vāngathing ngasaka. Kala mi akhana hānga, “Chi Eliamwui naongalāva̱, Bathsheba kahova̱, Hitpa Uriahwui preiva̱ maningmala?”

⁴ Chieina Davidna paome chihovāda ahokhui ngasaka; kala preiva̱ chi kharā eina ani ngasopi. (Sha̱naopava̱ chi khamakhaowui eina tharkakhui atam sāsai). Chiwui thili ana ashi shim hanunghaowa.

⁵ Kala sha̱nao chi nao vaihaowa; kala Davidli, “I nao vaihaira” da pao chihoda vāhānga.

⁶ Chieina Davidna Joabli, “Hitpa Uriahli chihounglu” da pao chihovai. Chieina Joabna Uriahli shiunhaowa.

⁷ Uriah khaung eina Davidna, Joab kathāda leili, mibingla kathāmameili, rai khangarar kathāhaira, da ngahāna.

⁸ Chiwui thili Davidna, “Na shimli ungda phei pheolaga ungngasāmkhuilu” da hānga, kala Uriahna awungawui shim eina thuihaowa, kala awui thili awungawui eina lemmet chihovai.

⁹ Kha Uriahna awui shimli maungla, awungawui raobingli ngasoda khāmongpheili pihaowa.

¹⁰ Kala athumna Davidli “Uriah shimli maungmana” da kahāng eina Davidna, “Na kha̱ram eina khaung maningmala? Khisāda na shimli makhaungkhala?”

¹¹ Uriahna Davidli ngahānkai, “Ningkhami oko kala Israel eina Judahna rāmli pamsera; kala ishāmei Joabla, raobingla khamasaili rairum sāda lei; chithākha ina kathāda phāshak phazāda preiva̱li ngasopirakhala? Nana thei kala namanglāna theira, ina hikathā ot masālakmara.”

¹² Chieina Davidna Uriahli hānga, “Ajala pamsanghaolu, laga akhama nali zatngasaknaora.” Chieina Uriahna chithangla akhama kathāla Jerusalemli pamsanga.

¹³ Kala Davidna phakazā hoda awuili aphazā ngaruma, kala marip ngasakhaowa. Kha ngayāshong shimli maungla awungawui raobingli ngasoda piya.

¹⁴ Ngathorshong Davidna Joabli chithi akha kapilaga Uriahwui pāngli sangmi.

¹⁵ Kala chithili hithāda kapisanga, “Uriahli sakmeikap kaja rai mangāli thānngasaklu, kala yāmhailaga ali sāthat ngasakhaolu.”

¹⁶ Kala Joabna keinung kuinam kahai chili ali zangngasaka, ana rai khamarākabingwui apam theihaoda chili chihovai.

¹⁷ Kala keinung chiwui mibingna Joablongli shokngarara; Davidwui mibing kaikha thihaowa. Hitpa Uriahla thihaowa.

¹⁸ Chiwui thili Joabna Davidli raiwui pao hāngchiphunda,

¹⁹ kala ana paomeli hithāda hānga, “Raiwui pao awungali hāngser kahaiwui thili,

²⁰ awungana malungvātta, kala nali hithāda hāngda, ‘Khisāda keinungli chiyākha nganaida vāngararkhala? Athumna phākhowui eina kaprāra kaji matheimala?

²¹ Khipāna Jerubbeshethwui naomayara Abimelechli sāthat? Sha̱nao akhana phākho tungwui eina chakrikui ali horrorda ali Thebezli tākthat kahai maningmala? Khisāda chiyākha nganaida phākholi vākhala?’ jiakha, nana hithāda hāngra, ‘Nawui rao Uriahla thihaira’ ” jilu.

²² Chieina Joabna kahāng tākam eina paomena Davidli unghānga.

²³ Paomena Davidli hānga, “Athumna singyuihaida ithumli tampākli kharomrai, kha ithumna kharomungluishitta ngavei ungshunga.

²⁴ Chieina athumna phākhowui eina naraobingli malā kaprāda awungawui raimi thihaowa; kala narao Hitpa Uriahla thihaira.”

²⁵ Davidna paomeli hānga, “Joabli ahānglu, ‘Chiwui vang wukmakhanangalu’ jilu; kaja, rilala naolala raili kathi khangachāna; keinung chili pangmeida ngararlu, kala yuikhui khavai sālu, kala ali katomlu.”

²⁶ Agahara Uriah thihaira kaji kashā eina apreiva̱na awui vang chapngachai.

²⁷ Kala chapkhangachā atam chi peikahaiwui thili Davidna chihovāda awui shimli hounga, kala ani ngakumda naomayara akha pharākhui. Kha Davidna kasā otsak china Proholi maringphāngasakthuwa.