2 PETER 1 - Kathara Bible (BSI)

Shālam Tui

¹ Varewui khamashung khangarongli kala Jishu Khristawui lungli ithum shitkasang samphang kahaibingli ngaraichā eina Jishu Khristawui rao kala paokazata Simon Peterna kagapina.

² Vare kala ithumwui Proho Jishuli kathei mangā eina lukhamashan kala chingri kahai nathumli pemtinghairanu.

Varena Kaho kala Kapangkakhui

³ Ithumli awui phākhamataia tekhamatei samphangrum khavai kahoa chili katheiwui vang Varewui tharkhamatheng pangshap china ithumwui mirin kala dharmarinli ringkhavai darkar kasā saikora ithumli mihaira.

⁴ Hithada sāda okathuili leida khalei sāshimānkapai khamathangwui eina yāmshokpai khavai kala Varewui tharkhamatheng khangachā chili ngashitmi kahai kasaka lemmet chi mihaira.

⁵ Hiwui vang eina nathumwui shitkasangli khamathā, khamathāli awor,

⁶ aworli khalatta khangarin, khalatta khangarinli, ningzinghākharing, ningzinghākharingli dharma kaphaning,

⁷ dharma kaphaningli chinao ngarāwui khamashit kala chinaongarāwui khamashitli khalem leishāt ngarumsanglu.

⁸ Magunbing hi nathumwui ngasā ngasakta mataisang ngasakakha, ithumwui Proho Jishu Khristali theishingkakhuiwui khamashung chi makankhanā kala athei makhamathei mangasālakmara.

⁹ Hikathā makhaleia mi chiva khangapeowa ningkasha̱ana, kala ana sākahai morei pheomihaira kaji malaikahaina.

¹⁰ Chiwui vang eina ivānaobing, nathumli hokakhui kala kapangkakhui chi shengmeida theikhui khavai sakmeida phaninglu. Chithākha nathum mangaphoklakmara,

¹¹ kala ithumwui Proho kala Huikhame Jishu Khristawui katang makhavai Varewui wungramli zangpai khavai apong tārakha eina ithumli ngarānmira.

¹² Chiwui vang eina nathumna theihaisālala kala khamashung chili pheisin sākhuitithaisālala tui hi atam kachida ina phaningung ngasakngaichinga.

¹³ I ringlakha eina tangda nathum mathuk khavai phaningung khangasak hi mashunga da phaninga,

¹⁴ Kaja ithumwui Proho Jishu Khristana chitheikhami athishurda I ara masāngluila okathuiwui eina kānthuihaora.

¹⁵ Thikahaiwui thili nathum saikorana hi phaningungching khavai apong chi ina kashap eina tangda khangarān sāmira.

Khristawui Tekkhamatei Shākhibing

¹⁶ Ithumwui Proho Jishu Khristawui pangshap kala ana rāki kajiwui pongli ithumna kahāng chi ningkap eina semkakhui khararchān maningmana; kha ithumwui mik eina awui khangam-kharei chi theikahaina.

¹⁷ Avāva̱ Varewui eina tekhamatei khayākakā samphangda tekhamatei Awungawui eina, “Hi iwui khaluma Naomayarana, ina ali ningyāng unglaka” da kazingramwui eina

¹⁸ vaokatā akhon chi ithumna shai, kaja kathara kaphungli ithum ngasopamsai.

¹⁹ Khamarān tui chi ithumna mathāmeida theikhui. Tui chili nathumna ningsangmeida nganākhuiakha phāmeikharra, khiwui vangkhala kaja hiya kazing mathangranglakha kala nathumwui ningli zingthanwo mashokranglakha, tangkhamang pamli thaomei kashar kathāna.

²⁰ Mataimeikapta, nathumna hi theiphalungra kaja Kathara tuili phongmi kahai tui chi kachikathā marān akhana aningsasak eina khalatkhui kaji maningmana.

²¹ Kaja khamarān hi miwui ning eina haokaphok maningmana, kha Manglā Katharana kasatmilaga Varewui eina kharā tui chi mikumona khamatuina.