2 CORINTHNAO 9 - Kathara Bible (BSI)

Vareshinaobingli Khangachon

¹ Shitkasangbingli ngachonkhamiwui pongli ina nathumli hāngkhavai khikha maleimana.

² Nathumna sāmingairareo kahai chi ina theida Macedonianaobingli, “Achaianaobingna ngachonmi khavai achākum eina thuida ngarān kahaina” da ina mashonsei eina hānghaira.

³ Nathumwui vang ithumna lāngso kahai chi arema masā khavai ivānaongarāli rida chihokharāna. Chieina nathumna khangarān sāhaisālu.

⁴ Kha, kalikha Macedonianaobingna ili ngasoda chihānlak eina rālaga nathumna mangarānnhaisākha, nathumwui vaikashili hailaklaga ithumla khayaknāhaora.

⁵ Chiwui vang nathumna ngashit kahai athishurda khangarān sākhavai ivānaobingli rida rāngasakkhangaina. Chieina tandi maningla mingaireo khamina kaji chi I kharā tharan theikhuira.

⁶ Hithada hāngkahai lei: Ngarakri eina khayao china ngarakri eina hātkhuira, taimayāsā khayaowa china taimayāsā hātkhuira.

⁷ Kachichāwui kaphaning athishurda miki kajina, tandiwui ot maleimana, kaja mingairareo khame chili Varena leishi.

⁸ Nathumna darkar kasā chili lāngmeikhārda Varena awui lukhamashan mishapa. Chieina nathumwui mirinli kala kaphā ot kasāli khavāt maleimara.

⁹ Hithada kapihaida lei: “Ana kachāmabingli thada mi; awui khamashung khangarong katang mavaimana.”

¹⁰ Khayaoali yaokhavai athā kala zākhavai zāt khame Varena nathumwui khalei chungsang ngasakra kala khamashung khangarongwui heithei mataisang ngasakra.

¹¹ Sailāmlak eina mishap khavaiwui vang Varena nathumli shāngsang ngasakra. Chieina nathumna khami chi ithumwui eina samkaphanga mi kachungkhana Vareli masochikatra.

¹² Hikathā otram khangatha̱ hiya Varewui miyurbingwui darkar kasāli ngachonkhamimāng maningla kha Vareli ningkashi mataisang ngasaka.

¹³ Nathumwui hikathā otram khangatha̱ hi theilaga nathumna mayāda Khristawui paokaphāli shitsangtit kaji kala mi saikorali sailāmlak eina khamiwui vang mi kachungkhana Vareli sochikata tekmatei ngasaka.

¹⁴ Varena nathumli hakkhamahā lukhamashan khami chiwui vang athumna nathumwui vang ningyāng tongchaoda seihā sāmira.

¹⁵ Khamor eina mahāngkhararra awui lemmetwui vang Vareli ningshisa!