2 CORINTHNAO 8 - Kathara Bible (BSI)

Saikhalam

¹ Ivānaobing, Macedoniawui churchbingli Varewui lukhamashan chitheimi kahai chi nathumlila theingasakngai.

² Athumli yangkhui khavai kakhanang kachungkha eina chāng yanga. Kha athumwui kachām hailaklaga mingrairareo khamili khamathān hāngkhavai maleimana.

³ Kaja kachichāwui khalei athishurda mi, kala mikashap chili lāngmeida mingairareo eina miya da ina hāngshapa.

⁴ Shitkasangabingli khangachon khamili zangngasakmilu da ithumli saklak eina poi.

⁵ Rimeikapta athumna Proholi mi kala Varewui kaphaning athishurda ithumlila mi, hi ithumna machihānsālakmana.

⁶ Chiwui athishurda Titusna ot chi sāphokhaokada chi ana kupmi khavai ithumna ali pohaira.

⁷ Shitkasanglila, tuimatuilila, aworlila, ngachonkhamilila kala ithumli leikashilila mataimeithui kaji thada saikhalamlila nathumna mataimeithui khavai sālu.

⁸ Sāphalunglu da kahāng maningmana; kha akhana akhali ngachonmingairareo kahai chieina nathumwui leikashi kachangkhat machutkhui khavaina.

⁹ Proho Jishu Khristawui lukhamashan nathumna thei; kaja ana shānglaklala nathumwui vang eina chāmhaowa; awui kachām chi eina nathum shāngkhavaina.

¹⁰ Kala hiwui pongli ina hāngkhangai hina, achakum sāphok kahai chi ara kupkahai phāmeira. Kasāmāng maningla sākhangai chi nathum kharena.

¹¹ Chieina mangasāmalu, kha kupkhavai sālu. Sāngairareo ngarankaphok thada kakup eina tangda ningsanglu, kala nathumwui khalalei chi khuishoklaga sālu.

¹² Kachichawui khalei chi mingairareo miakha Varenala khuisangmira; makhalei chi milu majimana.

¹³ Khangateibingli chihohailaga nathummāngli kharit chiphunphalungra kaji maningmana.

¹⁴ Kha aruihon nathumwui tarākha khalei athishurda khangazanbingli ngachonngayiya. Athumna tarākha khalei tharan nathumwui makhalei atamli ngachonmira. Chithada sāda khanini ngaraichai.

¹⁵ Kathara tuili kapi kahai thada, “Kachungkha kazipkakhui china chungkhana mavaimana; kateokha samkaphang china teokhana maleimana.”

Titus eina Awui Ngasotnaobing

¹⁶ Ithumna nathumwmui vang samingairareo kahai tākam eina Tituswui ningli kasatkhami khaleiwui vang Vareli ningshi.

¹⁷ Kaja ithumwui kachihān khuikasangmāng maningla a khalatta ngachonngairareo nathumwuili rārada kuphaira.

¹⁸ Ali ngasoda paokaphā hākashokli church saikorana khayākashe ivānao akha nathumli chihorāli.

¹⁹ Kala chimāng maningmana, kha ithumna Prohowui tekhamateiwui vang kala kaphā sākhangai chitheiki kaje lukhamashanwui ot kasā hili ithumli ngaso khavai ali churchna kapang kahaina.

²⁰ Mingairareo eina khami lemmet kasingwui pongli khipānakha maphen khavai ngasharlak eina sāda lei.

²¹ Prohowui miktāmāngli maningla mibingwui miktālila mashun eina sāshap khavai kasā hi ithumwui otna.

²² Chili lāngda atam kasāngkha chāng yangkahaiya ngachonmingailak kaja mina da theikhui kahaiya ivānao hili anili ngasoda chihorāli. Ana nathumli shitsangchaowa kala ngachonngailaka.

²³ Titusva ili ngalengda sakruma kala nathumwui ngachaili otram ngatha̱kharuma akhana. Ali ngasorāki kaje avānao khani chiya Khristali tekmatei khavai churchbingwui pao kaphungabingna.

²⁴ Athumli leikashi chitheilu, chieina ithumna nathumwui vang lāngkaso chi kachangkhata da church kachiva̱na theishingkhuira.