2 CORINTHNAO 5 - Kathara Bible (BSI)

¹ Ithumna thei kaja okathuili khalei ithumwui shim hi shimānhailala kazingramli mashimānla leichingki kaji miwui pāng eina makasā Varena ngarānkhami ithumwui pamkhavai shim akha lei.

² Hili ithumna ngahuipamda kazingramwui shimli vāpān khavai kahaochinga,

³ chili khamahong eina maokthuimara.

⁴ Ithumna kachonshim hili leilakha kachotkachāngwui vang ningreikhāsuthai: kaja ithumli mangavaimimara kaji maningmana, kha mataimeida ngavaimi khavaina. Chieina shimānkapai phasā hi kharing onhaora.

⁵ Ithumli hi ngarānkhame chiya Manglā mida ngashitmi kahaia Vare china.

⁶ Chiwui vang ithumna atam kachida pingkashapna; ithumna phasārinlungli leilakha Prohowui eina tāthuihaira kaji thei.

⁷ Kaja ithumna shitkasang eina ringa, kathei eina maringmana.

⁸ Phasārin horhaida Proholi okthuirum khavai ithumna mangacheelakmana.

⁹ Chieina phasārinli okthuilala lah chiwui eina kānthuihailala awui ningyāng ungkhavai kasā hi ithumwui otna.

¹⁰ Ithum saikora Khristawui bicharli kānganingserphalungra, kala mi kachiva̱ ringlakha ana sākahai chiwui athishurda kaphā nilala, kashinilala sāman samphangra.

Khristawui Mangā eina Vareli Khangashik

¹¹ Chiwui vang eina Proholi ngacheekhangayi theida ithumna kateibinglila suikhui khavai ngarāna. Ithumli Varena theisera, kala nathumnala ningli theisera da shitsanga.

¹² Nathum khalatta masochikatluishit khavai kahāng maningmana, kha ithumwui vang maiyālak eina alungliva khikha maninglaga ayarli langkasobingli nathumna ngahānkāshap khavai kachitheina.

¹³ Ithum kapā thada leiakha chi Varewui vāngna, lah ning mathingda leiakha chi nathumwui vāngna.

¹⁴ Khristawui leikashina ithumli kuinammi, khiwui vangkhala jilaga mi akhana katongawui vang thimihaira kaja kathili ithumla ngarumhaira.

¹⁵ Ana mi saikorawui vang thimi, hieina ringda khalei athumna athum khalattawui vang maringluila kha athumwui vang thimihailaga ringshok kahai awui vang ringranu.

¹⁶ Chiwui vang eina ithumna ara okathuiwui ningphanin eina mi khipālikha maphaningluimana. Atam akhali Khristali okathuiwui ningphanin eina phaningsai, kha ara chithada maphaningluimana.

¹⁷ Chiwui vang eina kachikathāna Khristali leiakha a kadhara pāngsemna; kachama chi kānthuihaira, yanglu; kadhara chi rāhaira.

¹⁸ Saikora hi Khristawui mangā eina ali ngashim khangasaka kala khangashimwui ot sākhavai ithumli otsin kachisina Varewui eina kharāsera;

¹⁹ chiya Varena Khristali zangda okathui hi ali ngashim ngasaka kala mikumowui khayonkhamāng mashānluila khangashim pao hi hāngkhavai ithumli horsangmihaira.

²⁰ Varena awui khangahot chi ithumwui manga eina sahaoda, ithum Khristawui mathunbingna. Khristawui mathun eina nathumli kapona, Vareli ngashimkhuilu.

²¹ Kaja morei makhalei ali ithumwui vang eina morei phungngasaka, chiwui vang eina awui lungli ithum Varewui khamashung-khangaronga ngasāpai.