2 CORINTHNAO 4 - Kathara Bible (BSI)

Phasāli Manglāwui Lan Khalei

¹ Chithada sāda Varewui lukhamashan eina otram khangatha̱ hi samphanghaoda ithumna ning suikatā maleimana.

² Khayākhamalā ngathumngateida kasā ot saikora horhaida ithumna mareimarā ot masāmana. Varewui tuila mashongachei khavai mahotnāmana, kha mashun chi phonglāk eina kachithei eina Varewui miktāli kachithei thada mi kachiva̱wui mashun-makhuili theikhuipai khavai ithum khalatta kachitheina.

³ Kaja ithumna hākashok paokaphā chi rānkham kahai leiakha, chi shimānhaokida khaleibingwui vangmāngmaya,

⁴ apuk-apaga hiwui makapha varenaona mashitkasangbingwui ning ngapeo ngasakhaoda, Varewui sakrin kakhuia Khristawui tekhamateiwui paokaphawui kahor chi mathei ngasakthuwa.

⁵ Ithumna hākashok hi ithumwui tui maningmana, kha Jishu Khrista hi Prohona kala Jishuwui vang ithum nathumwui raona da tamkachitheina.

⁶ “Tangkhamangwui eina kahor shokranu” da kahānga Vare china Khristawui maili Varewui tekhamateiwui kahor chi theikhui khavai ithumwui wuklungli hormihaira.

⁷ Tha-ilala manglārinwui lan hi khalei ithum hi ngaleiham kathāna, kaja juikhamataia pangshap chi Varewuina ithumwui maningmana da chithei khavaina.

⁸ Apong kachiva̱li ithumli khanang ngasaka, kha ning matheng ngasakmana; pa̱ngapā ngasaka, kha khāsut mahai ngasakmana.

⁹ Rekhareklala horkahai maleimana; hortāhailala mashimān ngasakmana.

¹⁰ Thangkachida shimānkapai ithumwui phasā hili Jishuwui kathi chi khuiphungchinga, chieina awui kharing chi ithumwui phasāli theipaira.

¹¹ Ithumwui shimānkapai phasā hi eina awui kharing chi theikhuipai khavai Jishuwui vang ithum thikapai ka̱lāshat samphangchinga.

¹² Chieina kathina ithumwuilungli kala kharingna nathumwuilungli ot sāda leili.

¹³ “Ina shitsanghaoda khamatuina” da kathara lairikli kapihai. Chiwui kaphaning tākam eina ithumnala shitsanghaoda khamatuina.

¹⁴ Kaja Khristali ringkhangasaka a china ithumlila, nathumlila Jishuli ngasoda ringngasakra kala awui mangāli vāngasakra.

¹⁵ Ot saikora hi nathumwui vāngna; kala lukhamashan hi mi chungmeidali vāshungda chungmeida masochikata Varewui tekhamateili ningshira.

Shitkasang eina Kharing

¹⁶ Chiwui vang eina ithumna ning masuitāmana. Ayarwui khangacha chi kashimān thālala alungshongwui khangacha chi thangkachida dharngasakchinga.

¹⁷ Aruihon kakhanang kateokha samkaphang hiliva katang makhavai tekhamatei chi samphang khavai ithum wui vang ngarānmida lei.

¹⁸ Kachiwui vangkhala kaja ithumna mik eina kathei ot chili mayangla makathei otli yanga. Kaja mik eina kathei otbing chiya kasha̱khawui vangna, kha makathei otbing chiya katang makhavaina.