2 CORINTHNAO 3 - Kathara Bible (BSI)

Kathara Tuingashitwui Ot Kasābing

¹ Ithum khalatta sotmasaolui kaji thāhaola? Maningakha kaikhana kasā thada mi khangateiwui eina khamayāwui chithi khuiphunglaga rālu jila? Maningakha nawui eina khamayā chithi khuiphunglaga zatlu kajilā?

² Nathum hiya mi kachiva̱na pākhuikapai kala theikhuikapai ithumwui ningli kapisang kahai chithi kathāna.

³ Lairik hi Khristana kapisanglaga ithumna kachiphuna kaji chitheilu. Hi lungphekli muk eina kapi kahai maningmana, kha kharinga Varewui Manglā eina miwui wuklungli kapi kahaina.

⁴ Khristawui mangā eina Vareli shitkasangwui vang tui hi kahāngna.

⁵ Ithumna ithum khalattawui eina khikhala sākashap maleimana, kha sākashap hi Varewui eina kharāna.

⁶ Kapi kahai ainwui maningla kha Manglāwui kadhara tuingashit chiwui vang otram ngatha̱ ngasak kashap pangshap chi ana mi. Ainna thingasaka kha Manglāna ringngasaka.

⁷ Ain chi lungphāli mayek eina ruksangkhami tharan Varewui tekhamatei chi chithei. Moseswui maili kahor chi shimānmamānhailala kahorwui kahān chi hānnāhaoda Israelnaobingna mayangrarmana. Kathi khuikharā ain chi hiyākha tekmateiakha

⁸ Manglāwui otsak chi kayākha hakmahāda tekmateimeirakhala?

⁹ Masāvaikapai arah khuikharā chi tekmateiakha, kahui khuirākhamiwui otsak chi kayākha tekmateimeirakhala?

¹⁰ Aruihonwui tekhamateina hormeikhārhaoda, mashimānki kaji khare kachāngwui tekhamatei chi shimānhaira.

¹¹ Shimānki kaji ot tekmateiakha makashimān ot chiya kayākha tekmateimeirakhala?

¹² Kachihān khalei chiwui vang ithumna kapingna.

¹³ Mai kahor kashimān chi Israelnaobingna mathei khavai Mosesna maili fakakham thada ithumna masāmana.

¹⁴ Athumwui ning chi kachangkhat farorhai kala aja rāshungda athumna kachama tuingashit kapā tharan athumwui mikli farorchingda lei. Khiwui vangkhala kaja Khristali kazanga mi chimāngli fakharor chi lānkhamina.

¹⁵ Arui eina tangda Moseswui ningkhami chi kapā tharan athumwui ningli fororchingda lei.

¹⁶ Kha hithada kapihaida lei, “Prohowui mangāli yangkakā tharan awui fakharor chi lānmihaira.”

¹⁷ Hili “Proho” kaji hi Manglā kajina, kala Prohowui Manglā khaleipamli ningkhān lei.

¹⁸ Kala mai mafakhamla awui tekhamatei yangda khalei ithum saikorava tekmateikhangai tekmateida awui sakrin thada ngacheihaora; kaja hi Mangla eina khaleia Prohowui eina kharāna.