2 CORINTHNAO 2 - Kathara Bible (BSI)

¹ Nathum makhananglui khavai I marāluimara da machukhaira.

² Kaja ina nathumli khanang ngasakhaiakha ili khipāna mathān ngasakrakhala? Khanang ngasak kahai nathum maningla katei maleimana.

³ Ili mathān khangasakbingli makhanang ngasak khangaiwui vang marāngaimada chithi hi kagapina. Kaja ina ringkaphā tharan nathumla ringphāra da shitsanga.

⁴ Ina ningchotlak eina chāra̱ tāda kakapi hi nathumli khanang khavai maningmana, kha nathumli kayākha leishikhala kaji theikhui khavaina.

Khalānga Mili Pheokhami

⁵ Kachikathāna kachikathā akhali khanang ngasakakha, chi imāngli maningmana, kha apong akha eina nathum saikoralina (Ina hithada kahāng hi nathumli khāda mahāngkhangaiwui vangna).

⁶ Awuitungli yaruina ngazeklaga mayā khangarokwui tandi khami china shapa.

⁷ Chithālala nathumna ali pheomiphalungra kala katomphalungra, chithākha wukkhanangnā kahaiwui eina a mashimānmara.

⁸ Kala nathumna ali leishikachangkhata kaji hi theikhui ngasaklu.

⁹ Nathumna iwui kahāng kayākha nganākhala kaji theikhui khavai chithi chi kagapina da hāngpai.

¹⁰ Khalāng sākahai mili nathumna pheomiakha inala pheomi, kaja ina pheokhami chitharan nathumwui mangā eina Khristawui miktāli pheokhamina.

¹¹ Chieina Satanna ithumli mayuimara kaja awui khangarān chi khikhala da ithumna thei.

Troasli Paulwui Ningkakharik

¹² Ina Khristawui paokaphā hāshok khavai Troasli vākazang tharan Prohona ot chiwui vang khamong shomi kahai samphanga.

¹³ Kha ivānao Titusli masamkaphangwui vang I ningkhariklākhaowa. Chiwui vang athumli kapāng shālam sākhuilaga Macedoniali vāhaowa.

Khristawui Ming eina Khayui

¹⁴ Vareli ningshi, kaja Khristawuilungli Varena ithumli khayui samphang ngasaka kala ithumli shichinlaga nganamkaphā anganam thada Khristawui pongli apam kachiva̱li ngayaovai.

¹⁵ Kaja huikhuida khalei kala shimānhaokida khalei athumli ithum hiya Khristana Vareli kachigat nganamkaphā anganam kathāna.

¹⁶ Shimān kahai athumli ithum hiya kathinganam kathāna, khangateibingwui vang kharingwui anganamna. Chithākha khipāna sararrakhala?

¹⁷ Ithum Varewui chānpaoli paisor eina kaphaning athum kathā maningmana. Kha Varena kachihowui vang Khristawui rao sāda ithumna ningtharlak eina awui miktāli matuiya.