2 CORINTHNAO 13 - Kathara Bible (BSI)

Khanaowa Hāngkhamachin kala Kapāng Tui

¹ Ina nathumli rāki kaji hina kakathumana. Kaphen kachiva̱li mi khani kala chungmeidana shākhi leiphalungra.

² Rida morei sākahaibinglila, kateibinglila hāngser kajina; rākakhanelila hānghaira, I mashā marālala aruila hānglui kajina kaja I rākhanāli chikathā mili mathāhailakmara.

³ Khristana ili matui khangasakna kaji nathumna ningkachāng theikhangai pramān saikora samphangra. Nathumli machinkida Khrista mangazanmana kha awui pangshap chi nathumli theingasakra.

⁴ Ali khangazana akha thada krushli shaothata kha Varewui pangshap eina ana kharingna. Ali ngasoda ithumla ngazanruma kha nathumli otram ngatha̱mi khavai Varewui pangshap china ithum ali ngasoda ringra.

⁵ Nathum shitsangtita leichinglā kaji nathum khalatta chāng yanglu kala machukkhuilu. Nathumna chāng khayang chili mangasungkharar maningakha Khrista nathumwuili lei da matheimala?

⁶ Ithumna chāng khayang chili mayuikharar maleimana kaji hi nathumna theira da shitsanga.

⁷ Ithumwui ot kasā ungshunghaira jikhavai maningla kha nathumna khayon ot masālui khavai ithumna Vareli seihā sāmi. Chieina chāng khayang chili ithum mangasungkharar thada theilala nathumna khamashung ot chi sāshapra.

⁸ Kaje khamashung otli ngakaishida masārarmana, kha khamashungwui vāngmang sāshapa.

⁹ Ithumna khangazan tharan nathum panghaoda ithum ringphai. Chieina nathum kāshungmei khavai ithumna seihā sāmi.

¹⁰ Sākhayāng khavai maningla sākā khavai Prohona ili pangshap mikahai chi eina ngasoda kharā tharan sāshida masā khavai lāchāda leilakha chithi hi kagapina.

¹¹ Naomeikapta, ivānaobing ringphāmeilu. Kāshungmei khavai sālu, iwui kapo nganāmilu, ningkha sālu; chingri eina okthuirumlu. Leikashi kala chingri kahaiwui Varena nathumli ngasomichingranu.

¹² Akha eina akha chinaongarāwui samkhangarokwui shālam sākakhui thada sāngaroklu.

¹³ Vareli shitkasangbing saikorana nathumli shālam chiphunli.

¹⁴ Proho Jishu Khristawui lukhamashan, Varewui leikashi kala Manglā Katharawui ngasokhami chi nathum saikorawuitungli leimichingranu.