2 CORINTHNAO 12 - Kathara Bible (BSI)

Paulwui Khamahā kala Phongkhami

¹ Lāngkasona tongkazā maleilala ina lāngsora. Kha ara Prohona khami mahākhami kala phongkhamiwui pongli ina hāngra.

² Kum tharāda mati thuihaira, Khristali kazanga mi akhali kazingram kakathumali khuikai, phasā zangda khuikāgā, phasā mazangla khuikākhala I matheimana—Varena thei;

³ kala mipā hili Paradiseli khuikai kaji ina thei: phasā zangda khuikāgā, phasā mazangla khuikākhala I matheimana— kha Varena thei

⁴ kala tui eina mahāngkapai, mikumowui male eina mahāngkharar tui kachungkha ana shai.

⁵ Chieina mipā hiwui vang ina lāngsora kha iwui khangazanwui vang maningla ina lāngso khavai maleimana.

⁶ Ina lāngsokhangai hi mangkhama̱wui vang maningmana, kaja ina khamashung tui khamatuina. Kha iwui eina theikakhui, shākakhui chili lāngda ili sakmeida maphaning khavai malāngsongaimana.

⁷ Phongkhami kachungkha ina kathei chiwui vang I khalatta sotmasaohaipaishina da hapkhano khavai iwui phasāli ka̱shāt kathā, Satanwui khutlai chi tophummihai.

⁸ Khuishokmi khavai ina Proholi poda kathumshihaira.

⁹ Kha ana ili hānga, “Iwui lukhamashan chi nawui vang shapa, kaja khangazan tharan iwui pangshap chi kāshung ngasaka.” Chiwui vang eina iwui khangazanwui vang mataimeida mathānda lāngsomeira, chithākha Khristawui pangshap chi iwuili leimichingra.

¹⁰ Khristawui vang khangazan, maikashi, kakhanang, rekakharek kala kasak saikora ina phungngailaka. Kaja khangazan tharan pangshap samphanga.

Paulna Corinthnaobingwui vāng Phaningkhami

¹¹ Ili mangkhama̱ thāngasak kahai hi nathumnasera. Achā nathumpāna iwui maram mathada hāngmihaisāki kajina. I khikha maningmana jilala kahaka paokazatbingli mateomeilakmana.

¹² Kachangkhat paokazata akhana kaji theikhui khavai nathumwui mangāli kakhāng eina, machut kala matakhak kahai kasā kala masākharar kasā otbing china khudamna.

¹³ Iwui kaphaningli nathum church khangateili teomeiada kaphaning maleilakmana, nathumli iwui vang eina machot khangasak chimaya. Chiwui vang pheomilu.

¹⁴ Ina nathumli rākida hotkhanā hina kakathumana. Rālala nathumli makhanang ngasakmara; kaja nathumwui ot ningkachāng maningmana kha nathumli ningkachāngna. Naongarāna ava̱ avāwui vang ngarānsangki kaji maningmana, kha ava̱ avāna naongarāwui vang ngarānmiki kajina.

¹⁵ Nathumli ngachonmi khavai iwui khalei kala I khalattala mathānthathup chigatmira. Nathumli mataimeida leishiakha, ili suitāda leishirala?

¹⁶ Ina nathumli makhanang ngasakmana da theilala, chithākakhaningna, ithumwui eina kachungkha kapikzai da kaikhana hānga.

¹⁷ Ina chihokharā athumli shichinlaga nathumwui eina I khalattawui tongkazā samphanghaola?

¹⁸ Hānglaksa jiakha Titus eina ali ngasokharā ichina hili saklak eina chihokharāna. Ithumwui ningphanin kala apong ngaraichada mazatthula?

¹⁹ Ithum khalatta mashung khavai phayatchinga da phaningchingla? Leikashebing, nathum reisang khavai Varewui mangāli ithumna Khristawui hāngngasakkhangai chi kahāngna.

²⁰ Kaja ina kharā tharan ina ningkachāng chi nathumwuili makhalei kala nathumwui ningkachāng chi iwuili makhalei ngasāpaishina, kaja nathumwui alungli kharar khangarok, mikpaikashi, malungkhavāt, kākharām, khamashāt, misuichān, makakachang ot kala pa̱khangapā leisāpaishina da ngachee.

²¹ Ina rākhalui tharan Varena nathumwui miktāli ili khayak ngasakhaipaishinada ina ngacheeya; kala rida morei kasābingna athumwui makathar, shuikhangarui kala phokaphā otsakbing chi ning mangateila leichingkasāwui vang eina ina sikafa samphanghaipai.