2 CORINTHNAO 11 - Kathara Bible (BSI)

Paul kala Minama Paokazatbing

¹ Ina mangma̱sālala chi khayangmilu. Ya kajimilu.

² Varewui thada ina nathumli shivāmlaka, kala kachingva̱ sha̱naona agaharali fakhavā thada nathumli ina Khristali khāmmi kahaina.

³ Kha phara̱wui mareimarāna Eveli mikhanam chithada, Khristali nathumwui khamashung kala kathar eina kachigat ning chi makhaohaipaishina da ngacheelaka.

⁴ Kaja ithumna tamchithei kahai chi maningla mi kateina khangatei Jishu akhawui tui tamkachitheila, kala ithumna hākashoka Manglā kala paokaphā chi maningla ngateihang kahai manglā kala chānpao hāngphāphā kajilila nathumna paisor eina khuisangphāphai.

⁵ I hi nathumli tamkachithei khamataia paokazatbingli teomeiyada maphaningmana.

⁶ Ina khamatuili themlāk majisālala, ila theithangkhamei mina. Hiwui pongli nathumli tharlak eina hāngchinghaira.

⁷ Varewui paokaphā tamkachitheiwui vang ina nathumli khikha mapomana. Nathumli haksang khavai kasāli I khalatta teosang kahai hiwui khayon leila?

⁸ Nathumli otram ngatha̱ khavai ina khangatei churchbingwui khangachon kakhui hi athumwui ngapaikazāna.

⁹ Ina nathumli ngasopamda leilakha iwui khavāt pheisāla mapomana; Macedoniawui avānaobingna iwui khavāt saikora khuirāmi. Khare kachāngwui thada aruila nathumli makhanang ngasakmara.

¹⁰ Khristawui khamashung ili zangmihaoda Achaia ngaleili khalei mi khipānakha iwui lāngsokhangai hi makhāmrarmara da hāngshapa.

¹¹ Ina nathumli maleishimana jihaola? Ina nathumli leikashi Varena thei.

¹² Ithumwui kasā thada sai da kahānga athumwui lāngkaso suitā khavai, ina sāda khalei ot hi sāchingra.

¹³ Athum hiya Khristawui paokazata tākam eina sakakhaninga minamma paokazata kala kakapik ot kasābingna.

¹⁴ Chi matakhak kahai maleimana. Satan eina tangda kahorwui kazingrao sākhuikhaningshapa.

¹⁵ Chiwui vang eina chipeewui raobingna khamashunga rao sākakhaning kasak ot maningmana. Naoda athumna sākahai chi tāzakta samphangra.

Paulna Paokazata sāda Kachot Samkaphang

¹⁶ Ina hāngluishitli, I mangkhama̱ mina da khipānakha maphaningaranu, phaningsālala ila khalāngsopai khavai mangkhama̱ akha thada khamayāmilu.

¹⁷ Iwui tui hi Prohona hāngngasakkhangai maningmana, kha hiwui pongli langkaso hi mangkhama̱ kathā akhana.

¹⁸ Okathui otwui vang kachungkhana lāngsoakha, ila lāngsophalungrali.

¹⁹ Nathumna thangmeihaoda mangkhama̱bingli ja̱mishapa.

²⁰ Mina nathumli tandi sālala, namzālala, khalen sanglala, mautshitlala, maili kaphelala, nathumna ja̱mishapa,

²¹ ithumva chi mathārarmana da kahāng hi kakhayak otna. Kha kachikathāna khikhikhawui vang lāngsoshapakha— ina mangkhama̱ thada khamatuina— ila chithada sāshapra.

²² Athum Hebrewnaolā? Ila Hebrewnaona; athum Abrahamwui ara̱-azāla? Ila khangatei maleimana.

²³ Athum Khristawui raola? Kapānao thada kahāngna— athumliva I mathāmei! Ina pangmeikharda ot sāhaira; phātoplila I chungmeida zanga, shaomi kahaila shānla makhuimana, thinanai sākhuikhui ji.

²⁴ Jihudibingna lijei thumrāda chikoko eina phangāshi,

²⁵ Romenaobingna kathumshida shaowa, kala akhashida ngalung eina horra. Marikhong kakaili kathum shida zanghaira kala akhashidava ngashun akha ngayā akha da tara̱lungli pamhaira.

²⁶ Iwui kha̱ram kazatli tara̱kaphong, pha̱ma̱shaomi kahai, Jihudiwui eina, Gentilewui eina keinunglila, shamadrulila, ngahonglila, minama ngasotnaowui einala mahāngkhararra ka̱lākashi samphanga.

²⁷ Ringkashi kachotkachāng ngayā mapikakhui, kathai, ra̱kachang, kasāngkharei kakhum, kasik kala kashankachon makhangavai kachungkha shida samphanghaira.

²⁸ Saikora chi hailaga thangkachida ina church katongawui vang phaningkhamiwui malungkharing lei.

²⁹ Kachikathāna ngazan kahai leiakha ila ali ngazanrum kahai thai, akhana morei sākha ining kateokha kachot maningmana.

³⁰ Ina lāngsophalungra jiakha I kayākha ngazankhala da kathei chiwui vang lāngsora.

³¹ I makapikmana kaji hi Proho Jishuwui Avāva̱, katang mavaila sokhame Varena thei.

³² Damascusli leilakha awunga Aretaswui azingli governor kasāpāna ili tukkhui khavai keinungwui ngaveili shantri chipama.

³³ Kha polāngli sanglaga phākhowui charfali chihotāda awui eina yāmshok kahaina.