1 WUNGNAOBING 9 - Kathara Bible (BSI)

Solomonli Varena Rāchitheiluishit kaji

¹ Solomonna Prohowui shimla, awungawui shimla, kala ningkachāng shim sakhuiser kahaiwui thili,

² Gibeonli kachithei thāda Prohona Solomonli kakhane rāchitheiluishita.

³ Prohona ali hānga, “Nana seihā sāda iwui mangāli kapo chi ina shāhaira; kala nana sakā kahai shim chi ina tharchigatmihaira, hili iwui ming leichingra; ina ningkachang eina yangmichingra.

⁴ Navā Davidna kazat thāda, nana ningsā ngazipta kala khangarong eina iwui ningkhami, iwui ain kala shiyan-chikan mayonda imangāli zatakha,

⁵ ina navā Davidli ‘Israelwui wungpamkhongli chipam khavai ina nali mi mavatmilakmara’ da ngashit kahai thāda ina Israelwuitungli nawui wungpamkhong katang mavaila sakāmira.

⁶ Kha nala, nanaongarāla, iwui ningkhami manganāmada, kala shiyan nawui mangāli haikhami mamayonla vare khangateili otram ngatha̱da khorumthuihaiakha,

⁷ ina athumli mikahai lam chiwui eina Israelli katatshokhaora; kala imingwui vang ngasāra da tharchigat kahai shim chila iwui mikyanwui eina horhaida Israel hi miyur saikorawui chānjam, kala meisumtui ngasāhaora.

⁸ Kala shim hi sakhayānghaida horyāng kahai sahaora; hi rākanda kathei mi kachiva̱ matakhakhaira, kala mana̱rorda ‘Kathāda Prohona ngalei kala shim hili hithāda sāhaokhala?’ da hāngra.

⁹ Chieina athumna ‘Khikhalajila avāva̱ ngarāli Egyptwui eina thānshokkhame Proho athumwui Vareli horhaowa, kala khangatei varebingli otram ngatha̱da khorumhaowa; chiwui vang Prohona athumwuitungli makaphā saikora hi khuikharāna’ da hāngra.”

Hiramli Solomwui Khangashit

¹⁰ Solomonna Prohowui shim eina awungawui shim khani chi sākuphaida kum maga̱ peinaikha kaji eina,

¹¹ Solomonli cedarla, cypressla kala sināla, ana ningkachāng eina tangda mikahai thili, Tyrewui awunga Hiramli Awunga Solomnna Galilee ngaleili khalei keinungbing maga̱ mi.

¹² Kha Solomonna khami keinungbing chi Hiramna Tyrewui eina vāyang khavai khavā chitharan, maringphararthuwa.

¹³ Chiwui vang “Ichinā, nana khami keinungbing hi khi keinungkhala?” da hānga. Chiwui vang ngalei chili aja eina tangda Cabul hochingda lei.

¹⁴ Hiramna Solomonli sinā kg. thingmati chihovai.

Solomonwui Mataikhamei Ots

¹⁵ Prohowui shim, awungawui shim kala Millo, Jerusalemwui phākho, Hazor, Megiddo kala Gezer hi sākhavai Solomonna thoukai phung khangasakabing

¹⁶ (Egyptwui awunga Pharaohna Gezerli shanglaga keinung chi khuida mei sa̱tāmihaida keinung chili kapāna Canaannaobingli sāthatserhaowa; chi anao ngalāva̱li kakhuiwui vang manho sāda Solomonli mi;

¹⁷ chiwui vang Solomonna Gezer chi sakāluishita) kala khamaze Beth-horon,

¹⁸ Judahwui lamhāngli khalei Baalath eina Tamar,

¹⁹ Solomonwui zātshim haikhavai keinungbing, siguigari haikhavai keinungbing, Jerusalemli, Lebanonlila kala awui wungramli khalei ana sakhangangai apam kachiva̱lila sākhuisera.

²⁰ Israelwui mibing maningla, Amornaobing, Hitnaobing, Periznaobing, Hivnaobing, Jebusnaobing, mathikhangakānbing—

²¹ kaja Israelnaobingna mashaothatkhangakānbing chili Solomonna thoukai phungngasakta, raonao sāngasaka; aja eina tangda chithāchingda lei.

²² Kha Israelnaole Solomonna raonao masāngasakmana; athumna awui shipaibing, otva̱bing, raimi kathānabing, raimi akhavābing, siguigari kathaobing, kala chiwui kathānbing sāngasaka.

²³ Solomonwui ot kasā yangkhame khamatai otva̱bing chi hina: otkasāli yangmi khavai shāphangā hangphangāna:

²⁴ Kha Pharaohwui naongalāva̱na Davidwui keinungli mapamluila Solomonna awui vang sāmi kahai shimli apam kahai eina athumna Millo keinung sakālui.

²⁵ Kumkhali kathum shida Solomonna, Proho wui vang sākahai hanphut chili rikkatā kachigat ningyatchigat chigatchinga, kala nganamkaphā thao riktātā ji. Chithāda shim chi sākhuihaowa.

²⁶ Awunga Solomonna Ezion-geber, Edom ngaleiwui Red Sea phei Eloth ngalemli jahas ngashingkha sākhui.

²⁷ Solomonwui mibingli ngasoda Hiramna awui mi, shamadruwui khangachā theikhamasuibing jahas ngashingkhali ngasovā ngasaka;

²⁸ kala athumna Ophirli vai, kala chiwui eina sinā akhuida Awunga Solomonli sinā kg. thingtharāda mati lāngda khuiungmi.