1 WUNGNAOBING 8 - Kathara Bible (BSI)

Ningkhamiwui Oko Khuikasang

¹ Chiwui thili Solomonna Israelwui khararnaobing shang-shangwui akhavābing, Israel shimkhur kathānabingli hokhuiserda Jerusalemli Awunga Solomonwui mangāli kazipa; kala Davidwui keinung Zionli haikasā Prohowui tuingashit oko chi khuiung khavai sai.

² Kashine kachāng, kaja Ethanim (Pi) kachāngwui phanit atamli Israelnao katonga Awunga Solomonwuili akazipa.

³ Israelwui ararbing rāserda pāngmonbingna oko chi akhui.

⁴ Prohowui oko, kazip khavai kachonshim kala chili haikahai kathara khorkhongbing saikora akhuida Levinaobing eina pāngmonbing saikorana khuiunga.

⁵ Awunga Solomonli ngasoda awui mangāli kazip kahai Israelwui ashangva̱ china oko mangāli kazipa; yaola, seila sorngasaida mashing mashānkharar pha̱phayai.

⁶ Chiwui thili Prohowui tuingashit oko chi pāngmonbingna alung zangkhamayar katharapamwui tharmathengmeikap kaje pam chili khuizangda cherubim khaniwui angachangzingli haihai.

⁷ Kaja cherubim chi angachāng hārlaga haikahaiwui vang okolila kala chi ngava̱ khavai thingphān chilila rānkhammi.

⁸ Thingphān khani chi sangnāhaoda amareibing chi tharkhamatheng zangkhamayārwui eina theizangshapa, kha ayārwui einava matheimana; kala chi aja eina tangda lei.

⁹ Oko chili athumna Egyptwui eina kashok tharan, Prohona Israel mibingli tuingashit kasā Horeb kaphungli Mosesna sangkahai lungphek khani chi maningla khangatei khikha masanghaimana.

¹⁰ Kala pāngmonbingna katharapamwui eina kashok tharan Prohowui shim chi muiyāna pemhaowa,

¹¹ kala muiyā pemhaoda pāngmonbingna nganingda otramla mangatha̱paithuwa; kaja Prohowui tekhamateina shim chi pemhaowa.

Khorumshim Dharkat Kasā

¹² Chieina Solomonna hānga, “Kazingli Prohona zimik shokngasaka, kha tangmangting kahaipamli pamtha̱ra ji.

¹³ Juikhamataiya shim ina sāmihaira, mashimānda nawui pamkhavai.”

Solomonna Mibingli Hāngkachithei

¹⁴ Chiwui thili awungana mai ngareivāda Israel yaruina kaziplakha athum katongali somi.

¹⁵ Kala ana hānga, “Ishāvā Davidli awui khamor eina ngashit kahai chi apāng eina ungshungkhame Israelwui Proho Vare chili soranu,

¹⁶ ana hithāda hānghaisai, ‘Egyptwui eina Israel mibingli ina khuishokthangwui eina thuida, shim akha sāda iwui ming leikhavai Israel shang saikorawui alungli keinung akhala kapangkakhui maleimana, kha iwui mibingli nganaomi khavai ina Davidli kapangkhui.’”

¹⁷ “Israelwui Proho Vare mingwui vang shim akha sākhavai ishāvā Davidwui ningli phaningsai,

¹⁸ kha Prohona ishāvā Davidli hānga, ‘Iwui vang nana shim akha sākhuira da kaphaning chi phālaka;

¹⁹ chithālala nana masāmara, kha nana pharākhuiki kaji nanao mayara china imingwui vang shim chi sanaora.’

²⁰ “Ara Prohona awui ngashit kahai chi ungshungmihaira; kaja Prohona ngashit kahai thāda ina ishāvā Davidwui mahut khuida Israelwui wungpamkhongli pamda lei, kala Israelwui Proho Varewui mingwui vang ina shim chi sākāhaira.

²¹ Kala Egyptwui eina athumli thānkashok tharan Prohona ishāvā ngarāli tuingashit sākahai oko chiwui vangla ina apam akha ngarankhuihaira.”

Solomonwui Seihā

²² Chiwui thili Israelwui kazip saikora khalei Prohowui hanphut mangāli Solomonna nganinga, kala awui pāng khani kazingramshong khāngkāda hānga;

²³ “O Proho, Israelwui Vare, ningtongda nawui thi kashura naraobingli makhangachei tuingashit kala leikashi tāshungmida kazingramli kala okathuli na kathā Vare katei maleimana;

²⁴ narao David ishāvāli nana ngashit kahai chi makailakmana. Kachangkhat eina nakhamorna hāngkahai chi aja napāng eina ungshungmi.

²⁵ Chiwui vang eina ara, O Proho, Israelwui Vare, ishāvā Davidli nana ngashitmi kahai, ‘Nana iwui kahāng khanganā thāda nanao mayarana iwui kahāng nganachingakha, Israelli nganaomi khavai iwui mangāli mi mavatmilakmara’ da hāngkahai chi mangacheimihaialu.

²⁶ Ara chiwui vang eina, O Israelwui Vare, narao ishāvā Davidli hāngkahai tui chi ungshung ngasakmilu.

²⁷ “Kha Varena okathuili pamkachangrala? Yanglu, kazingram eina juikhamataiya kazingram chilila mapamphayoakha ina sākakhui shim hina khi jirakhala!

²⁸ Chithālala narao ina seihā sāda kapo hi, O Proho iwui Vare, aja naraona nawui mingli kapo hi khashāmilu;

²⁹ chieina apam hiwui eina naraona kachigat kasā chili nana shāmida, ‘Iwui ming leichingra’ da nana hāngkahai shim hili ngashun ngayā mateila khayangsangmilu.

³⁰ Narao kala nawui Israel mibingna apam hishong ngareirālaga kapo chitharan kashāmilu; nawui somkhavai pam kazingramli kashāmilu; kala nana kashā tharan kapheomilu.

³¹ “Mi akhana awui khongnainaoli khayon ot sāhaida shim hili kālaga hanphutwui mangāli tuingashit khuiakha,

³² nana kazingramli shākāmida narao khayonali khayon athishurda, khamashungali khamashung athishurda bichar sāda sāman milu.

³³ “Nawui mi Israelna nali morei kasāwui vang yangkashibingna maishi kahai tharan nali mai ngareiungluishitta namingli hāngphatlaga shim hili rāpoda seihā saakha,

³⁴ nana kazingramli shāmida, nawui mi Israelwui morei kapheomilu, kala ishāvā ngarāli nana mikahai ngalei chili kathānungmiluilu.

³⁵ “Athumna nali morei kasāwui vang kazingram shunghaoda kazing marokhami tharan, nana athumli kachot mida athumna apam hili ngareirāda seihā saakha, namingli poda moreiwui eina nali ngareiungakha,

³⁶ kazingramli nana shāmilu, kala athumna zatkhangayi shongfa, athumli tamchitheimida narao kala nawui mibingwui morei kapheomilu; nawui mibingli nana shimlui sāda mikahai ngalei chili kazing kharotāmilu.

³⁷ “Ram chili zāt kasak atamlila, sākazāt nilala, kumshāt, majing katāk, khaohsom kala aga̱-akaina shimān khangasak nilala; yangkashebingna keinungli kuinam kahai nilala; mimao kazanglala, kazātyur khangatatei kakazā atamlila;

³⁸ kashoshokwui vang seihā kasā kala kapo, mi akha kala Israel saikorana nilala ichichāwui ningkachot chitheida, shim hili ngareiunglaga pāng khāngkāda nali kapo chi;

³⁹ nawui pamkhavai kazingramli shākāmida, kapheomilu; kala nana mi kachiva̱li kachichāwui kaphaning athishurda sāmilu; (kaja mi kachiva̱wui ning namāngna theisera);

⁴⁰ chithāda ishāvā ngarāli mikahai lam hili okthuiching khavai athumna nali ngacheeranu.

⁴¹ “Chi tākam eina nawui mi Israel makhaning, yur katei akhana nawui mingwui vang ram katāva̱wui eina rāda,

⁴² (kaja athumna nawui reikhamatai ming, nawui pāngthei kharei, kala nawui pāngthei katingkhami shāda), athumnala shim hili rāda seihā saakha,

⁴³ nawui pamkhavai kazingramli shākāmilu, kala athumwui kapo athishurda kasāmilu; chieina nawui Israel mibingwui thāda okathuiwui yurbing huptana nawui ming theida nali ngacheera; kala ina sākahai shim hi nawui ming eina hora da athumna theikhuira.

⁴⁴ “Nana vālu kaji pamli nawui mibingna athumwui yangkashebingli rai akhangarar tharan, kala nana kapangkhuida namingwui vang ina sākahai shim khalei keinungshongli athumna ngareiungda Proholi seihā saakha,

⁴⁵ athumwui seihā kasā kala kapo chi kazingli nana shākāmida apong chiwui vang khangachonmilu.

⁴⁶ “Nawui mangāli athumna morei sākahai chitharan— kaja mi khipākha morei makasā maleimana— nana malungvāthaida yangkashibingwui pāngli horsangmihaiakha, kala athumli yangkashiwui ramli, nailala tālala, tukvāhaiakha,

⁴⁷ athumna narkahaipamli ning ngateida poda, ‘Ithumna makaphā kala masākhangayi ot sāda morei sāhaira’ jiakha;

⁴⁸ apam chili leilakha athumna ningyāng tongtingda hāngphatakha, kala nana athumwui avāva̱ ngarāli mikahai ramli nana kapangkhui kahai keinung ina namingwui vang sakā kahai shim hili ngareiungda nali seihā saakha;

⁴⁹ nawui pamkhavai kazingramli athumwui seihā kala kapo shākāmida athumwui apong chiwui vang khanganingmilu

⁵⁰ kala nali morei, khayonkhamāng sākahai nawui mibingli pheomilu; kala athumli tukkakhuibingwui mikyanli lumashanmi khavai, tukkakhuiabing chili lukhamashan ning sangmilu,

⁵¹ (kaja Egyptwui rekakharekwui eina nawui mi, kala nawui shimluikat sākhavai nana thānshokmi kahaina).

⁵² “Naraona kapo kala nawui mi Israelna kapo atam kachiva̱li nana kathei-kashāmilu.

⁵³ Kaja O Proho Vare, ishāvā ngarāli Egyptwui eina thānkashok tharan narao Mosesli hāngmi khangasak thāda, Israelnaobingli nawui mi sākhavai kala shimluikat sākhavai, okathuiwui miyur khangateiwui eina nana athumli ngatei ngasak kahaina.”

⁵⁴ Solomonna Prohowui hanphutwui ngalemli khuktida pāng khānglaga Proholi seihā sāda kapowui kachigat saikora kupser kahai eina ngakarthui;

⁵⁵ kala nganingda Israelwui kakazip katonga chili somida panglāk eina vaoda hānga,

⁵⁶ “Ana ngashit kahai athishurda awui mi Israelli chingrihai khangasaka Proho chili soranu! Awui rao Mosesli hāngmi khangasak kaphā ngashit kahai chi tuikhur akha eina tangda makaimana.

⁵⁷ Ishāvā ngarāli ngasokhami thāda ithumwui Proho Varena ithumlila ngasomiranu; ana ithumli mahorhaila ngasomiranu;

⁵⁸ chithāda ishāvā ngarāli kakaso thāda awui thi shurda zatkhavai, awui ningkhami, awui ain, kala awui shiyan-chikan kala awui kakaso mayonngai khavai ithumwui ningli sangmiranu.

⁵⁹ Ina Prohowui mangāli hangtā kahai tuibing hi ngashun ngayā ithum Proho Varewui mangāli kāshungmiranu, kala awui rao, kala awui mi Israelwui angalang chiwui vang khangachonmiranu;

⁶⁰ chieina okathuiwui miyur saikorana Proho hi Varena, khangatei maleiluimana da theira.

⁶¹ Aja kasā thāda nathumna ningtonglak eina Proho Varewui shiyan-chikan kala ningkhami mayonlu.”

Khorumshim Dharkachigat

⁶² Chiwui thili awungali ngasokasā Israel saikorana Proholi pha̱kaphayā chigata.

⁶³ Ningyatchigatwui vang Solomonna Proholi mukkā thingmaga̱da khani, yao lakh akha thingmaga̱ chigata. Chithāda awunga kala Israelwui mi saikora Prohowui shim chi dharchigathaowa.

⁶⁴ Chithang, Prohowui shim mangāli khalei kayang alung chila Solomonna tharchigata; kaja ana rikkatā kachigat, muisakchigat, kala ningyatchigatwui athao apam chili chigatserhaoda Prohowui mangāli khalei pithrai hanphut chi rikkatā kachigat, muisakchigat, ningyatchigatwui athao rikkatā saikora chiwui vang pithrai hanphut chi teonahaowa.

⁶⁵ Chithāda Hamathwui zangkhavaiwui eina thuilaga Egyptwui Kongrā vāshungda Israel kachungkha kazipta Solomonna shinithang zātkhān sai.

⁶⁶ Kachishatathang ana mibing chi kachichāramli shiunhaowa; kala awui rao David eina Israelnaobingli Prohona khamathā ot chitheikhamiwui vang mathānthup eina awungali somida kachichāramli ungserhaowa.