1 WUNGNAOBING 7 - Kathara Bible (BSI)

Solomonwui Konung

¹ Solomonna awui shim kasā kakup eina tangda kum tharāda kathum zanga.

² Ana Lebanon Ngahong Shim chi khuining shākha sāng, hangphangā pāk, thumrā jui kala cedarthingwui pakra̱ ngaher kathum shuna; chiwuitungli cedarthing khangen para.

³ Pakra̱ tharāda phangā khangahera pakra̱ hangmatida phangā khalei kā chiwuitungli cedarthing eina romshāna.

⁴ Ngaher kathuthumli charfa akom ava̱va̱ lei; kala charfa mathāng kathum kāroda uta.

⁵ Khamongla charfala asān-aret ngaraikachā akom sāsangsera; kala charfa mathāng kathumthum eina karo ngaroka.

⁶ Pākra̱ Shim kā chi ana khuining hangphangā sāng, thumrā pāk; kala chiwui mangāshong pakra̱ shunlaga rāmrah kaharshokta sai.

⁷ Kala ana bichar sākhavai Wungpamkhong Shim chi, Bicharwui Shimlar chila; chonnar eina thuilaga kasho kāshungda katonga cedarthing eina sai.

⁸ Awui pamkhavai shim bichar shimlar akhanukshong, chila chi takam eina sai. Kala Pharaohwui naongalāva̱, apreiva̱wui shimla chithāda sākhui.

⁹ Saikora hi aman kasaka ngalung eina amai, akhanuk nāp tamlaga horai eina hātkhui; shimphunga eina thuilaga yāngkhup kāshungda, shimlung kayāng eina thuilaga Prohowui shim kharei eina tangda chi sāsanga.

¹⁰ Shimphunga chi aphei khuining chishat, tharā kapāka aman kasaka ngalungmāng eina sai.

¹¹ Chiwuitungli aman kasak ngalungbing cedarthing chila nāp onkazaklaga hātkakhuimānga.

¹² Khareiya shimlung kayāng thāda hātkakhui ngalung ngaphor kathum kala cedar khāngen ngaherkha eina sākai; alung zangkhamayar kayāng khamasai eina yāngkhupla chithāpapama.

Hiramwui Otpam

¹³ Awunga Solomonna Hiramli Tyrewui eina ahokhui ngasaka.

¹⁴ Ava Naphtali shangwui ra̱meinao akhawui naona. Avāva̱ Tyrewui mina, kala kori, pithrai kasema mi sāsai; a hi thangkhameila thangmei, kathemla themlaka; kala koriwui ot satheisera. Ana Awunga Solomonwui sākhangai saikora sāmi.

Kori Pākra̱ Khani

¹⁵ Ana koriwui pakra̱ khani heikhui. Akhawui asān khuining tharāda chishatna, kala ngavam khuining tharāda khanina; akhur machoi, kala pāngmaya parkha shai. Pākra̱ kakhane chila chi tākam haipapama.

¹⁶ Pākra̱ khani chiwui atungli kashong khavai kori eina heikakhui agui khanila sākhui; khani chi khuining phangāngā sangthathui.

¹⁷ Pākra̱ tungli shongkahai agui khani chili sināchā thāda khāntarānlaga agui akhawui vang akha kala agui khangatei akhawui vang akha sāsanga.

¹⁸ Chi tākam eina ana kabothei thāda sākhui; kala pākra̱ tungli khalei agui chi faror khavai ngaherkhani sāda kabothei chi khānkatarān chili sāsanga; kala khangatei agui chila chi takam eina sāsanga.

¹⁹ Yangkhupli shunkahai pākra̱ khaniwuitungli shongkahai agui khani chi timrāwon thāda sākhui, kala khuining matiti juiya.

²⁰ Agui khani chi pākra̱ khaniwuitungli kala khānkatarānwui ngalemli ngumda ngakhārkashok chiwui atungli shonghai. Chili ngaherkhani eina kabothei shākhani sāsanga; chi honkam eina khangatei aguilila yeksanga.

²¹ Ana pākra̱ khani chi Khorumshimwui yāngkhupli shuna; azingshong shunkahai chili Jachin phokmi, kala atungshong shunkahai chili Boaz phokmi.

²² Pākra̱ atonli timrāwon thāda sāsanga. Hithāda pākra̱wui ot kuphaowa.

Kori Ra̱khon

²³ Chiwui thili ana ngumrik kahai ra̱khon akha heikhui; akhamongli ngatar eina khuining tharā, kajui khuining phangā, kala kuikhamarei khuining thumrā jiya.

²⁴ Chiwui akhamong khuining thumrā chi peida azingli shon pareng khani eina ruksangsera; ra̱khonnao kahei atamli heishān kahaina.

²⁵ Seima̱ tharāda khani, atungshong kathum, zingtunshong kathum, azingshong kathum kala zingshoshong kathum da ngareilaga khanuk ngasunripta ra̱khon chi athumwuitungli parhai.

²⁶ Chiwui kashā pāngmayā parkhaya; kala akhamong tengkotwui thāda timrāwon khangatām thāda sākhui; kala tara̱ liter thinghangmati hi zangshapa.

²⁷ Ana Kori eina khaning khavai aphei tharā sākhui; khaning khavai aphei ava̱va̱na khuining mati sānga, mati pāka, kala kathuthum juiya.

²⁸ Khaning khavai aphei chi hithāda sākhui: aphei ava̱va̱wui akongnā ngavai, akongnābing chi akombingli sanga

²⁹ kala akomli kasang akongnā ava̱va̱li kazingkha̱, mukkā, cherubim sāsangsera. Kala kazingkha̱ eina mukvāwui atunglila azinglila khareiung khareivada awon chā thāda sāsanga.

³⁰ Chili lāngda aphei ava̱va̱li koriwui kāngphei matiti kala chiwui phungva̱ kāsera; kala achikun matili khongsai chi parkhavai kāsera. Parkhavaibing chi awon chā thāda arāp kachida heishān kahaina.

³¹ Aphei chiwui akhamor khuining akha ngakhārkashoka akhamor hamphei thāda ngumrikhai kala khuining akha tangkhai thuka; kha akongnābing che mangumla ngaraikachā achikun ngasai.

³² Kāngphei mati chi akongnāwui azingli phona kala chiwui phungva̱bing chi apheithingli sāshāna. Kāngphei akhawui kajui khuining akha tangkhaina.

³³ Kāngpheibing chi siguigariwui thāda sākhui, chiwui phungva̱bing, kakui thingla, kasuila, ashamla heikakhuisera.

³⁴ Aphei ava̱va̱wui achikun matili zungkhavai mati kāsera, zungkhavai chi apheili sāshana.

³⁵ Kala aphei chiwui atungvāk khuining makhai juida neiunga; kala apheiwui atonli zungkhavai eina akongnā chi asā akha sāngasaka.

³⁶ Zungkhavai eina akongnāli cherubimla, kazingkha̱la, khaneirongla zangkapai eina tangda, awon chā thāda yeksanga.

³⁷ Chithāda, aphei tharā chi asān-aretla, azakla ngaraichāda heikhuisera.

³⁸ Kala koriwui khongsai tharā sākhui; khongsai ava̱va̱li tara̱ liter shāchishat zanga; kala akhawui asān khuining matina. Aphei tharā chiwui vang khongsai ava̱va̱ lei.

³⁹ Kala ana aphei phangā shim chiwui azingshong haihai, phangāna atungshong kala ra̱khonnao chi azingshongwui zingsho achithekli haihai.

Khorumshimwui Thongthāngbing

⁴⁰ Hiramnala, kapei, khongsai, ham sākhuisera. Kala Prohowui shimli haikhavai ot saikora Awunga Solomonwui vang Hiramna sāmisera:

⁴¹ Pākra̱ khani kala chiwui atungli shongkhavai agui khani, aguiwui akhongli faror khavai khānkatarān khani;

⁴² kala khānkatarān khanili kāngyui khavai kabothei shāmati khānkatarān kachiva̱wui kabothei ngaher khaninina pākra̱ tungwui aguitungli khalei akhong chi fakham khavaina;

⁴³ aphei tharā chi khongsai tharā eina ngasoda nganinga;

⁴⁴ ra̱khonnao akha, kala ra̱khon rungkhavai mukkā tharāda khani da sākhui.

⁴⁵ Prohowui shimli haikhavai Awunga Solomonwui vang Hiramna sākhami ham, kapei kala khongsaibing chi kahinga pithrai eina kasāsera.

⁴⁶ Kala hibing hi Jordanwui tampākli Succoth eina Zarethanwui ngachaili awungana leikhon eina heikhui ngasaka.

⁴⁷ Thongthāngbing chi chungnā kahaiwui vang Solomonna khān maonthuwa, pithrai kayākhakhala kaji matheithuwa.

⁴⁸ Prohowui shimli haikahai, Solomonna sākakhui khorkhongbing chiya: sināwui hanphut, Ngasokhamiwui khamui haikhavai sinā table,

⁴⁹ sināmāng eina kasā meishong: alung zangkhamayar katharapam mangāli azingshong phangā, phangāna atungshong; sināwui awon, thaomei, changjeebingla sinā eina sai;

⁵⁰ tengkot, samchichap, khongsai, khongphei kala nganamkaphā rikkhavai, khāng sinā eina sāsera; kala tharmathengmeikap kaje pamwui khāmong alung zangkhamayar katharapamwui khāmong kala shimlungwui khāmongli pānkhui khavai kapichā sināsera.

⁵¹ Chithāda sāda Prohowui shim kasāli Awunga Solomonna zaikora hi sāsangda kuphaowa. Kala avāva̱ Davidna tharchigat kahai sinawuila, lupāsāwuila, khorkhong saikora, Prohowui lan kazip khavaipamli Solomonna kazipserhaowa.