1 WUNGNAOBING 6 - Kathara Bible (BSI)

Solomonna Khorumshim Kasā

¹ Israelwui mibing Egyptwui eina shokta kum shāmati hangkachishata kum kala Solomonna mungda khamate kum, Khaying kachāng, kaja kachāng kakhaneli, Solomonna Prohowui shim sāphoka.

² Awunga Solomonna shim kasā chi asān khuining hangtharuk, aret khuining maga̱ kala kajui khuining thumrā jiya.

³ Shimreiwui mangāli khalei yāngkhup chi ungshung vāshungda shim chiwui asān-aretli ngaraichāda khuining maga̱ kala shim pharonkashok chila khuining tharā jiya.

⁴ Kala shim kuimareida akom kakā charfa sasanga.

⁵ Ana shim phākho kuimareida shimsak akhala, alung zangkhamayar katharapam kala chiwui shimlung, khaninili kuimareida sāshoka, kala arāp kuimareida kā sāsanga.

⁶ Khamaze mathāng chi khuining phangā pāka, alunglaina khuining tharuk, kala kakathumna khuining shini pāka; kaja shimrāp kuimareida shim phākho chi khangen akhawuitungli akha mangashom ngasak khavai phākho pharonshoka.

⁷ Ngalungbing chi harkhui khavaipamli shānkazakta shim sālakha yāmkar, ngahā kala mari eina sākakhui khutlaiwui khon nilala akhala mashālakmana.

⁸ Mathāng azewui zangkhavai shimwui azingshong sai; chiwui eina mathāng alunglila kākhavai thāk sakai; kala chiwui eina kakhane thāk sakāshumda mathāng atoli kāshunga.

⁹ Chieina ana shim chi sakāda kuphaowa; kala chiwui ceiling cedarthing kala chikhaimāng eina sai.

¹⁰ Tapkasang shimnaobing chi cedarthing eina shimreili zungkhuisera kala khuining phangāngā juiya.

¹¹ Chitharan Prohona Solomonli hānga,

¹² “Shim kasā hiwui pongli, nana iwui ain alungli zatta, shiyan-chikan mayonda iwui ningkhami athi shurchingakha, navā Davidli ina hāngkahai chithāda ina samilakra.

¹³ Kala ina Israelnaobingli ngasopamra, kala iwui mi Israelli mahorhaimara.”

¹⁴ Solomonna shim chi sāda kuphaowa.

Khorumshim Alungwui Thongthāngbing

¹⁵ Ana shim chiwui phākho alungshong cedar chikhai eina napmithai; chonnar eina thuilaga ceiling khanji kashungda alungshong thing eina hamserhai; kala ana chonnar chi cypress chikhai eina hamsera.

¹⁶ Ana shim khanukshong khuining maga̱ sasanglaga, chonnar eina thuilaga ceiling kazokta cedar chikhai eina napmithai; kala hiwui alungli tharmathengmeikap kaji pam chi alung zangkhamayar katharapamli ana sāsanga.

¹⁷ Alung zangkhamayar katharapamwui mangāshong khalei kā chi khuining hangmatiya.

¹⁸ Shimlungshong khanāp cedarthingbing chili shon kala awon khangatām thāda yeksanga; cedar eina napmithaida ngalungzak matheilakmana.

¹⁹ Prohowui tuingashit oko chi haikhavai zangkhamayar kathara kā chi ana shim chiwui zangmayarmeikap kaji pamli sai.

²⁰ Alungwui kathara kā chi khuining maga̱ sanga, maga̱ pāka kala maga̱ juiya; kala chi sinā kachanga eina heirormithai. Kala ana cedarthingwui hanphut akhala sākhui.

²¹ Kala Solomonna shimlung hupta sinā kachanga heimitsanga, kala alung zangkhamayar katharapam chiwui mangāli sināwui huishon ungshung vāshungda thāngda chila sināmang eina heirormithai.

²² Kala shim katonga sinā heirormithai. Kala alungkhamayar apam chili kahai hanphut chila sinā eina rommithai.

²³ Alungwui tharkhamatheng kā chili olivething eina cherubim khani sāsanga; khanini chi khuining tharārā sanga.

²⁴ Cherubwui angachāng akhana khuining phangāngā sānga; cherub akhawui angachāng atonwui eina khangatei aton vāshungda khuining tharārā sanga.

²⁵ Cherub akhapa chila angachāng atonwui eina khangatei aton vāshungda khuining tharārā sanga, cherubim khanini chi kahak kateo kala azakla ngaraichai.

²⁶ Cherub akhawui kajui khuining tharāna, akhapa chila chiyākha juiya.

²⁷ Cherubim chi shim chiwui alung zangmayarmeikap kaji katharapam chili haihai; cherubimwui angachangbing chi harshokta akhawui angachangtonna phākho akhali za̱ya, akhapāwui angachangtonna phākho lākhavāk vaza̱da angachangton lakharip shim alungshong ngasun ngasaka.

²⁸ Kala Cherubim chila ana sinā heirormita.

²⁹ Shimwui alung ayar mateila phākho peida cherubim, khaneirong, awon khangatām yeksangsera.

³⁰ Shimwui alung kala ayār kāwui chonnar katonga sinā eina heirormita.

³¹ Zangkhamayar katharapam zangkhavai khāmong chi ana olivething eina sai; kala chaokatla akhuithingla achikun phangā shokngasaka.

³² Ana khāmong khani chi olivething eina sāda cherubimbing, khaneirong kala awon khangatām yeksanga, kala sinā eina roma; kala cherubim eina khaneirongli sinā heirorlui.

³³ Shimreiwui zangkhavai khāmong chi asān-aret ngaraichada olive thing eina sai,

³⁴ cypressthing eina khāmong khani sāsanga; khāmong khanini chi tipthathuipaiya.

³⁵ Khamong khani chili ana cherubim, khaneirong kala awon khangatām yeksangsera; kala yekkasang kachiva̱ ngaraichāda sinā heirormita.

³⁶ Shim alung zangkhamayarwui yāngkhup chi shānkazak kahai lungpho kathum kala cedarthingphor akha eina kasā khangen ngaherkha eina sakai.

³⁷ Khamate kum Tatharaha kachāngli, Proho shimwui shimphunga khorkuphaowa.

³⁸ Kala kum tharāda akha kākashung eina, Bul kachāng, kaja kachishata kachāng, shim katonga, sāsangkhangai thishurda kuphaowa. Ana shim chi kasāli kum shini zanga.