1 WUNGNAOBING 5 - Kathara Bible (BSI)

Solomona Khorumshim Ngarānkaphok

¹ Avāva̱wui pamli Solomonli awunga sanghaira kaji kashā eina Tyrewui awunga Hiramna awui rao chihovai; kaja Hiramna Davidli leishilāka.

² Kala Solomonna Hiramli pao hāngchiphunda hānga,

³ “Ishāvā Davidna awui Proho Varewui vang shim masākārarthuwa kaji nana thei; kaja yangkashibingli Prohona awui pāngli mahorsangmiranglakha eina tangda athumna rai sachingsai.

⁴ Kha ara iwui Proho Varena ili ngasāmkhui ngasakhaira; yangkashi, kalākashi maleiluimana.

⁵ Chiwui vang eina Prohona ishāvāli, ‘Nawui mahut wungpamkhongli kapama nanao mayarana iwui shim sākāra’ da hāngkahai athishurda ina Proho Varewui mingli shim chi sākhavai phaninghaira.

⁶ Chiwui vang eina Lebanonwui cedarthing ta̱khavai khamayāmilu; kaja nana thei Sidonwui mi thāda iwui mibingna thing ta̱kathei maleimana, iwui mibing nawui mibingli ngaso ngasakra, kala nawui raobingli nana mikharān ngalangman ina mira”

⁷ Hiramna Solomonwui tui kashā tharan ringphālakhaida hānga, “Hiyakha kahaka miyur nganaomi khavai Davidli thangkhamei nao khame Proho chili aja zimik sochikatranu.”

⁸ Kala Hiramna Solomonli pao chihovāda, “Nana ili pao hangkachiphun chi samphanghaira; cedarthingla, cypressthingla nana ningkachāng athishurda saikora ngarānmira.

⁹ Thingbing chi Lebanonwui eina ngayili iwui mibingna khuitāmira; kaja pong sālaga khalapta huitāmira kala nana ningkachāng apam chili ina pheimi ngasakta chili nana samphangra; kala iwui shimkhurwui kashakazāmāng nana ngarānmimalu.”

¹⁰ Chieina Solomonna ningkachāng eina tangda cedarthingla, cypressthingla Hiramna ngarānmisera,

¹¹ chieina Hiramwui mibingna zākhavai kehu chumranao thingmaga̱, kala thao liter lakh mati kum kachida Solomonna mi.

¹² Prohona ngashit kahai athishurda Solomonli thangkhamei mi, kala Hiram eina Solomon mashitrihai ngarokta ani tuingashitla sai.

¹³ Israel saikorawui eina Awunga Solomonna thoukai thaoda mi thingthumrā kāshunga.

¹⁴ Kala ana athumli thingtharārā eina kachāngchāng ngatak ngasakta Lebanonli chihovai; kachāngkha Lebanonli kala kachāng khanini shimli pamngasaka, kala Adoniramna khajanā chiwui otpam phunga.

¹⁵ Solomonwui ngalung kashana mi thinghangchishat kala lamwui eina ngava̱ungkhami mi thinghangshini leisai,

¹⁶ chili lāngda ot kasābingli yangmi khavai otva̱ thingkathum kala shākathum leisai.

¹⁷ Awungawui kakaso athishurda shimphunga athumna aman kasasaka ngalung kahahakva̱ phokkhui.

¹⁸ Chieina Solomon eina Hiramwui shim kasābing kala Gebalwui mibingna shim sākhavai ngalung shanmi kala thing sāmi.