1 WUNGNAOBING 4 - Kathara Bible (BSI)

Solomonwui Otva̱bing

¹ Solomonna Israel saikorawui awunga sai,

² kala hibing hina awui kathānabingna: Zadokwui nao Azariahna pāngmon sai;

³ Shishawui naomayara Elihoreph eina Ahijahna kapime; Ahiludwui nao Jehoshaphatna kazipsingme sai;

⁴ Jehoiadawui nao Benaiahna raimi kathāna; Zadok eina Abiatharna pāngmon;

⁵ Nathanwui nao Azariahna otva̱bingwui akhavā sai; Nathanwui nao Zabudna pāngmon sāda awungawui ngasotnaona;

⁶ Ahisharna konungwui yangkhamena, kala Abdawui nao Adoniramna thoukainao saikorawui kashinana.

⁷ Israel saikorawuitungli Solomonwui otva̱ tharāda khani leisai; athumna awunga kala shimkhurwui kashakazā khangarān sāmi; athum ava̱va̱na kumkhali kachāng ava̱va̱wui vang ngarānmi.

⁸ Athumwui mingbing chiya: Ephraimwui kaphungramli khalei Benhur;

⁹ Makazwui Ben-deker, Sha-albim, Bethshemesh eina Elonbeth-hanan;

¹⁰ Arubbothwui (Sokohla Hepherla zangserlaga) Ben-hesed;

¹¹ Naphath-dorwui Ben-abinadab (Solomonwui naongalāva̱ Taphathli ana khuiya);

¹² Taanach, Megiddo kala Jezreelwui azingshong khalei, Zarethan ngalemwui Beth-shean katonga, kaja Beth-shean eina thuilaga Abel-meholah eina Jokmeam lākhashong shangshungda Ahiludwui nao Baana;

¹³ Ramoth-gileadwui (Manassehwui nao Jairwui kha̱ Gileadli khaleibing kala chiwui ngalemli khalei Argob, pithrai eina veiruihai khangavei kala phākho sākahai Bashanwui keinung hangtharuk zangda) kathāna Ben-geber;

¹⁴ Mahanaimli Iddowui nao Ahinadab;

¹⁵ Naphtaliwui (Solomonwui naongalāva̱ Basemathli khangakuma) Ahima-az;

¹⁶ Asher eina Bealothli Hushaiwui nao Baana;

¹⁷ Issacharli Paruahwui nao Jehoshaphat;

¹⁸ Benjaminli Elawui nao Shime-i;

¹⁹ Gilead ngaleili, chiya Amonnaowui awunga Sihonwui ram, kala Bashanwui awunga Ogwui ram, Uriwui nao Geber. Kala Judah ngaleili otva̱ akha lei.

Solomonna Tekmateilak eina Khamung

²⁰ Judah eina Israelwui mi shamadruwui situi yākhana; athumna phāshak phazāda ringphāda leisai.

²¹ Euphrates eina thuilaga Philistine vāshungda kala Egyptwui thari tāshungda wungram saikora Solomonna mungsai; kala athumna Solomonli shai mida awui mirin peida ali otram ngatha̱sai.

²² Solomonwui thangkhawui kashakazā: mathir khamanak kg. thingphāngā, sam kg. thingtharā,

²³ asā kakā mukkā tharā, wonui eina keimathao kahai sei maga̱, yao shākha, chili lāngda chao, sangai, seichui kala har kachungkha zanga.

²⁴ Kaja Tiphsah eina thuilaga Gaza vāshungda Euphrateswui zingtungshong khalei wungnao saikorali ana mungsai, kala awui kuikhamarei apam kachiva̱li mashitri eina leisai.

²⁵ Solomonwui thot peida Dan eina thuilaga Beersheba vāshungda Judah eina Israel kachichāwui drakhā yāmgui kala khaorātheilui vazāda mashitri eina okthuisai.

²⁶ Solomonwui siguigari shimen khavai siguishim thinghangmati kala sigui raimi thingtharāda khani leisai.

²⁷ Otvabing china kachāngchāngli Awunga Solomonwui kashakazā ngarānmi kala awuili rāphakazābing saikorawui vang mavātlakla ngarānmi.

²⁸ Kala kachichāli kaso kahai athishurda nāpaila, lanjila sigui kala raisiguiwui vang apampamli khuirāmi.

²⁹ Varena Solomonli thangkhamei, theikhuikathei awor hāngkhavai maleila mi, kala ningkahak shamadruwui situiyākha sangmida,

³⁰ Solomonwui thangkhamei zingshoshong kala Egyptshongwui mi saikorawui thangkhameili henmeikhara.

³¹ Kaja ana Ezrawui Ethanlila kala Maholwui naomayara Heman, Calcol, kala Darda athum saikoralila ana thangmameikhara; kala awui aming kazat yur saikorali ngayaovai.

³² Awui chānjam thingkathumla lei; kala awui laa thingkha apā phangā leisai.

³³ Lebanonli khalei Cedarthing eina thuilaga ngaveipheili khalei hara̱nā eina tangdali laa phoka; sāyur, vāyur, phara̱-pharā yur kala khai yurlila phoksera.

³⁴ Awui thangkhamei kashā mibing kala awungabingna okathui saikorawui eina Solomonwui thangkhamei anganai.