1 WUNGNAOBING 21 - Kathara Bible (BSI)

Nabothwui Yāmgui

¹ Chitharan Samariawui awunga Ahabwui keinung nganaili Jezreelpa Nabothna drakhā yāmgui akha leisai.

² Thangkha Ahabna Nabothli, “Nawui yāmgui hi han lingshai khavai milu, kaja hi iwui shimli nganailaka, hili phākhamei drakhā yāmgui akha ina mira; maningakha nana ningkachāng athishurda hiwui aman lupā einala mipaira.”

³ Kha Nabothna Ahabli hānga, “Ishāvā ngarāwui shimlui nali mikida Prohonala mamayāmana.”

⁴ Nabothna ali kahāng chiwui vang Ahabna malungvātta shilaga shimli unghaowa, kaja “Ishāvā ngarāwui shimlui nali mamimara” jihaowa. Ana petli ngayaisangda mai ngareifazanglaga zātla mazāmara jihaowa.

⁵ Kha apreiva̱̱ Jezebelna, “Khiwui vang naning chotlakhaoda maphazāmara jihaokhala?” da ngahāna.

⁶ Ana ngahānkai, “Ina Jezreelpa Nabothli, ‘Nawui yāmgui chi I lohaoga, chi maningakha ningkachāng drakhāthei yāmgui khangatei akha eina ngatha̱sa’ da kahāng eina ana, ‘Iwui yāmgui mamimara’ jihaowa.”

⁷ Apreiva̱ Jezebelna ali hānga, “Israelli nana khamung maningmala? Ngakarthuida phāshak phāzalu; ning mathānlu. Jezreelpa Nabothwui yāmgui chi ina khuimira.”

⁸ Apreiva̱na Ahabwui ming eina kala awui mahor namlaga Nabothna kapam keinungli khalei ararnao, wungnao chili chithi kapida chihovai.

⁹ Kala ana chithi chili hithāda hānga, “Kakhum eina seihā sākhavai chishātlu, mi zaikorawui mangāli Nabothli pam khamathāli chipamlu;

¹⁰ kala makhangatun mi khani ali kāroda pamngasaklaga ali makhamayā phenda ‘Nana Vare eina awungali khonshiya.’ da hāngngasaklu. Chiwui thili ali ayarli khuishokta lunggui eina horthathaolu.”

¹¹ Awui keinungli khalei ararnaobing kala wungnaobing china Jezebelwui kapi kahai tui thāda sai. Awui chithili kapi kahai thāda,

¹² athumna kakhum eina seihā kasā khui, kala Nabothli pam khamathā akhali chipama.

¹³ Makhangatuna mi khani china ali kāroda pama, kala Nabothli makhayā kaphen khuirāda yaruili hānga, “Nabothna Vare eina awungali khonshiya.” Chieina athumna keinungwui ayarli khuishoklaga lunggui eina horthathaowa.

¹⁴ Chiwui thili athumna, “Nabothli lunggui eina horthathaira” da Jezebelli pao mi.

¹⁵ Nabothli lunggui eina horthathaira kaji pao shākhaleoda Jezebelna Ahabli hānga, “Ngakarthuida lupā eina loga jilala mayorsangmara kaje Jezreelpa Nabothwui drakhā yāmgui chi akhuilu; kaja Naboth maringluimana, thihaira.”

¹⁶ Naboth thihaira kaji shākhaleoda Ahabna ngakarthuida drakhā yāmgui chi khuikhavai vai.

¹⁷ Chiwui thili Tishbewui Elijahli Prohowui tui china rāhānga,

¹⁸ “Thuilu, Samariali khalei Israelwui awunga Ahabli asamphanglu; yanglu, ana Nabothwui drakhā yāmgui khuikhavai chili leidalei.

¹⁹ Kala nana ali hānglu, Prohona hithāda hānga: ‘Nana sākathatla sāthathailaga kakhuila khuikahaila?’ Ali hithādala hānglu, Prohona hānga, ‘Nabothwui ashee fana malek kahaipam chili nawui asheela fana malekra.’”

²⁰ Ahabna Elijahli, “Nana ili rāsamphanghailuira jo, O iwui yangkashe?” da hānga. Ana ngahānkai, “Ina nali samphanghaira,” khikhalajila “Prohowui mikyanli makaphā ot sākhavai na khalatta yorzāhaira.

²¹ Yanglu, nawuitungli ina makaphā khuirāra; ‘Ina nali khuithuichaohaora, kala Ahabwui eina ningkakhānbingla, raobingla, Israelli khalei mayarnao saikora akhala mashokmara;

²² kala ina nawui shim Nebatwui naomayara Jeroboamli kasā thāda, kala Ahijahwui naomayara Baashali kasā thāda sāmira; khikhalajila nana ili malungvāt ngasaka, kala nana Israelli morei sāngasakhaowa.’

²³ Kala Jezebelwui pongli Prohona hithādala hānga, ‘Jezreelwui alungli fana Jezebelli shaira.’

²⁴ Ahabshi mi keinungli kathebing fana shaira; kala ashiwui mi khararli kathebing kazingramli yongkazata vānaona shaira.”

²⁵ (Jezebelna hāngkasothaoda, Prohowui mangāli makaphā ot sāda akhalatta yorkahai Ahab kathā mi maleilakmana.

²⁶ Israelwui eina kasham kahai Amonnaobingna kasā thāda, Ahabna meoma̱li phaningda ningkakachai ot sai).

²⁷ Ahabna tuibing hi kashā tharan awui kachon serkhaklaga aphasāli bora ngavai, kala khumda bora māngli pi, kala ning mashoklakla zata.

²⁸ Kala Tishbewui Elijahli Prohona hānga,

²⁹ “Ahabna iwui mangāli khayāshida ngahuiri kahai chi theila? Ili khayākashiwui vang, kalākashi hi awui thotli mashok ngasakmara; kha naothotli shokngasaknaora.”