1 WUNGNAOBING 19 - Kathara Bible (BSI)

Elijah Horehli Yāmkhavā

¹ Elijahna kasāsā, kala marānbingli ana kathāda raighai eina shaothatserhaokhala kaji pao saikora Ahabna Jezebelli unghānga.

² Chieina Jezebelna Elijahli pao chihovāda hānga, “Athum akhali nana shaokathat thāda inala nali akhama hitharan masamisi kaja varebingna theira.”

³ Chieina ana ngacheehaida mathi khavai Judahli khalei Beer-shebali yāmvai. Kala awui raoli chili ahaihaowa.

⁴ Amāng eina thangzatkha lamhāngli yāmvai, kala thingpompa̱ akhawui azingli apama; kala thingasak khavai ana hānga, “O Proho, hi shapshaphaira, ara imanglā khuimihaolu, kaja ila ishāvāngarāli maphāmeirarthura.”

⁵ Kala ana thingpompa̱ akhawui azingli ngayaisangda pikhavā eina, yanglu, kazingrao akhana ali sāza̱da hānga, “Thuiphazālu.”

⁶ Ana thuikhayang eina yanglu, akuishakli khamuikasā ngalungtungli parhaisai, kala tara̱ hamkha haisai. Ana chi thuizā-thuimanglaga pizangluishita.

⁷ Prohowui kazingrao china kakhane rāluishitta ali sāza̱da hānga, “Thuiphazālu, shongfa hirankha mazatthukpaishina.”

⁸ Ana ngakarthuida phāshak phazāda Varewui kaphung Horebli ngashun hangmati ngayā hangmatithang zangda vai.

⁹ Ana chili lungkhur akhali angasāmkhui, kala yanglu, Prohowui pao akha rāda ali hānga, “Elijah, na hili khi sali?”

¹⁰ Ana hānga, “Proho Ashangva̱wui Varewui vang ina sangaireoreo sai, kha Israelwui mibingna nawui tuingashit kaihaida hanphut sakathānhaowa, kala nawui marānbingla raighai eina shaothatserhaowa, ara imāng taikahaina; kala ilila athumna imanglā khuithui khavai ngarānda lei.”

¹¹ Ana hānga, “Mangāli vālu, Prohowui mangāli kaphungtungli kānganinglu.” Kala yanglu, Proho rārāsai. Masi panglāk eina phanda kaphungla kala lunghārla ngasheikhaihaowa; kha masilungli Proho mazangsamana. Chiwui thili neina̱ khanuka, kha neina̱ kakhanuklila Proho mazangsamana;

¹² neina̱wui thili mei chui, kha meilila Proho mazangsāmana; meikachuiwui thili nimshimri kahai akhonnao akha shai.

¹³ Akhon chi Elijahna kashā eina ana mai awui kachon eina fakhamlaga lungkhur chiwui zangkhavaipamli shoknganinga. Kala yanglu, ali akhon akha vaorāda hānga, “Elijah, na hili khi salikhala?”

¹⁴ Ana hānga, “Ashangva̱wui Proho Varewui vang ina zimarilak eina sai, kha Israelna nawui tuingashit kaihaida hanphutpamla herkathānmihaowa, nawui marānbinglila raighai eina shatthatserhaira. Imāngli taikahaina, kala athumna ilila imanglā khuithui khavai khangarān sāda lei.”

¹⁵ Prohona ali hānga, “Damascuswui lamhāngli latunglu, kala ungkashung chitharan, Syriawui awunga sākhavai Hezaelli tharchisinmira;

¹⁶ kala Israelwui awunga sākhavai Nimshiwui naomayara Jehuli tharchisinmira; kala Abel-meholahli khalei Shaphatwui naomayara Elishali nawui mahut marān sākhavai tharchisinmira.

¹⁷ Kala Hezaelwui raighaiwui eina yāmkashokbingli Jehuna shaothatra; kala Jehuwui raighaiwui eina yāmkashokbingli Elishana shaothatra.

¹⁸ Chithālala Israelwui alungli, Baalli khuktida makhorumlak kaje, kala khamor mangasunlak kaje mi thingshini haisara.”

Elishali Kaho

¹⁹ Ana khaung eina Shaphatwui naomayara Elishana mukkā tharāda khani shimenlaga seiot khuisai. Elijahna ngalemli vālaga Elishawuitungli awui kachon afarora.

²⁰ Chieina awui sei horhaida Elijahli shurvāda hānga, “Ishāvā eina ishāva̱li mai ungngasunkhuiga, laga nali shurnaoga.” Ana hānga, “Ungkhalailu, ina nali khi sāhaokhala?”

²¹ Chieina ana latunglaga sei chi taithata kala okkaithing eina mei sālaga asā chi hangkhuida mi saikorali mishai. Chiwui thili Elijahli shurzatta sheba sāmi.