1 WUNGNAOBING 18 - Kathara Bible (BSI)

Elijah kala Baalwui Marānbing

¹ Atam kasāngkha shānglaga, Prohowui tui china Elijahli rāhānga, “Ahabli asamphanglu, ina okathuili kazing rotā ngasakra.”

² Chieina Elijahna Ahabli asamphang khavai vai. Chitharan Samariali zāt kasak kateokha maningmana.

³ Kala Ahabna awui shimkhur kashina Obadiahli hokhui. (Obadiah hiya Proholi khangacheeya mina;

⁴ Jezebelna Prohowui marānbingli shaokathat tharan Obadiahna marān shākhali, hangphangāngā eina lungkhurli thumhaida kashakazā mizā mimanga).

⁵ Ahabna Obadiahli hānga, “Vālu, ura̱pam kala seizat khalei apam kachiva̱li vāyanglu, apam kaikhali seizat leisālapai chithāda sigui, gadhā ringngasakta sha̱kei keikhava mashimānmara.”

⁶ Anina vāki kaji lam ngayarlaga Ahabna akhashong vai kala Obadiahna khangatei akhashong vāhaowa.

⁷ Obadiahna zatta leilakha yanglu, Elijah ali rāsamphanga; kala ali azak machutta, Obadiahna ngakhumsangda hānga: “Na amei Elijahla?”

⁸ Ana ngahānkai, “I Elijahna, ‘Elijah hili leili’ da nawui akhavāli ahānglu.”

⁹ Ana hānga, “Ina khi khayon sahaoda chiwui vang narao ili shaothat khavai Ahabwui pāngli horsangmiga kajikhala?

¹⁰ Nawui Proho Varena theida lei, wungram kachida kala yur kachiva̱wui ngachaili ishāmeina nali maphāvā khangasak apam maleimana; kala athumna ‘A maleimana’ da kahāng wungram kala yur kachiva̱li nali masamphangmana da shākhi sāngasaka.

¹¹ Laga nana kathāda ‘Nameili “Yanglu, Elijah hili leili” da unghānglu kajikhala.’

¹² I unghai khaleoda Prohowui manglāna nali khuithuihaikha na khaleipam ina matheimara; chieina Ahabli ungkahāng chitharan na maleisaakha, ina nganuilakha eina thuida Proholi ngacheelala, ana ili sāthathaora,

¹³ Jezebelna Prohowui marānbingli shaokathat tharan, marān shākhali ina thumhaida hangphangāngā eina lungkhurli thumhailaga khamui mizai, kala tara̱ mimanga kaji ameili khipānakha mahāngmala?

¹⁴ Laga ara nana vāda nameili, Elijah hili leilida awungali unghānglu kachi hiya; ana ili sāthathenhaora.”

¹⁵ Elijahna hānga, “Ashangva̱wui Prohona theira, awui mangāli ina kahāngna kaja, makahatlakla aja ina ali chitheira.”

¹⁶ Chieina Obadiahna Ahabli ungsamphangda hānga; kala Ahabna Elijahli samphang khavai vai.

¹⁷ Ahabna Elijahli kathei eina “Israelli khanang khangasaka, chi nala?” da ali hānga.

¹⁸ Ana ngahānkai, “Ina Israelli makhanang ngasakmana; kha na kala nashi shimkhurnana, kaja nashina Prohowui ningkhami mamayonla Baalli shurthui kahaiwui vangna.

¹⁹ Chiwui vang eina, Israel saikora iwui vang Carmel Kaphungli kazipkhuimilu, kala Jezebelwui tableli phazākhangarum Baal marān shāmati hangphangā kala Asherwui marān shāmati chila kazipkhuimilu.”

²⁰ Chiwui vang Ahabna Israelnaobing kala marān saikora ngarumda Carmel Kaphungli kazipkhuisera.

²¹ Elijahna mibing saikorawui ngalemli vāda hānga, “Tuipong khaniwui ngachaili, kachipa khamashungakhala da nathum karankha ngayeifarakhala? Proho hi Varena jiakha, ali shurlu; kha Baalna jiakha ali shur jilu.” Chili mibingna khikhala mangahānkāthuwa.

²² Chieina Elijahna mibingli hānga, “Prohowui marān ngachaili imāng taihaili; kha Baalwui marān shāmati hangphangā leili.

²³ Mukkā khani ithumli khuirāmiranu, athumna athumwui vang akha kapang khuiranu, sāmalim sālaga thingtungli semhairanu, kha mei mathotpaimara. Mukkā akhapa chi ina sālaga thing semkahai chili haira, kala mei mathotmara.

²⁴ Laga nathumla nathumwui vareli ngakaolu, ila iwui Proho mingli ngakaora; mei eina ngahānkākhame chi Varena.” Mi saikorana, “Mashunglak eina hānghaira” da ngahānkai.

²⁵ Chieina Baalwui marānbingli Elijahna hānga, “Nathum mukkā akha kapangkhuilaga rida khangarān sālu kaja nathum chungmei; kala nathumwui varewui mingli polu, kha mei mathotpaimara.”

²⁶ Athumli khami mukkā chi khuida khangarān sai, kala ngathor eina thuilaga ngashunlung eina tangda Baalwui mingli mingzaida, “O Baal, ithumli ngahānkāmilu!” da ngakaowa. Kha akhon mashāthuwa, kala khipānakha mangahānkāthuwa. Athumna hanphutpamli ngalongkachupama.

²⁷ Kazing khangashun eina Elijahna mana̱shida hānga, “Pangda vaolu, kaja a vare akhana, ringphāpam kahailapai, chi maningakha kalikha vākahailapai, maningakha kha̱ram vākahailapai, kapila pihaiphāphālapai, mathotkhui phalungki kajili tai.”

²⁸ Athumna panglāk eina ngakaowa, raighai eina, kazei einala, athumwui khangachā athishurda athum khalatta asā reokazamda asheela ngayaringring shoka.

²⁹ Kazing makheiuda, pha̱kaphayā atam eina tangda athumna vaotaraiya, kha akhonla mashāmana, khipānakha mangahānkāmana, khipānakha mahengsangmithuwa.

³⁰ Chieina Elijahna mi saikorali, “Iwui ngalemli rāserlu” da hānga; mi saikorana awui ngalemli vai. Kala sākathān kahai Prohowui hanphut chi ana semkhuiluishita.

³¹ Prohona, “Nali Israel hora” da hāngkahai Jacobwui naomayarabingwui shang tharāda khaniwui thishurda Elijahna ngalung tharāda khani khui;

³² kala ngalungbing chieina Prohowui mingli hanphut akha sākhui. Kala hanphut kuimareida tara̱ liter tharāda mati sha̱kha kazang akhur chuikhui.

³³ Chiwui thili ana thing chi ngachamda hailaga sā chi marimrim eina thingtungli parhai. Kala, “Tara̱ham mati chipuikhuilaga rikkatā kachigat kala thing chili heirorlu” da ana hānga.

³⁴ Ana hāngluishita, “Kakhane sāda heirorluilu,” chieina athumna kakhanela salui. “Kakathumala heirorluilu” da hānga, kala athumna kakathumala sai.

³⁵ Hanphut kuimareida tara̱ chi longtha̱da akhur chuikahai chila pemhaowa.

³⁶ Ngazin pha̱kaphayā atam ungkashung eina marān Elijahna hanphut ngalemli vanganingda hānga, “O Proho, Abraham, Isaac, kala Israelwui Vare, aja na Israelwui Varena kaji, kala I nawui raona kaji, kala ina kasāsā hi nawui tuina kaji aja zimik theikhuiranu.

³⁷ Ili ngahānkāmilu, O Proho, ili ngahānkāmilu, chieina mibing hina, O Proho na Varena kaji, kala athumwui wuklungla nana ngareithui ngasak kahaina kaji theiranu.”

³⁸ Chiwui thili Prohowui eina mei tāda rikkatā kachigat sāla, thingla, ngalungla, chifala chuikhup tāhaowa; kala leikhurli kazang tara̱ chila ngachakreohaowa.

³⁹ Chi theilaga mibingna ngakhumshāmhaida “Proho a hi Varelaka; Proho a hi Varelaka” da hānga.

⁴⁰ Elijahna athumli hānga, “Baalwui marānbing chi tukkhuiserlu, athum akha eina tangda mayāmshokpaimara.” Chieina athumna tukkhuisera; kala Elijahna athumli Kishonkongli khuitāda ashaothatserhaowa.

Kazing Kakāng Kakup

⁴¹ Elijahna Ahabli hānga, “Ungda ungphazā ungphāshakulu, kaja kazing kharokhon shāhaira.”

⁴² Chieina Ahabna phāshak phazā khavai unghaowa. Kala Elijahna Carmel Kaphungtonli kālaga amai ngaleili ngakhumzangda amai khuksao khaniwui ngachaili haipama.

⁴³ Awui raoli, “Ngayivāk thuingashānyanglu” da hānga. Rao china shokngashānyanglaga hānga, “Khikha matheimana.” Kha ana hangluiya, “Shini shida shokngashānluilu.”

⁴⁴ Kashineli ana hānga, “Yanglu, muiyānao pangmayā rikkha shamadrutungwui eina kārārāli.” Elijahna hānga, “Ahabli, ‘Nawui siguigari khangarān sāda ungulu, zingrotna maungpaipaishina’ da ahānglu.”

⁴⁵ Kasha̱khawui alungli kazingram chi muiyā eina masina zikhaowa, kala kazing marlak eina rohaowa. Ahabna sigui tongphungda Jezreelli unghaowa,

⁴⁶ Prohowui pāngna Elijahli ngasomida, awui shānneira̱ neikhuilaga Jezreel ungshungnanai Ahabli ungngaphankhui.