1 WUNGNAOBING 14 - Kathara Bible (BSI)

Jeroboamwui Naomayara Kathi

¹ Hithāda leilakha Jeroboamwui naomayara Abijahli kazāhaowa.

² Kala Jeroboamna apreiva̱li hānga, “Ngakarthuilu, Jeroboam preiva̱na da mathei khavai azak ngacheikhuida Shilohli vālu; kaja, ina awunga sāda mibingli mungra da hāngkhami marān Ahijah chili leida lei.

³ Khamuitang tharā, ngankakhui khamui kateokha kala khuira̱ hamnaokha da khuivāmilu; nao hili khishokrakhala kaji ana hāngmira.”

⁴ Jeroboam preiva̱na chithāda sāda Shilohli vai; kala Ahijahwui shimli azanga. Chitharan Ahijah sarhaida mik māmāchā eina khikha matheilakmana.

⁵ Ahijahli Prohona hānga, “Yanglu, Jeroboam preiva̱na, ashinao kazāhaoda chiwui vang nali ngahan khavai rārāda lei. Nana ali hithāda hānglu.” Ana vākashung chitharan khangatei preinao sākhaningda vai.

⁶ Kha Ahijana awui pheikhon shāda, ana khāmongli rākashung eina ana hānga, “Zanglu, Jeroboamwui preiva̱, khisāda mi katei sakhaning kajikhala? Kaja nali hāngmi khavai kachungkha lei.

⁷ Jeroboamli unghānglu, Proho Israelwui Varena hithāda hānga: ‘Khikhalajila mibingwui eina nali kapangkhuida Israel mibingwui kathāna sāngasakhaira;

⁸ kala Davidwui wungram eina ngakaikhuida nali mihaira; chithālala iwui rao Davidwui thāda nana iwui ningkhami mamayonmana, kala ningtongda iwui thi mashurmana, kala mashun chi masāmana,

⁹ kha nawui mangāli leikasābingli zakshimeida sai, na khalattawui vang kameo khangatei sākhui, meoma̱la sākhuida ili malungvātngasaka, kala ili na khanukli haihaowa;

¹⁰ chiwui vang eina yanglu, ina Jeroboamwui shimkhurli makaphā khuiramida, ningkhān eina okathuibing kala rao, khaniniwui mayarnao kachiva̱ katathaora; kala seipai machuitakupranglakha eina tangda rikkatā thāda Jeroboamwui shimkhur mutchaohaora.

¹¹ Jeroboamshiwui mi keinungli katheli fana shaira; kala lamli katheli khamasaili yongkazata vānaona shaira: kaja hi Prohona hāngkahaina.’”

¹² “Chieina ngakarthuida shimli ungulu. Naphei keinungli ungnaisangkhaleoda nao chi thihaora.

¹³ Israelna awui vang chapngachāda ali chifara, kaja Jeroboamwui eina amāngli chikhurli chifara; kaja Jeroboam shimkhurli Israelwui Proho Varewui mangāli awuili ningyāngkhaung samphanga.

¹⁴ Chili lāngda, awui mahut Israelwui awunga akha Prohona phākhuida aja Jeroboamwui shimkhur katathaora. Hiwui eina thuida

¹⁵ tara̱lungli titi khanganuk thāda Prohona Israelli mutngasakhaora, kala athumwui avāva̱ ngarāli khami khamathā ngalei chiwui eina phurshokhaora, kala athumli Euphrates kānda khamathā ngalei chiwui eina yaoyānghaora, khikhalajila athumwui Asherim china Proholi malungvātngasakhaowa.

¹⁶ Kala Jeroboamna morei sālaga ana Israelli morei sākhangasakwui vang, Israelli horhaora.”

¹⁷ Chiwui thili Jeroboam preiva̱na ngakarthuida Tirzahli latunga. Kala ana khāmongli ungkākhaleoda nao chi thihaowa.

¹⁸ Kala Prohowui rao Ahijah marānna hāngmi khangasak thāda chifahaida awui vang chapngachai.

Jeroboam Kathi

¹⁹ Jeroboamna kathāda rai sā, kathāda mungsā kaji saikora Israel Awungabingwui Thotrinchān lairikli kapiserhaida lei.

²⁰ Jeroboamna khamung kum maga̱da khanina; a thihaowa kala anaomayara Nadabna awui thili munga.

Judahwui Rehoboam Awunga

²¹ Chitharan Solomonwui nao Rehoboamna Judahli mungsai. Rehoboam zingkum hangmati da akha kākashung eina mungphoka, kala Israel shang saikorawui eina, Proho mingwui vang ana kapangkhui kahaiya Jerusalem keinungli kum tharāda shini munga. Ava̱va̱li Naamah hoi, Ammonlāna.

²² Avāva̱ ngarāna morei kasāli mataimeida Judahna Prohowui mikyanli makaphā kasāwui vang ali yuikashiwui malung thuingasaka.

²³ Kaja, athumna kajujuipamli shim sakai, ngalung shoma, kala kaphung kajui kachiva̱li kala khamatek thingphei kachida Asherim sakai.

²⁴ Kala ngalei chili kameoshimwui khayora mayarnaobing eina tangda leisai. Israelnaobingwui mangāli Prohona kasham kahaiya miyurbingwui ningkakachai otsak saikora chi tākam eina athumla sāpapama.

²⁵ Awunga Rehoboamna mungda kaphangā kum, Egyptwui awunga Shishakna Jerusalem rakaida,

²⁶ Prohowui shimli kahai lan, awungawui shimli kahai lan, khalalei kachiva̱ pongkhuida khuithuihaowa. Kala Solomonna sākakhui sinā chāngvei chila khuithuiserhaowa;

²⁷ chiwui mahut pithrai eina sākhuilaga awunga Rehoboamwui kakaso thishurda awunga shim khāmong khamayona otvabingwui pāngli horsangmi.

²⁸ Kala awungana Varewui shimli kazang kachida khamayonbingna chi phungzanga, kala mayon khavai shimli khuiunghahai ji.

²⁹ Rehoboamwui kasāsā saikora Judah Awungabingwui Thotrinchān Lairikli makapiserhaimala?

³⁰ Rehoboam eina Jeroboamna rai ngarar ngarokchinga.

³¹ Rehoboam thihaida avāva̱ ngarāwui thāda Davidwui keinungli chifahaowa. Ava̱va̱li Naamah hoi, Ammonlāna. Awui pamli anaomayara Abijamna thuimunga.