1 WUNGNAOBING 12 - Kathara Bible (BSI)

Atungshongbing Kaikathui

¹ Rehoboamna Shechemli vai, kaja Israel saikorana ali awunga sangkhavai Shechemli vāserhaowa.

² Nebatwui naomayara Jeroboamna pao chi kashā eina (kaja a atam chili Egyptli leisai, kaja awunga Solomonwui eina chili ayāmngayin kahaina), chieina Jeroboamna Egyptwui eina latunga.

³ Athumna mi chihoda alila ahokhui; Jeroboam kala Israelwui kazip saikora Rehoboamli asamphanga.

⁴ “Navāna ithumli kharita ot chiphuna; chiwui vang ara navāwui kharita otphun kala kashai chi ngaveng ngasakakha ithum nali otram ngatha̱mipapamra” da athumna hānga.

⁵ Ana hānga, “Kathumthangwui vang ungsālu, kala rāluinaolu.” Chieina athum thuihaowa.

⁶ Chiwui thili Awunga Rehoboamna avāva̱ Solomon ringlakha leikasā khararnaobingli ngasanda “Mibing hili ngahānkā khavai nathumna ili khi sāngasakngaikhala?” da ngahāna.

⁷ Athumna hānga, “Nana aja mibing hili rao akha sāda athumli otram ngatha̱akha, kala athumli ngahankakā chitharan khamathā tui eina hāngakha athumna nawui rao sāchingra.”

⁸ Kha khararnaobingwui tui horhaida awui rarkākharum awui ngasotnaobingli ngasanlui.

⁹ Kala hithāda hānga, “'Ithumli nashāvāwui kharita otphun chi khangaveng ngasakmilu’ da ili rākahāngbing chili, ngahānkā khavai nathumna ili khi hāngrakhala?”

¹⁰ Ali rarkākharuma awui ngasotnaobing china hānga: “‘Navāna ithumli kharita ot chiphuna, kha ara nana ithumwui vang ngaveng ngasak milu’ da kahāngbing chili hithāda hānglu, ‘Ishāvāwui kashānli iwui ngangpairi reimei!

¹¹ Ishāvāna nathumli kharita ot chiphuna, ara ina ritmeida chiphunra. Ishāvāna lijei eina ngaphita, kha ina seithat eina hāngmachinra’ da hānglu.”

¹² Chieina “Kakathumathang iwuili rāluinaolu” da awungana hanghaokada Jeroboam kala mi saikora kakathumathang Rehoboamwuili vai.

¹³ Kala khararnaobingna rakkachithei makhuisangla, awungana

¹⁴ ngasotnaobingwui tui khuida sāshilak eina ngahānkāda hānga, “Ishāvāna nathumli kharit ot chiphuna, ina ritkhamei chiphunra; ishāvāna lijei eina hāngmachina, ina seithat eina hāngmachinra.”

¹⁵ Chithāda awungana mibingli manganāsangmithuwa; kaja Prohowui tui chi Nebatwui nao Jeroboamli Shilohnao Ahijahli hāngmi khangasak chi ungshung khavai hi rashok khangasakna.

¹⁶ Athumwui kapo chi makhuisangkhami theilaga Israel saikorana awungali hānga, “Davidshiwuili ithumwui yar khi leikhala? Jessewui naomayarawuili ithumna shimlui samphangkharān maleimana. Kachichashiwui shimli ungulu, O Israel! David, nala nasasakulu.” Chieina Israelnaobing kachichā shimli ungserhaowa.

¹⁷ Kha Judahwui keinungli kapama Israelnaobingwuitungli Rehoboamna munga.

¹⁸ Chiwui thili thoukai ot kasāli kashina Adoramli Awunga Rehoboamna chihokhavā eina ali Israel saikorana lunggui eina horthathaowa. Kala Awunga Rehoboamna ngalāngda siguigari tonglaga Jerusalemli yāmunghaowa.

¹⁹ Chiwui vang aja eina tangda David shimkhurli Israelnaona ngakaikashina.

²⁰ Jeroboam latunghaira kaji Israelnao saikorana kashā eina, ali hokhuida Israelwui awunga sāngasaka. Judah shang maningla Davidwui shimkhur khipākha mashurlakthuwa.

Shemaiahwui Khamarān

²¹ Rehoboamna Jerusalemli khaung eina, Judah shimkhur saikora kala Benjaminshi shangnao zangda Israel shimkhurli ngararlaga Solomonwui nao Rehoboamwui wungram hankhui khavai rai kapingbing lakhkha thinghangchishat kazipkhui.

²² Kha Varewui mi Shemaiahli Varena rāhānga:

²³ “Solomonwui nao Rehoboam, Judahwui awunga kala Judah eina Benjamin, kala khangateibinglila ahānglu.

²⁴ ‘Prohona hithāda hānga, nachinā ngarā Israelwui mibingli rai ngarar khavai mavālu, kaja hi ina khangarānna, kachichā shimli ungserulu.’” Athumna Prohowui tui khuisangda ana kahāng athishurda shimli ungserhaowa.

Jeroboamna Proho wui eina Ngareikathui

²⁵ Chiwui thili Ephraim kaphungramli khalei Shechemli Jeroboamna raipan sākhuida chili pama; chiwui eina Penuel vāsākai.

²⁶ Kala Jeroboamna awui ningli, “Wungram hi Davidshi shimkhurli hanunghaipai;

²⁷ mibingna Jerusalemli vāda Prohowui shimli vapha̱phayaakha, athumwui akhavā, Judahwui awunga Rehoboamli mibingwui mai ngareiunghaora; kala ili sathathailaga Judahwui awunga Rehoboamli hanunghaihenura” da phaninga.

²⁸ Chieina awungana ngasanlaga sināwui seinao khani sākhui, kala ana mibingli hānga, “Jerusalemli nathumna kakā hi tānai. O Israelnaobing! Egyptwui eina nathumli thānshokkhame nathumwui varebing hili yanglu.”

²⁹ Kala ana Bethelli meoma̱ akha, kala meoma̱ akhapāna Danli haimihai.

³⁰ Mibingna Bethelli khorumkhashi, Dan eina tangdali vāda akhorumkhashi kajiwui vang hi moreiwui ot sāthuihaowa.

³¹ Ana kaphung kajujuili kameoshimla sākhui, kala khangatei Levi makhaningbinglila pāngmon kachungkha kapangsanga.

Bethelli Khokharum Khayon

³² Judahwui phanit thāda, kachāng kachishatwui zimiksho tharāda kaphangāthang Jeroboamna phanit akha sāngasaka; kala ana hanphutpamli pha̱kaphayā chigata; kala ana sākakhui seinao chili Bethelli pha̱phayai. Ana Bethelwui kajuipam chiwui vang pāngmon kapangsanga.

³³ Bethelli ana hanphut sakā kahai chili akhalattawui ningli machukping kahaiya kachāng kachishatawui zimiksho tharāda kaphangāthang kai; kala Israel mibingwui vang phanit akha chili samida ana nganamkaphā rikkhavai hanphutpamli kai.