1 WUNGNAOBING 11 - Kathara Bible (BSI)

Solomon Tākatung

¹ Chitharan Awunga Solomonna ngalei khangateiwui sha̱nao kachungkhali leishi. Pharaohwui naongalāva̱, kala Moab, Ammon, Edom, Sidon, kala Hitla,

² yurbing hiwui pongli Prohona Israelwui mibingli “Nathum athumli ngalā mangakhotalu, athumla mangakhotaranu, kaja athumna nathumwui ning athumwui varebingli shurngasakhaora” da hānga. Solomonna leishida hikathāli ngavapshanhaowa.

³ Ana apreiva̱, wungnaolā shāshini, kala angashirva̱ shākathum leisai; kala apreiva̱ ngarāna awui ning ngachei ngasakhaowa.

⁴ Kaja Solomonna sārkahai tharan apreiva̱ ngarāna awui ning ngachei ngasakta vare khangateiwui thi shurngasaka; kala avāva̱ Davidwui ning thāda awui Proho Vareli ningtongda maphaningthuwa.

⁵ Kaja Solomonna Sidonnaobingwui kameo philava̱ Ashtorethli, kala Ammonbingwui ningkakachaiya Milcomlila shurthuihaowa.

⁶ Chithāda avāva̱ Davidna sākahai thāda ningtonglak eina Proholi maphaningla, Solomonna Prohowui mangāli makaphā ot sai.

⁷ Kala Solomonna Jerusalemwui zingshoshong khalei kaphungtungli Moabwui ningkakachaiya Chemoshli khorum khavai shim sakai.

⁸ Yur katei kakhui apreiva̱ ngarāwui vang ana hithāda sāmihaoda athumna chili nganamkaphā rikkatā kala athumwui vareli pha̱kaphayā ot sai.

⁹ Solomonna Prohowui eina mai ngareithui kahaiwui vang ali khanishida rākachithei Proho Israelwui Vare malungvāthaowa.

¹⁰ Vare khangateili mashuralu kajiwui pongli ali kakaso mihaisai; kha Prohona kakaso chi ana mamayonthuwa.

¹¹ Chiwui vang Prohona Solomonli hānga, “Iwui tuingashit kala kaso kahai shiyan chikan mamayonla nawui kaphaning eina vaira jihaola, ina nawui wungpam ngakaikhuida nawui raoli mihaora.

¹² Kha navā Davidwui vang eina nawui thotli mashokmara, kha nanaowui thotli ngakaimihaora.

¹³ Chithālala ina wungram saikora mangakaishokmara, kha iwui rao Davidwui vang kala ina kapangkhui kahai Jerusalemwui vang shang akha nanaoli mira.”

Solomonwui Yangkashebing

¹⁴ Edom awungashi shangli kapharā Hadadli Prohona Solomonli thuiyangshi ngasaka.

¹⁵ Kaja Davidna Edomli leilakha, raithāna Joabna raili thikahaibingli akaphum chitharan Edomwui mayarnao katonga sāthathairasai

¹⁶ (kaja Joabna thānda Israel saikorana Edomwui mayarnao katonga mashaothatranglakha eina tangda kachāng tharuk apama);

¹⁷ kha Hadadna nganuisāhaoda avāva̱wui rao Edomwui mi kaikhali ngasoda Egyptli yāmvāhaowa.

¹⁸ Athumna Mideanwui eina zatlaga Paranli vāshunga, kala Paranwui eina athumli ngaso khavai mi khuiphunglaga Egyptli Pharaohwuili vai; Egyptwui awunga Pharaohna lamla, shimla, kashakazāla mi.

¹⁹ Pharaohna Hadadli lumlak kahaiwui vang apreiva̱ Tahpeneswui agatuiva̱li ngakum ngasaka.

²⁰ Kala Tahpeneswui agatuiva̱na Genubath kaho mayarnao akha pharākhuida Tahpenesna Pharaohwui keinungli nganaokai; Pharaohwui naomayarali ngasoda Genubathna awungawui shimli pama.

²¹ Kha Hadadna Egyptli leilakha, David thihaira kala raimi kathāna Joabla thihaira da kashā eina, Hadadna Pharaohli hānga, “Iramli latung khavai khamayāmilu.”

²² Kha Pharaohna ali hānga, “Nali ina khi vātmihaoda naram unguga kajikhala?” Kha ana hānga, “Ili ungngasakmilu.”

²³ Zobahwui awunga Hadad-ezerwui eina yāmkahaiya, Eliadawui naomayara Rezonlila Varena Solomonli yangshi ngasaka.

²⁴ Davidna aram yaithat kahaiwui thili ana mi kazipkhuilaga Damascusli apama, kala ali chili awunga sanghaowa.

²⁵ Hadadna sheikakhaut thāda, Solomonwui atamli anala Israelli yangshilaka, kala ningkachailaka. Ana Syriali mungsai.

Jeroboamli Varewui Ngashitkhami

²⁶ Zeredahli khalei Ephraimpa, Solomonwui rao rākasa, ra̱meiva̱ Zeruahwui nao Jeroboamla awungali thuingakaishihaowa.

²⁷ Ana awungali makhamayāwui pong chi hithai. Solomonna Millo semkakā tharan, avāva̱ Davidwui keinung chi saphinhaowa.

²⁸ Jeroboam kaho hi sāshapa mi akhana, awui khamarek chi theilaga, Josephshiwui thoukainao katongali ali yangngasaka.

²⁹ Atam chili Jeroboamna Jerusalemwui eina kashok chitharan Shilohwui marān Ahijahna ali shongfali samphanga. Chitharan Ahijahna kachon kadhar ngavaisai; kala ram chili animang samphanga.

³⁰ Chieina Ahijahna awui kachon khangavai chi khuilaga akai tharāda khani sāda serkhāka.

³¹ Kala ana Jeroboamli hānga, “Nawui vang akai tharā khuilu; kaja Proho Israelwui Varena hithāda hānga, ‘Yanglu, Solomonwui wungram ngakaishokta nali shang tharā mira,

³² (kha iwui rao Davidwui vang kala Israel shang saikorawui eina ina kapangkhui kahai Jerusalem keinungwui vang shang akha ana samphangra),

³³ khikhalajila ana ili horhaida, Sidonwui varebing Ashtorethli, Moabwui vare Chemoshli, kala Ammonwui kameo Milcomli khorumhaowa, kala iwui kahāng manganāmana; kala avāva̱ Davidna kasā thāda iwui shiyan-chikan kala ain mamayonla, iwui mikyanli khamashung chi masāmana kala iwui ningkhami mamayonmana.

³⁴ Chithālala, wungram katonga awui pāng eina makhuithuimara; kha ina kapangkakhui iwui rao Davidna iwui shiyan-chikan kala ningkhami khamayonwui vang, awui thotli awunga sāngasakpapamra;

³⁵ kha anaomayarawui pāng eina ina shang tharā khuimihaida nawui pāngli horsangmira.

³⁶ Chithālala awui naoli shang akha mira, kaja iwui ming leiching khavai ina kapangkhui kahai Jerusalemwui keinungli Davidwui thaomei akha sharhaiching khavaina.

³⁷ Nali ina singmida nana ningkachāng eina tangda mungra, kala nana Israelwuitungli awunga sāra.

³⁸ Ina nali kakaso saikora chi nana mayonakha, kala iwui kahāng nganāda iwui rao David thāda iwui shiyan-chikan, ningkhami mayonda khangarong ot saakha, ina ngasomichingra, kala Davidwui shimkhur sākhami thāda nawui shimkhurli ina sakāmikachangkhatra, kala ina Israel hi nali mira.

³⁹ Kala chiwui vang Davidwui ara̱-azāli khanang ngasakra, kha chi mathā ngasakchingmara’” jihaira da hānga.

⁴⁰ Chiwui vang eina Solomonna Jeroboamli sāthat khavai ngarāna; kha Jeroboamna Egyptwui awunga Shishakwuili yāmvāhaowa, kala Solomon mathiranglakha eina tangda Egyptli pama.

Solomon Kathi

⁴¹ Solomonwui otsak, ana kasāsā kala awui thangkhamei Solomonwui otsak lairikli makapiserhaimala?

⁴² Jerusalemwui eina Israelli Solomonna khamung zingkum hangmatiya.

⁴³ Solomon thikahai eina avāva̱ Davidwui keinungli chifahaowa; kala anaomayara Rehoboamna awui mahut thuimunga.