1 WUNGNAOBING 10 - Kathara Bible (BSI)

Shebahwui Awungva̱ Kharā

¹ Chitharan Shebawui awungva̱na Solomonwui aming kazat kala ana Proholi khangavapwui pongli shāuda kasasaka tui atamyanga.

² Nganamkaphā thao, sinā, kasaka ngalung, ut kachungkhana phunglaga ali khangaso mi kachungkha thānphungda ana Jerusalemli vai; kala awui kaphaning saikora Solomonli ahānga,

³ Awui khangahān saikora Solomonna khangathum maleilakla ngahānkāmisera; khangahān saikora awungawui vang kasak khikha maleisāmana.

⁴ Shebawui awungva̱na Solomonwui thangkhamei, awui shim sākahai,

⁵ awui kashakazā, akhavābingwui pamkhavai, raobingna otram khangatha̱, athumwui sāri, awui khorkhong singmebing kala Prohowui shimli rikkatā kachigat, saikora chi theilaga awungva̱ khakshingakhaowa.

⁶ Ana awungali hānga, “Nawui otsak kala thangkhamei pao iramli leilakha kashā chi mashunga,

⁷ kha ikhalattawui imik eina marātheiranglakha mashitsangsāmana; kala yanglu, ara rātheilaga, athumna kahāng chiya tangkhaila makāshungmana; nawui thangkhamei reikasang hi kashāli langmei.

⁸ Nawui ngalemli pamda nawui thangkhamei tui kashā samphangching kaje napreiva̱̱ ngarā, nawui raobing kalā khamahai!

⁹ Nali ngahānngailak eina Israelwui awunga sākhangasaka nawui Vare Proholi sochikatranu! Khikhalajila Prohona Israelli katang mavaila leikashiwui vang mashun kala khangarong eina bichar sāmi khavai nali awunga sāngasakhaira.”

¹⁰ Chiwui thili ana awungali sinā kg. thingmati, nganamkaphā thao kachungkha, kala aman kasaka ngalung yur kachungkha chigata; Sheba awungva̱na awui chiyākha Awunga Solomonli rākachigat thāda marāluilakmana.

¹¹ Chili lāngda, Ophirwui eina sinā khuikharā Hiramwui jahasbing china almug thing, aman kasaka ngalung yur Ophirwui eina kachungkha khuiungmi.

¹² Almug thing chi Prohowui shim kasāli kala awui shim kasāli pākra̱ savai; kala laa kasābingwui sipa̱, tingteilā chieina sākhui; hikathā almug thing khuikharā kala kathei aruihon masamphangthura.

¹³ Awunga Solomonna Sheba awungva̱na kapoli lāngmeida awui ningkachāng saikora misera. Chiwui eina awui raobingli thānlaga aramli latunghaowa.

Solomonwui Lan

¹⁴ Kumkhali Solomonna sinā samkaphangwui kharit kg. thingmaga̱da kathumna,

¹⁵ chili lāngda leihkhalonbingwui eina, jahaswui eina, Arabia awunga saikorawui eina, kala lammungabingwui einala sinā samphanga.

¹⁶ Awunga Solomonna sinā eina shaokakhui chāngvei kahaka shākhani sākhui; chāngvei ava̱va̱li sinā kg. shini sha̱kha zanga.

¹⁷ Kala sināwui eina shaokakhui chāngvei shākathum sākhui, kala ava̱va̱li sinā kg. kathum zanga. Saikora chi Lebanon Ngahong Shim chili haisera.

¹⁸ Awungana mafahāwui wungpamkhong kahakva akha sākhuilaga mathāmeikap kaji sinā heirormita.

¹⁹ Wungpamkhong chiwui phei chonkhavai tharuk lei, kala akhanukshong seikui sāsanga; uishong yāshong pangpo kāthathui, kala kazingkha̱ khani khaninga,

²⁰ kazingkha̱ tharāda khani, pheichon chiwui ayar ayarli akharip khaninghai. Hikathā ot wungram khangateili masālakranga.

²¹ Awunga Solomonwui mangkhavai tengkot saikora sināmāng eina sai, kala Lebanon Ngahong Shimli mangkhavai tengkot sinā kachangamāng eina sai; lupāsā eina kasem mazanglakmana, kaja Solomonwui thotli lupāsā hi kasaka otna da makhuimana.

²² Kaja awungawui jahas ngashingkha Tarshishli Hiramwui jahas ngashingkhali ngasoda leisai. Kum kathumthumwui alungli akha shida Tarshishwui jahas ngashingbing china sināla, lupāsāla, mafahala, nāyongla, yongyingguila khuiungung ji.

²³ Chithāda sāda okathuili khalei awunga saikorali aworla, lanla Awunga Solomonna mataimeisersai.

²⁴ Kala Varivarana yarkahai Solomonwui thangkhamei chi okathui apam kachiva̱wui eina nganā khavai phārai.

²⁵ Khara mibing kachiva̱na kachichāwui mikhangai sinā kala lupāsāwui ot, kashankachon, myrrh, nganamkaphā otyur, sigui, gadhā, kum kachida kachungkha khuirāmi.

Sigui eina Siguigari Leihkhalon

²⁶ Solomonna siguigari kala sigui raimi kazipkhuida siguigari thingkha shāmati, sigui raimi thingtharāda khani khalei chi, siguigari keinungbingli, kala awungali ngasoda Jerusalemli haihai.

²⁷ Jerusalemwui alungli lupāsā ngalung thāda singa, kala cedarthingla Shephelahwui sycamore thāda ngayaonap eina singsai.

²⁸ Solomonwui sigui Egypt eina Kueli alokhuisera, kala awungawui leihkhalonbingna athum chi aman milaga akakhuina.

²⁹ Egyptwui eina siguigari ava̱va̱li lupāsā eina shekel shātharuruk kala sigui akhali lupāsā eina shekel hangphangā mida losanga; kala awungawui leihkhalonbingna Hitwui awungabing, Syriawui awungabing saikorali leih sāmarona.