1 WUNGNAOBING 1 - Kathara Bible (BSI)

Awunga Davidwui Asārlam

¹ Awunga David ara sarhaowa; kala athumna ali kachon fasangmilala malumthukthuwa.

² Chiwui vang eina awui raobingna, “Ishamei awungawui vang ngalānao akha phāsangmiranu, kala awungali ngalāva̱ china otram ngatha̱mida nali ngayurpiranu, chithāda ishāmei awungana lumturhaora” da hānga.

³ Chieina athumna Israel ngaleili khalei apam kachida ngalā khamathāva̱ phavālaga Shunamnao Abishagli samphangda awungali khuiungmi.

⁴ Ngalāva̱ chi azak mathālaka; kala ana awungali otram ngatha̱mi; kha awungana ali mangasomimana.

Adonijahna Wungpamkhongwui vang Khangarar

⁵ Haggithna kapharā Adonijahna akhalatta masot chigatta “Ina awunga sāra” da hānga; kala akhalattawui vang siguigari kasinga mi ngarānda awui mangāli mi hangphangāli ngasamzat ngasaka.

⁶ “Khisāda nana hikathā sākhala?” da avāva̱na atam akhalinida khangahān eina maringphā khangasak maleilakmana. Yarkhokalaka kala Absalomwui thichangli kapharāna.

⁷ Zeruiahwui naomayara Joab eina pāngmon Abiatharli ana mashitkhuihaida anina awui thi shurda ali ngachona.

⁸ Kha pāngmon Zadok, Jehoiadawui naomayara Benaiah, marān, Nathan, Shime-i, Rei, chili lāngda Davidwui kapingabing Adonijahwuili mazangmana.

⁹ Yao, sei, asa khamathāthā sha̱kei khuida, En-rogel ngalemli khalei Phara̱ Lungguipamli Adonijahna pha̱phayai; kala ana achināngarā, awungawui naomayarabing, kala Judah wungnao akhava saikorali hoi,

¹⁰ kha achinā Solomon, marān Nathan, Benaiah kala kapingabing chile mahomana.

Solomonli Awunga Kasang

¹¹ Chieina Solomonwui ava̱va̱ Bathshebali Nathanna hānga, “Haggithwui nao Adonijahna awunga sāhaira kala David ishāmeina matheimana kaji na mashāmala?

¹² Chiwui vang nawui manglā kala nanao Solomonwui manglā kankhui khavai ina nali hāngchitheiga.

¹³ Arui ngalāngda Awunga Davidli zangda hānglu, ‘Nanaomayara Solomonna iwui thili mungra, iwui wungpamkhongli ana pamra da “Ishamei awungana narao ili ngashit kahai maningmala?” Laga khiwui vang Adonijahna awunga sāhaokhala’?

¹⁴ Nana awungali hāngda leilakha ila nawui thili rārāsara, kala nawui tui chi mashunga da hāngsangra.”

¹⁵ Chieina Bathshebana awungawui petkāli zanga (chitharan awunga sarna kahaiwui vang Shunampava̱ Abishagna ali otram ngatha̱mida leisai).

¹⁶ Bathshebana khayāshilak eina awungali akhoruma, kala awungana, “Na khi pokhangai leikhala?” da ngahāna.

¹⁷ Ana awungali hānga, “Amei, nawui Proho Varewui ming singda naraoli, ‘Nanaomayara Solomonna iwui thili mungra, kala iwui wungpamkhongli pamra’ da ngashitmi.

¹⁸ Laga ara yanglu, Adonijahna awunga sāhaira kaji ameinala matheimana.

¹⁹ Ana seila, asākakā sha̱kei, yaola kachungkha pha̱phayāda, awungawui naomayara saikorali, pāngmon Abiathar, raithāna Joablongli hosangsera; kha narao Solomonli mahomana.

²⁰ Ishamei awungawui thili khipāna wungpamkhongli pamnikhala da Israel saikorana awungawui tui ngaraiserda lei.

²¹ Hāngshing machimihaiakha, atam rāda awunga mikpivā kahai tharan inao Solomon ini va̱naonili ngakaikashibingna jihaora.”

²² Chithāda awungali hāngmahungda leilakha Nathan marānla zangrāsai.

²³ Marān Nathanla hili leili da athumna awungali hānga. Ana rākazang tharan awungali ngakhumshām eina khayashiya.

²⁴ Kala Nathanna hānga, “Ishamei awunga, nana Adonijahna iwui thili mungda wungpamkhong pamra, da kahānghairala?

²⁵ Kaja aja ana vāda seila, asākakā sha̱kei, yaola kachungkha pha̱phayāda awungawui naomayarabinglila, raithāna Joab kala pāngmon Abiatharlila hokhuiserlaga phāshak phazāngarumda, ‘Awunga Adonijah okpeimeiranu’ da vaoda lei.

²⁶ Kha narao ili, pāngmon Zadok, Jehoiadawui nao Benaiah kala nanaomayara Solomonli mahosangmana.

²⁷ Narao ithumli mahāngla nawui thili wungpamkhongli khipāna pamki kajikhala kaji hi awungana sākahaila?”

²⁸ Chieina awunga Davidna ngahānkai, “Bathshebali horālu.” Bathshebahna rāda awungawui ngalemli rānganinga.

²⁹ Kala awungana khangashit sāda hānga, “Kachot atam kachiva̱wui eina huikhame Prohona theira,

³⁰ kaja, Israelwui Proho Varewui ming singda, ‘Nanaomayara Solomonna iwui thili mungra kala iwui mahut wungpamkhongli pamra’ da ngashit kahai chithāda ajala chithāda kahāng hina.”

³¹ Chieina Bathshebahna ngaleili mai ngakhumshām eina khayākashi mida hānga, “Ishamei Awunga David okpeimeiranu.”

³² Awunga Davidna hānga, “Pāngmon Zadok, marān Nathan, kala Jehoiadahwui nao Benaiah athumli iwuili horālu.” Chieina athumna awungawui mangāli anganingsera.

³³ Kala awungana athumli hānga, “Nashameiwui raobing khuilu kala inaomayara Solomonli ina katong gadhā chi tongngasaklaga ali Gihonli thāntālu;

³⁴ chili pāngmon Zadok eina marān Nathanna Solomonli Israelwui awunga sākhavai thao neomiranu; kala talla̱ khongda, ‘Awunga Solomon okpeimeiranu!’ da vaolu.

³⁵ Chiwui thili awui thi shurungda iwui wungpamkhongli ana pamra, kaja Israel eina Judahwui awunga sākhavai ina sangkahai athi shurda ana iwui mahut awunga sāra.”

³⁶ Jehoiadawui nao Benaiahna awungali ngahānkai, “Amen! Ishamei awungawui Proho Varena chithāda hāngranu.

³⁷ Ishamei awungali Prohona ngasokhami thāda Solomonlila ana ngasomiranu, kala amei Awunga Davidwui wungpamkhongli awui wungpamkhongna reimeiranu.”

³⁸ Chieina pāngmon Zadok, marān Nathan, Jehoiadahwui nao Benaiah kala Cherethnaobing, Pelethnaobingna Solomonli Awunga Davidna katong gadhāli tongngasaklaga Gihonli thānvai.

³⁹ Chili kachonshimwui eina thaokhong chi pāngmon Zadokna khuida Solomonli neomi. Chiwui thili athumna talla̱ kakhong eina mi saikorana, “Awunga Solomon okpeimeiranu!” da vaosera.

⁴⁰ Kala mi saikora athi shurda mathānthup eina sipa̱la khongda athumwui ringkaphā akhonna ngalei ngarungninghaowa.

⁴¹ Adonijah kala khavābingla phazākakhui eina akhon chi shai. Kala Joabna talla̱khon chi kashā chitharan hānga, “Keinungli ngaunlop kahai chi khiwui vangkhala?”

⁴² Ana hāngmahungda leilakha, yanglu, pāngmon Abiatharwui naomayara Jonathan rārāsai; kala Adonijahna, “Zanglu, na shitsangkapai mina kala kaphā pao khuiphungda leira.” da hānga.

⁴³ Jonathanna Adonijahli ngahānkai, “Kaphā pao maningmana,” kaja, “ithumwui Awunga Davidna Solomonli awunga sanghaira;

⁴⁴ kala ali ngasoda pāngmon Zadok, marān Nathan kala Jehoiadahwui nao Benaiah kala Cherethnaobing eina Pelethnaobingli chihovāhaira; kala awungana athumli kasoda awungana katong gadhā chili ali tongngasakhaira.

⁴⁵ Laga ali awunga sāngasak khavai pāngmon Zadok eina marān Nathanna Gihonli ali tharchisinmihaira; kala mathānthup eina keinungli latkhaungwui ngaunlop kahai khon chi nathumna kashāna.

⁴⁶ Solomonna wungpamkhongli pama.

⁴⁷ Chili lāngmeida awungawui raobingna ithumwui Proho Awunga Davidli ringkaphā rāphongshokta, ‘Nawui Varena nali lāngda Solomonwui ming zatmei ngasakranu, kala nawuili awui wungpamkhong reimei ngasakranu’ da hānga. Kala awunganala petli ngakhumshāmhai.

⁴⁸ Kala awungana hithādala hānga, ‘Iwui nao akhali iwui wungpamkhongli pamkhangasak, imik eina kathei samphanghaowa da, Israelwui Proho Vare chili sochikatranu.’”

⁴⁹ Chieina Adonijahwui phākachizatli rākazang kachiva̱ kathirhaowa, kala kachāyām eina yāmserhaowa.

⁵⁰ Adonijahna Solomonli ngacheehaida ngakarthuida hanphutwui angaji chili asingkhui.

⁵¹ Kala Solomonli hithāda rāhānga, “Yanglu, Adonijah Solomon awungali ngacheehaira; kaja ana hanphutwui angaji chili singda, ‘Awunga Solomonna awui raoli raighai eina masāthatmara da ili rida khangashit sāngasaklu’ da hānga.”

⁵² Solomonna hānga, “Ana shitsangkapai mi ngasaakha awui sampā akhanidala ngaleili matātung ngasakmara, kha makaphā makhayā ningphum ningngai leisaakha, a thiphalungra.”

⁵³ Chieina Solomon awungana kasoda athumna hanphutpamwui eina ali ahokhui ngasaka. Ana Awunga Solomonli khayākashi vāmiya; kala Solomonna ali “Nawui shimli ungulu” da hānghaowa.