1 TIMOTHY 6 - Kathara Bible (BSI)

¹ Varewui mingli kala ithumwui tamkachitheili mamashāt khavai rao sāda khalei saikorana athumwui akhavābingli khayāshida phaningserranu.

² Vareshi akhavābingwui raobingna akhavābingli mayangkharingpaimana, kaja athumla athumwui chinaongarāna, honda athumli mathāmeida otram ngatha̱miki kajina, khikhalajila athumwui otsak eina kankhanā samkaphangbing athum chi leikashi shitkasangabingna. Hibing hi tamchitheilu kala hāshoklu.

Minama Tamkachithei kala Mashunshān

³ Kachikathāna ithumwui Proho Jishu Khristawui khamashung tui kala dharmawui tamkachithei chili mamayāmada mikhanam tui tamchitheiakha,

⁴ a chiya khayāning khanganinga kala khikha matheithangkhama mina. Awui ningli ngaphatkhangai kala ngama̱-ngashaokhangai ningna pema. China yuikashi khangama̱-khangashao shokngasaka,

⁵ wuklung makhao kahai kala khamashungli makhalei mibingwui ningli atam kachida khonkazar shokngasaka kala dharma hiya shāngkhavaina da phaninghaowa.

⁶ Ningyāng unglak eina dharma kazatli tongkazā kahakva lei,

⁷ kaja ithum okathuili khikha makhuirāmana, okathuiwui eina khikhala makhuithuipaimana.

⁸ Chieina ithumwui kashakazā eina kashankachon samphanghaiakha, chi shapa da phaningsa.

⁹ Kha shāngkhangayiya athum china kasuili, khalenli, chukhamaja̱ makhalei kala shimānhaoki kaji ningkachāng kachungkhali tāzanga, chieina mibingli kashimān kala kathi pongli vāngasaka.

¹⁰ Lupāli leikashi hi makaphā saikorawui angayungna. Mi kaikhana ningchangnā kahaiwui vang shitkasangwui eina katāva̱li thuihaoda wukakhanang sikafa kachungkha samphanga.

Shitkasangwui Khangarar

¹¹ Kha Varewui mi nava, chikathā ot chi masaalu. Khamashung khangarong, Varetuili shitkasang, leikashi, ningzinghākharing kala malungkhanim phālu.

¹² Shitkasangwui kaphā rai khangarar chi ngararlu; nana shākhi kachungkhawui mangāli hāngkaphat tharan nali hokhui kahai athishurda katang makhavai kharing chili singtitlu.

¹³ Ot saikorali kharing mirinkhame Vare kala Pontius Pilatewui mangāli mashungrik eina shitkasang hāngkaphatwui shākhi khame Jishu Khristawui mangāli

¹⁴ ana marāranglakha eina tangda nawui kakaso chi athumna ningtonglak eina mayon khavai ina kakasona.

¹⁵ Awui kharā chi sokhame Vare kala akhamāng kaje Khamunga, awungabingwui Awunga, prohobingwui Prohona retkahai atamli khuirāmira.

¹⁶ Makathe kala khipānakha marānganaikhararra kahora ramli kapāna chi a mānga. Ali khipānakha matheiranga, katheila matheirarmana. Khayākakā kala mashimānda khamung chi awui ngasāranu. Amen.

¹⁷ Okathuili kashāngbingli malangso khavai kala akachang makhaning lanli machihān khavai, kha ot saikora ithumli ringphā khavai mavātla khame Vareli chihānthei khavai machinlu.

¹⁸ Kaphā ot sākhavai kala kaphā ot kasāli ngachāng kāmei khavai, sailamlak eina kateibingli mithei khavai athumli machinlu.

¹⁹ Chithākha athum khalattawui vang anaolamshongwui kaphā shimphung sākā kahaina. Chieina kachangkhat athumna mirinwui kharing chi samphangpaira.

²⁰ Timothy, nali chisin kahai chi singtitlu. Khamakhao tui kala mangkhama̱wui ngaphat-ngayāt chili mi kaikhana “Aworna” da khamatui kala kakhui chili mazangalu.

²¹ Kaja kaikhana chi samphanghaira da phaning kahaiwui vang, chiwui athei sāda athum shitkasangwui apong chi shimānhaowa. Varewui lukhamashan nathum saikorali ngasomiranu.