1 TIMOTHY 5 - Kathara Bible (BSI)

Sākhangayi Ot

¹ Rarkhameiya mili makaharlu, kha navāli kapo thada hānglu; nganuikhameibingli nachinā ngarā thada phaninglu.

² Rarkhamei sha̱naobingli nashava̱ thada, kala nganuikhamei sha̱naobingli nazarva̱ thada ningkathar eina phaninglu.

³ Kachangkhat ra̱meikapamva̱bingli khayāshilu.

⁴ Ra̱meiva̱ akhana naongarā nilala, ara̱-azā nilala leiakha rimeikapta athumna shimkhurli sāmikhangayi chi sāmi khavai tamkhuiphalungra kala hithada kasā hi eina ava̱ avābingli kala awo-ayibingli runkhamina. Hi Varewui ningyāng khaungna.

⁵ Kachangkhat ra̱meipamda amāng eina khaleiva̱ chiya, awui kachihān Varewuili shāphaida ngashun ngayā seihā sāda kapo mathāhailakmana.

⁶ Kha akhalatta ringphā khavai kasāva̱ a chiya ringlala kathina.

⁷ Athumli khamashāt malei khavai, ningkhami chi hāngchitheilu.

⁸ Kachikathāna awui athei-asābingwui vang mataimeikapta ashi shimkhurwui vang mangarānmitheiakha awui shitkasang maleimana. Chitkathā mi chiya mashitkasangbingli zakshimei.

⁹ Zingkum hangtharuk henkahaibing maningla ra̱meinaowui mishānli mashānsangalu. Chili lāngda, akhashimang fakathuiva̱,

¹⁰ kala kaphā otsak kasava̱; misui morei makaphungva̱, nao nganaokatheiva̱, shitkasangbingli phei pheokhamiva̱, kakhanangbingli ngachonkhamiva̱ kala kaphā ot kasāli ningkasangva̱ ngasāphalungra.

¹¹ Lārongpongbingli ra̱meinaowui mishānli mashānsangalu, kaja athumna Khristali dharchigat kahai chili phasāwui khamathangna yuikahai tharan fathuingaihaowa.

¹² Chieina athumwui ngashit kahai chi kaikahaiwui vang khayon samphanga.

¹³ Kala athumna shim shimli zangzatta ngachāng makakā tamkhui, kha chili zakshikhameiva khipālikha matheimila morsāpta mamatuikhangayi tui matuiphāphāhaowa.

¹⁴ Chiwui vang eina lārongpongbingna fathuida naola pharālaga shimkhurli kachingda ithumwui yangkashebingna ithumli khamashāt maleikhavai kasā phāmei.

¹⁵ Kaja ra̱meinao kaikhana Satanwuishong thuihaira.

¹⁶ Kachikathā shitkasangva̱ sha̱nao akhawui athei-asāli ra̱meinao leiakha, ana athumli ngachonmiranu kala churchli machot ngasakaranu. Chieina churchna rarkhameibing chili ngachonpaira.

¹⁷ Mathada yangkhame khararnaobing chili, mataimeikapta tamkachithei eina pao hākashok athum chili mataimeida khayāshiranu.

¹⁸ Kaja hithada kapihaida lei: “Mā khanaia mukvā chili khamor makhalaphaipaimara” kala “Ot kasapā china awui langhai samphangngayiya.”

¹⁹ Khararnaowuitungli kaphen tui chi mi khani lah kathumli langda shākhi maleiakha makhuisangalu.

²⁰ Mi khangateinala ngachee khavai morei kasā mibingli saikorawui mangāli machinlu.

²¹ Mimai mayangalu, ngahānkhangai masāla, tuibing hi mayon khavai Varewui, Khrista Jishu kala kazingraobingwui miktāli ina kakasona.

²² Pāng khangkāda dharkachigat ot kasāli makatotnālu, miwui makaphā otsakli nalila phenpaishina. Tharlak eina pamlu.

²³ Tara̱māng mamangalu, kha khaluizā khavaiwui vang, kala nali kazāching kajiwui vang, drakhāra̱ kateteo manglu.

²⁴ Mi kaikhawui moreiva thatheihaoda bichar kasāna rihaowa. Kha kaikhawui moreiva naolak eina rātheiya.

²⁵ Chithada sāda kaphā otsakbing chi thatheihai; ngalāngda matheisālala mangathumpaimana.