1 TIMOTHY 4 - Kathara Bible (BSI)

Minama Ojābing

¹ Manglā Katharana tharlak eina hānghaira, kaja naoda mi kaikhana mikhanama manglā kala kameobingwui sha̱tui nganāda shitkasangwui eina thuihaora.

² Hikathā mikhanam tui hi kakapika kala mashun-makhui thengkahaiya athumwui eina kashokna.

³ Chikathā mibingna ngalā kakhui kala kashakazā kaikha kashai-kashak hi mamashungmana da tamchithei. Kha chikathā kashakazā chi shitkasangabing kala khamashung theikahaibingna ningkashiwui seihā sāhailaga khuizā khuimang khavai Varena semkahaina.

⁴ Kaja Varena sākahai ot saikora phāsera kala seihā kasā eina ngasoda ningshitheiakha horhaikapai mazanglakmana.

⁵ Chiwui vang eina seihā kasā kala Varewui tui eina tharngasak kahaina.

Khristawui Kaphā Rao

⁶ Nana Manglāwui kashakazā zāda kala shitkasang chiwui athishurda navānaobingli hi tākam eina tamchitheiakha, na Khrista Jishuwui otram khangatha̱ kaphā mi akhana.

⁷ Vareli makathei, hāngnganaophāphā kaji tuili manganāsangalu. Nakhalatta Vareli kaphaning tamlu.

⁸ Phasāwui pongli tamkakhui tongkazā chi kateokhamaya, kha Vareli kaphaning hiya aruihonwui mirinlila, rāki kaji mirinwui vangla khangashit khaleiwui vang apong kachiva̱li tongzai.

⁹ Hi khuisangphalungki kaji kala shitsangchao phalungki kaji chānsamna.

¹⁰ Khanganurla nganurda otla panglāk eina sai. khikhala jila mi saikorawui Huikhame kala mataimeikapta shitkasangbingwui vang ringching kaje Vareli ithumwui kachihān shāpkahaina.

¹¹ Tuibing hi tamchitheida ningmilu.

¹² Na nganuida leiya da mi khipānakha machipat ngasakalu, kha katharli, shitkasangli, leikashili, kasākhavāli kala tuimatuili shitkasangbingna ngayokhavai sālu.

¹³ I marāranglakha eina tangda yaruili Varewui tui pākachithei, pao hākashok kala tamkachitheili ngalangzarlu.

¹⁴ Ararbingna nawuitungli pāng parrorda kala marānbingna hāngmi kahai nawui wuklungli khalei manglāwui lemmet chi khikha maningmana da maphaninghaialu.

¹⁵ Ot chi ningsanglak eina sāmasuilu, chithākha nakhalatta kala nawui tui khanganābingla huikhuipaira.

¹⁶ Na khalattala kala nawui tamkachitheilila ning ngasharlu, mamalaialu, chithākha nawui tui khanganābingla huikhuira.