1 TIMOTHY 3 - Kathara Bible (BSI)

Churchwui Kathānabing

¹ Hi khamashung chānsam tuina; Kachikathā mina churchwui kathāna sāngaiakha, ana kaphā otli ningkachāngna.

² Chieina churchwui kathāna kasāpā chiya sui makakā, preiva̱ akhamāng kaje, ngarakzak kahaiya, khalatta ngarinkatha, khayākakā, kha̱mimāli ngahānkatha, tamchiteikatha ngasāphalungra.

³ Kala makhamaripa, masākashe, malungkhanima, makhararkazāra, kala lupāli maleikashe mi ngasāphalungra.

⁴ Apong saikorali anaongarāli kahāng nganā ngasakta khayā kākhavai awui shimkhur mirin mathada khangarān sāphalungra.

⁵ Mi akhana awui shimkhurli manganaokhuitheiakha, Varewui churchli ana kathada ngakuitheirakhala?

⁶ A sādhadhara Vareshi maningphalungmara, kaja khayāning nganinghaida chipeewui pāngli tāzanghaipai.

⁷ Chili lāngda khangateibingnala khayākashia mi akha ngasāphalungra, chi maningakha morei phungda chipeewui khalenli tāzanghaipai.

Churchwui Ngachonmebing

⁸ Chi tākam eina deacon sāki kajibingla ning mazingphalungra, tui khani mamatuipaimana, mamarippaimana, kākharāmli akachanga masāpaimana;

⁹ shitkasangwui kathuka tui chi athumna singtitphalungra.

¹⁰ Rida athumli chāng yangfalu, laga chukhara̱ maleimana da theikhui kahaiwui thili deacon sānaoranu.

¹¹ Chithada sāda athumwui preiva̱ ngarāla mina khayāshikapaia, maphenphāphākapaia, ngarakzak kahaia kala ot saikorali shitsangkapaiva̱ ngasāphalungra.

¹² Deaconpā chi preiva̱ akhamāng kaje, kala naongarāli, shimkhurli nganaokatheia ngasāphalungra.

¹³ Deacon sāda mathālak eina otram khangatha̱bing china mai kai, kala Jishu Khristali shitkasang chiwui tongkazā kachungkha samphanga.

Dharmawui Kathuka

¹⁴ Ina nawuili thaklāk eina rāra da phaningsālala, hāngkhamathin tuibing hi ina nali kagapina.

¹⁵ Kalikha huihaisākha Varewui shimkhur kaja kharinga Varewui church, khamashungwui shimphunga kala pakra̱ chili mibingna kathada sāmameirakhala kaji nana theikhui khavai kagapina.

¹⁶ Ithumwui dharmawui ngathum kahai hakhamahā chi khipānakha maningmana majirarmara: A mikumowui phasā kāda rai, hi Manglāna mashunga da chithei, kala kazingraobingna thei. Awui pongli miyur saikorali hāshoka, okathui peidana shitsanga, kala tekhamatei eina khuikāhaowa.