1 TIMOTHY 2 - Kathara Bible (BSI)

Churchwui Khokharum

¹ Rimeikapta ina pokhangai hina, kaja kapolila, seihā kasālila, khangakaolila kala ningkashi khamilila, mi saikorawui vang Vareli pomilu,

² awungabing kala pangshap kasingbingwui vangla pomilu, chithākha ithum dharmawui ponglila, acham-aramwui ponglila khonkazar maleila chingri eina okthuira.

³ Hi kaphā otna kala hina ithumwui Huikhame Vareli ningyāng ungngasaka.

⁴ Ishameina mi saikorali kahui samphang ngasakngai, khamashungwui ponglila theikhui ngasakngai.

⁵ Kaja Vare akha lei, kala Vare eina miwui ngachaili ngashikkhame akha lei— chiya Khrista Jishu,

⁶ atam chālak eina shākhi khame mi saikorawui vang ngatangman akhalatta chigatkhame china.

⁷ Hiwui vang ili paokazata akha thada kala Gentilebingwui ojā sāda chihovai. Hi mashunglaka, kakapik tui maningmana.

⁸ Chiwui vang eina mayarnaobingna kakhararla, malungkhavātla maleila apam kachiva̱li pāng khangkāda seihā sāmi ngasakngai.

⁹ Chithada sāda sha̱naobingnala ning mazinglak eina, ayuk-ayan unglak eina kashankachon ngavailu, sināwui, muktāwui kala aman kasasak eina phorsanglu kaji maningmana.

¹⁰ Kha dharma khalei matik kachā sha̱nao thada sāranu,

¹¹ sha̱naona kahāng khanganā eina kasaikha pamda tamkhuiranu,

¹² sha̱naona mayarnaowuitungli akhavā kasā nilala, tamkachithei nilala ina mamayāmana, a kasaikha pamki kajina.

¹³ Kaja Adamli sārilaga Eveli sānaowa,

¹⁴ Adamli machipatmana, sha̱naopava̱li chipatta yonngasaka.

¹⁵ Chithālala ana ningmazingda shitkasangli, leikashili kala tharkhamathengli poktitakha nao kapharāwui vang ali huimira.