1 THOTRINCHĀN 4 - Kathara Bible (BSI)

Judahwui Ara̱-azā

¹ Judahwui naomayarabing: Perez, Hezron, Carmi, Hur, Shobal.

² Shobalwui nao Re-aiahna Jahathwui avāva̱na, kala Jahathna Ahumai eina Lahadwui avāva̱na. Hi Zorathwui shimkhurna.

³ Etamwui naomayarabing: Jezreel, Ishma, kala Idbash; kala athumwui azarva̱wui aming Hazzelelponi hoi.

⁴ Penuelna Gedorwui avāva̱na, kala Ezerna Hushahwui avāva̱na. Hibing Hurwui naomayarabingna: Ephrathahwui naochizai kala Bethlehemwui avāva̱na.

⁵ Tekoashāvā Ashhur ngalā khani ngashira, Helah eina Naarahna.

⁶ Naarahna Ahuzzam, Hepher, Temeni, kala Ha-ahashtarili pharai. Hibing hi Naarahwui naomayarabingna:

⁷ Helahna kapharā naomayarabing: Zereth, Izhar, kala Ethnan.

⁸ Kozna Anub, Zobebah kala Harumwui naomayara Aharhel shimkhurwui avāva̱na.

⁹ Chinaongarā kateile Jobezna khayā kāmei; kala ava̱va̱na, “Chotlak eina pharākhui” jida awui ming Jabez phokmi.

¹⁰ Israelwui Vareli Jabezna “Iyavo nana ili somida iwui lam thari haksangmisi kaje, kala nana ili ngasomisi kaje, kala kakhanangli matāzang khavai kasakwui eina nana kanmisi kaje” da poi. Ana kapo chi Varena khuisangmi.

Khangatei Shimkhur

¹¹ Shuhahwui achinā Chelubna Mehirwui avāva̱na; kala Mehirna Eshtonwui avāva̱na.

¹² Eshtonna Bethrapha, Paseah, kala Irnahashna Tehinnahwui avāva̱na. Hi Rekahwui mibingna.

¹³ Kenazwui naomayarabing: Othni-el eina Seraiah; kala Othni-elwui naomayarabing: Hathath eina Meonothaina.

¹⁴ Meonothaina Ophrahwui avāva̱na; kala Seraiahna Joabwui avāva̱na, Joabna Ge-harashimwui avāva̱na, them-kathemwui vang aming hithāda kaphokna.

¹⁵ Jephunnehwui nao Calebwui naomayarabing: Iru, Elah; kala Naam; Elahwui naomayarabing: Kenaz.

¹⁶ Jehallelelwui naomayarabing: Ziph, Ziphah, Tiri-a, kala Asarel.

¹⁷ Ezrahwui naomayarabing: Jether, Mered, Epher, kala Jalon, Meredna khangakum Pharaohwui naongalāva̱ Bithi-ahna athum hi kapharāna: Mariam, Shammai, kala Eshtemoawui avāva̱ Ishbahlila ana pharāsera.

¹⁸ Jehudipāva̱na kapharā Jeredna Gedorli pharai, Socoli kapharā Heberlila, kala Zanoahwui avāva̱ Jekuthiellila ana pharāthathui.

¹⁹ Nahamwui azarva̱ Hodiahwui apreiva̱wui naomayarabing: Garmipashiwui avāva̱ Keilah eina Ma-acathbingwui avāva̱ Eshtemoana.

²⁰ Shimonwui naomayarabing: Amnon, Rinnah, Ben-hanan, kala Tilon. Ishiwui naomayarabing: Zoheth eina Ben-zoheth.

Shelahwui Ara̱-azā

²¹ Judahwui naomayara Shelahwui naobing: Lecahwui avāva̱ Er, Mareshahwui avāva̱ Laadah, kala Beth-ashbeali tāwon kachon kasāshi shimkhurbing;

²² kala Jokim, Cozebawui mibing kala Joash, eina Sorap Moabli munglaga Lehemli latunghaowa (hi achālakhawui khararchāna).

²³ Hibing hi Netaim eina Gederahli okthuida ham kasābingna; athumwui awungali ngasoda awui ot sāsai.

Simeonwui Ara̱-azā

²⁴ Simeonwui naomayarabing: Nemuel, Jamin, Jarib, Zerah, Shaul;

²⁵ kala awui nao Shallum, awui nao Mibsam, awui nao Mishma.

²⁶ Mishmawui naomayarabing: Hamm-uel, awui nao Zaccur, awui nao Shime-i.

²⁷ Shime-ina naomayara tharāda tharuk kala naongalāva̱ tharuk leisai; kha achināwui naomayarabing machungmana, Judahwui shimkhur thāda mamataisangthuwa.

²⁸ Athumna kapampam: Beer-sheba, Moladah, Hazar-shual,

²⁹ Bilhah, Ezem, Tolad,

³⁰ Bethuel, Hormah, Ziklag,

³¹ Beth-marcaboth, Hazar-susim, Beth-biri, kala Sha-araim. Davidna mamungranglakha eina tangda hi athumwui keinungbing sāsai.

³² Kala athumwui kha̱bing chiya, Etam, Ain, Rimmon, Tochen kala Ashan keinung phangā,

³³ hieina ngasoda athumwui kha̱bing eina keinung kuikhamareibing chi Baal tāshungda lei. Hibing hi athumwui kha̱pan sāsai kaji mithotwui lairikli kapihaida lei.

³⁴ Meshobab, Jamlech, Joshah, Amaziahwui nao,

³⁵ Joel, Jehu, chiya Joshibiahwui nao, Seraiahwui nao, Asi-elwui nao;

³⁶ Eli-o-enai, Ja-akobah, Jeshohaiah, Asaiah, Adi-el, Jesimiel, Benaiah,

³⁷ Shiphiwui nao Ziza, Allonwui nao Jedaiahwui nao, Shimriwui nao, Shemaiahwui nao—

³⁸ aming hāngkahaibing hi shimkhurwui wungnaobingna, athumwui shimkhur reisanglaka.

³⁹ Athumna Gedorwui zingsho ngavei vāshungda seihomphung phāvai,

⁴⁰ ngalei katuma, seizat kaphā, mashālak kahai chingri va̱ri kahai ngalei samphanga; kaja chiwui khare mibing chi Hamwui mibing sāsai.

⁴¹ Aming eina kapi kahai hi Judahwui awunga Hezekiahna khamung atamli kharābingna, chili leikasā Me-unimbing eina athumwui kachonshimla sakhayāngmihaida kashamshokhailaga athumwui pam chili seizat phālak kahaiwui vang aja eina tangda athumna pamda lei.

⁴² Athumwui ngachaili Simeonwui mi shāphangā, athumwui kathānabing sāda Pelatiah, Ne-ariah, Rephaiah, kala Uzziel, athum Ishiwui naomayarabingna thānda Seir kaphungli vai;

⁴³ kala Amaleknaobing, kaikha yāmshok kahaibing chi sāthatserhailaga aja eina tangda athum apam chili pamda lei.