1 THOTRINCHĀN 28 - Kathara Bible (BSI)

Khorumshim Sākhavai Solomonli Horsangkhami

¹ Israelwui otva̱bing, shang-shangwui otva̱bing, awungali otram khangatha̱ khum-khumbingwui otva̱bing, thing-thing, shāshāwui raimi kathānbing, lansingmebing awungawui kala naongarāwui lan, sha̱kei khamayonwui kathānbing, kala awungawui konungwui otva̱bing eina ngasoda kapinga mibing, rai kapingabing, athum saikorali Davidna hokhuida Jerusalemli kazipa.

² Chiwui thili Awunga Davidna yarui mangāli ngakarthuida hānga, “Ichināngarā kala iwui mibing, ili nganālu. Prohowui tuingashit oko hi haikhavai kala Prohowui phei naikhavai ina shim akha sākhuira da machuksai; kala chi sākhavai ngarānhaira.

³ Kha Varena ili, ‘Imingwui vang nana shim masāpaimara, kaja na raikathata mina, kala ashee tangasakhaira.’ jihaowa.

⁴ Chitha-ilala, Israelwui awunga sāching khavai, Proho Varena ishāvāwui shimkhur eina ili kapangkhuihaira; kaja kathāna sākhavai Judahli kapangkhui, Judahwui shimkhur eina ishāvāwui shimkhurli kapangkhui, kala ishāvāwui shimkhurwui naobingwui eina ana ningyāng ungda ili kapangkhuilaga Israelwuitungli awunga sāngasaka.

⁵ Kala iwui nao mayarnao saikorawui ngachaiwui eina (kaja Prohona ili mayarnao kachungkha mihaira), iwui mahut shinkhavai awui wungram Israelwui wungpamkhongli pamkhavai, Solomonli kapangkhuihaira.

⁶ “Prohona ili hānga, ‘Iwui shim kala chiwui yāngkhup Solomonna sāki kajina, kaja inao sākhavai ali kapangkhui kahaina, kala ina avāva̱ sāra.

⁷ Aruihonwui thāda ana iwui ningkhami kala shiyan-chikanbing mayontitakha awui wungram mashimānda sakāmira.’

⁸ “Chiwui vang eina Israel saikorawui mikyanli kala Prohowui mangāli, kala Varivarawui miktāli, Prohowui ningkhami saikora phākhuida mayontitlu; chieina khamathā ngalei hi nathumwui ngasāra, kala nanaongarāli nathumwui thili haimida katang mavaila athumwui shimlui haimilu.

⁹ “Inaomayara Solomon, navāwui Vare chili theilu, kala ningtongda kala sangairereo ningtongda otram ngatha̱lu, kaja Prohona wuklung saikora theisera, kala kaphaning khangarān kachiva̱ theishapa. Nana ali phaakha, nana ali samphangra; kha nana malaihaiakha katang mavaila katāvali horhaora.

¹⁰ Prohowui kathara shim sākhavai nali kapangkhuihaira, ning ngasharlu; kala pingmeida sālu.”

¹¹ Chiwui thili Davidna anaomayara Solomonli, ana ngarān kahai shimzak, Khorumshim chiwui shimbing, lanshimbing, atowui kābing, zangkhamayar kā, lukhamashan pamkhong haikhavai kā saikora hāngchithei;

¹² kala Prohowui shimwui yāngkhup awui ningli ngarān kahai saikora kuimareida shimpho sākasang, Varewui shimwui lanshimbing, tharchigat kahai lemmetwui shim,

¹³ pāngmonbing eina Levibingwui otpam ngayarkakhai, Prohowui shimli otram khangatha̱bingwui pam, kala chili shichin khavai khorkhong haikhavai,

¹⁴ kala otngarut kachiva̱li singkhavai sināwui khorkhongbingwui, lupā khorkhongbingwui vang lupāsā zangki kaji,

¹⁵ sināwui thaomeishongbing eina chiwui thaomeibingwui kharit, thaomeishong kala thaomei ava̱va̱wui kharit, lupāsāwui thaomeishong kala chiwui thaomeibing, otngarut ava̱va̱li singkhavai athishurda onmi,

¹⁶ maiyan khamui haikhavai table ava̱va̱wui vang sinā, lupāsāwui tablebingwui kharit,

¹⁷ sinā kachanga eina kasā marik-kapei, khongsaibing, khorām, sinā koklui ava̱va̱wui vang kharit, lupāsā koklui ava̱va̱wui kharit;

¹⁸ langkazazak kahai sinā eina sākakhui, nganamkaphā thao riktā khavai hanphut kala chiwui kharit; chili lāngda ana cherubimwui sinā eina sākakhui siguigari athumwui angachāng harda Prohowui tuingashit okotungli fakham khavai chila miya.

¹⁹ Saikora hiwui pongli Prohowui pangwui eina kapilaga khami china, ana tharlak eina ngarānkakhui chiwui athishurda ot saikora sāki kajina.

²⁰ Chiwui thili Davidna anaomayara Solomonli hānga, “Lungsanmeilu kala pingmeida sālu. Mangacheealu, makhanangalu; kaja Proho iwui Varena nali ngasomida lei. Prohowui shim kasā hi makupranglakha eina tangda ana nali horkahai masālakmara.

²¹ Yanglu, pāngmonbingla, Levibingla, Varewui shimwui otram ngatha̱ khavai saikorawui vang kala ot saikorali ngachonngairereo kahai kala sātheiser kaji mi kachiva̱ nali ngasoda lei; kala otva̱bingla kala mibing saikorala nawui kahāng nganāra.”