1 THOTRINCHĀN 23 - Kathara Bible (BSI)

¹ Davidna sarrei kahai tharan anaomayara Solomonli Israelwui awunga sāngasakhaowa.

Levinaobing eina Pāngmonbingwui Ot

² Israelwui kathānabing, pāngmonbing kala Levinaobing saikorali Davidna kazipkhuisera.

³ Levinaobing kum thumrāwui atungbing shānkhuida mi thingthumrāda chishat kāshunga.

⁴ Kala Davidna hānga, “Chiwui alungli mi thingmaga̱da matina Prohowui shimli ot sāra, thingtharukna otva̱bing kala bicharkasābing sā jira;”

⁵ thingmatina shantri sāra, kala thingmatina masotlaa sākhavai ina sākakhui akap-akai chibing eina ngasoda Proholi masotlaa chigatra.

⁶ Kala Levishi shang-shangwui athishurda Davidna angayar mathālak eina ngayeimi: Gershomshi, Kohathshi kala Merarishi da.

⁷ Gershomwui naomayara chi Ladan eina Shime-ina,

⁸ Ladanwui naomayarabing: Jehielna wungva̱na, kala Zetham eina Joel zangda athum kathumna.

⁹ Shime-iwui naomayarabing: Shelomoth, Hazi-el, kala Haran, athum kathumna. Hi Ladanshi avāva̱ ngarā shimkhurwui khararrabingna.

¹⁰ Shime-iwui naomayarabing: Jahath, Zina, Jeush kala Beriah. Athum mati hi Shime-iwui naomayarabingna.

¹¹ Jahathna wungva̱na, kala Zizahna kakhanena; kha Jeush eina Beriahwui nao mayarnao tarākha maleithuda, chieina shānkakhui akhawui alungli avāva̱wui shimkhur ngasāhaowa.

¹² Kohathwui naomayarabing: Amram, Izhar, Hebron kala Uzziel, athum matina.

¹³ Amramwui naomayarabing: Aaron eina Moses. Tharmathengmeikap kaje ot tharchigat khavai, kala anaomayara eina tangda katang mavaila nganamkaphā thao riktaching khavai, Proholi katang mavaila otram ngatha̱da awui ming singda somi khavai, Aaronli ngateihang eina phaishokhaowa.

¹⁴ Kha Varewui mi Moseswui naomayarabingli Leviwui shangli zangngasaka.

¹⁵ Moseswui naomayarabing: Gershom eina Eliezer.

¹⁶ Gershomwui naomayarabing: Shebuelna wungva̱na.

¹⁷ Eliezerwui naomayarabing: Rehabiahna wungva̱na; Eliezerwui naomayara khangatei maleiluimana, kha Rehabiahwui nao mayarnao kachungkhaya.

¹⁸ Izharwui naomayarabing: Shelomithna wungva̱na.

¹⁹ Hebronwui naomayarabing: Jeriahna wungva̱na, Amariahna kakhanena, Jahazielna kakathumana kala Jekameamna khamatena.

²⁰ Uzzielwui naomayarabing: Micahna wungva̱na, kala Isshiahna kakhanena.

²¹ Merariwui naomayarabing: Mahli eina Mushi. Mahliwui naomayarabing: Eleazar eina Kish.

²² Eleazarna mayarnao mapharāla thihaowa, sha̱naomānga, ashiwui theisā, Kishwui nao mayarbingna athumli ngakuma.

²³ Mushiwui naomayarabing: Mahli, Eder kala Jeremoth, athum kathumna.

²⁴ Athum hi Leviwui naomayarabing avāva̱ ngarāwui shimkhur, avāva̱ ngarā shimkhurwui wungva̱bingna athum avāva̱wui aming athishurda kum maga̱ rarkahai kala chiwui atung Prohowui shimli otram ngatha̱mi khavai chankahaibingna.

²⁵ Kaja Davidna hānga, “Proho, Israelwui Varena awui mibingli chingrihai ngasakta, ana Jerusalemli mashimānda pamda lei.

²⁶ Chiwui vang eina Levinaobingna tabernaclela, kala otram ngatha̱ khavaila phungung phungvā sākhavai maleiluimana.”—

²⁷ kaja hi Davidna kasoda mishān shannaothui kaje, kum maga̱ kākashung kala chiwui atungli khalei Levinaobingna—

²⁸ “kha athumwui otna Prohowui shimli otram khangatha̱ chili Aaronshi vānaongarāli ngachonmida, shimla, kayāngla, kathara ot sakhamathā, kala Varewui shimli otram khangatha̱ saikora hi athumwui ot sāra;

²⁹ maiyan khamui kasā, tharāzatchigatwui mathir, kala khawok makazang khamui, thao khamanāt ot, kala saikorawui chungkhamei hakkhamei chi onkhami hikathāthāli ngachonmira.

³⁰ Athumna ngathor kachida, Proholi ningkashi, masotkachigat eina ngasoda nganingchingra, ngayāla chithāpapamra,

³¹ kala sabbaththang, changwokthang, phanitthang, Prohowui vang rikkatā kachigat tharan, zimiksho kachung kateo athishurda athumna Prohowui mangāli chithāda sāchingra.

³² Chithāda sāda Levinaobingna kazipshimla, kathara shimla athumna yangra; kala Aaronwui naomayarabing, achinā ngarāna Prohowui shimli khokharumwui ot kasālila ngachonmiki kajina.”