1 THOTRINCHĀN 22 - Kathara Bible (BSI)

¹ Chieina Davidna hānga, “Hili Proho Varewui shim sāra kala hili Israelwui vang rikkatā kachigatwui hanphut hili haira.”

Khorumshim Sākhavai Khangarān

² Israelwui alungli khalei kha̱mibingli kazipkhuida hokhuiser khavai Davidna kakaso mi, kala Varewui shim sākhavai ngalung kashānbingli lunggui shānngasaka.

³ Kala Davidna mari kachungkha kazipkhuida ngavei khāmongwui vang yotpi phashān khavaiwui vang mari kala pithraila maonkharar mashing kaziphai,

⁴ cedarthing mashānkharar haimi, kaja Sidon kala Tyrewui mibingna cedarthing kachungkha Davidli khuirāmi.

⁵ Kaja Davidna hānga, “Inaomayara Solomon hi nganuida lei kala ning makāshungranga kala Proho wui vang sakāki kaji shim hi apam saikorali vāshungda tekhamateila kala mingkhamayāngla matakhak kahai khamathā shim akha sāngasakphalungra; chiwui vang eina ina ngarānsangmihaiphalungra.” Hithāda David mathiranglakha shimthingrā kachungkha ngarānsangmihaisai.

⁶ Chiwui thili anao Solomonli hokhuida Israelwui Proho Varewui vang shim sākhavai kasoi.

⁷ Davidna Solomonli hānga, “Inaomayara, iwui Proho Varewui mingli ina shim akha sākhavai phaningsai.

⁸ Kha Prohowui tui chi ili rāhānga, kaja, ‘Nana ashee kachungkha tāngasakhaira kala raila kachungkha ngararhaira; nana iwui mingwui vang shim masākāpaimara, khikhalajila okathuili nana iwui mangāli ashee chungna tāngasakhaira.

⁹ Yanglu, nali naomayara akha pharāra; ava chingri kahai mi ngasāra. Kuimareida khalei yangkashibingwui eina ina ali chingri kahai mira; kaja awui ming Solomon hora, kala awui thotli ina Israelli chingri vari kahai mira.

¹⁰ Imingwui vang ana shim akha sakāra. Ana inao ngasāra kala ina avāva̱ ngasāda, awui wungpamkhong Israelwui alungli mashimānda sakāmira.’

¹¹ Ara, inao, nana sāra da hāngkahai athishurda, nawui Proho Varewui shim chi sākāshap khavai Prohona nali ngasomiranu.

¹² Israelwuitungli mung khangasak tharan Prohowui ningkhami mayonshap khavai, mashun-makhui kala theishingkakhui ning Prohona nali ngarumsangmiranu.

¹³ Chieina Israelwui vang Prohona Mosesli kaso kahai ain kala shiyan-chikanbing chi mayontitakha na reikasang ngasāra. Pangmalu, kala pingmeilu. Mangacheealu; malung maringalu.

¹⁴ Prohowui shim sākhavaiwui vang chotlak eina ina, sinā matric ton thingkathum shāmati, lupāsā matric ton thingthumrāda mati, pithrai kala mari shānla makakhui kapeisanghaira; tarākha leili; thingla, ngalungla tarākha ngarānhaira. Chiwuitungli nanala phasangki kajina.

¹⁵ Nawuili ot kasā mi kachungkha lei: ngalung kashao mila, ngalung mistrila, thing mistrila, kala khangatatei pāngthem kathema shānla makakhui leili;

¹⁶ sinā, lupāsā, pithrai, kala mariwui ot sākathathei, kathethembing lei. Ngakarthuida sālu Prohona nali ngasomiranu!”

¹⁷ Israelwui kathānbing saikoralila anaomayara Solomonli ngachonmi khavai Davidna kasoda hānga,

¹⁸ “Nathumwui Proho Vare nathumli mangasomala? Apam kachiva̱li nathumli chingri kahai mamimala? Kaja rida pamkasābing iwui pāngli horsangmi, kala athumwui ngalei chi Proho awui mibingli mihaira.

¹⁹ Ara, nathumwui ningla, wuklungla zangda nathumwui Proho Vareli phālu. Ngakarthuida Proho Varewui kathar shim chi sakālu, chithāda sāda Prohowui tuingashit oko kala Varewui kathara khorkhongla Proho mingwui vang sakakā shim chili khuizangpaira.”