1 THOTRINCHĀN 18 - Kathara Bible (BSI)

Davidna Rai Khayui

¹ Davidna Philistinenaobingli yuihaida athumli hamsang ngasaka; kala athumwui eina Gath kala chiwui kha̱ khalalei ana khuisera.

² Ana Moablila yuihaida, athumla Davidwui rao sāsera, kala shai khuirāmi.

³ Euphrates kongli awui onrā sākā khavai Hamathshong khavā atamli Zobahwui awunga Hadadezerlila yuihaowa.

⁴ Awui eina Davidna siguigari thingkha, sigui raimi thingshini kala phei raimi thingmaga̱ khuiya; kha gari kaphunga siguibingwui phei sātekmiserhaida gari shākhawui vangmang taimi.

⁵ Zobahwui awunga Hadadezerli ngachon kavai Damascusli khalei Syrianaobing rāda athum thingmaga̱da khanili Davidna shaothathaowa.

⁶ Chiwui thili Davidna Damascuswui Syriali raimi pamkhavai akha haihaowa, kala Syriawui mibingla Davidwui rao sathuihaoda shai chigata. Davidwui kazatpam kachiva̱li Prohona maiyā ngasaka.

⁷ Hadadezerwui eina chāngvei awui raimibingna khuikaphung chi Davidna khuilaga Jerusalemli khuiunghaowa.

⁸ Kala Hadadezerwui keinungbing Tibhath kala Cunwui eina pithraisā Davidna kachungkha khui; chieina Solomonna pithraiwui shamadrunao, pithraiwui pakra̱ kala khorkhong sākhui.

⁹ Hamathwui awunga Touna, Zobahwui awunga Hadadezerwui raimi katongali Davidna yuihaira da kashā tharan,

¹⁰ anaomayara Hadoramli Davidwuili chihovada ringkaphawui salamtui ahāng ngasaka kaja Hadadezerli rai salaga ana yuihaowa; Hadadezar hi Touli rai sachinga. Kala ana Awunga Davidli sināwui, lupāsāwui, kala pithraiwui ot ayur ngateiteida khuivāmi ngasaka;

¹¹ otbing chieina ngasoda, Awunga Davidna, yur khangateiwui eina kaja, Edomwui eina, Moabwui eina, Ammonwui eina, Philistinewui eina kala Amalekwui eina akakhui sinā lupāsā chi Proholi tharchigatserhaowa.

¹² Zeruiahwui nao Abishaina Edomwui mi thingtharāda chishat Machi Leiwukli shaothata.

¹³ Ana Edomli raimi haikhavai sākai; kala Edomwui mibing Davidwui rao sathuiserhaowa. Davidna kazatzatpam kachida Prohona maiyā ngasaka.

¹⁴ Chithāda sāda Davidna Israel saikorawuitungli mungda, awui mi saikorali ngaraichā eina mashun-makhui bichar sāmi.

¹⁵ Kala Zeruiahwui nao Joabna raimibingli yanga; Ahiludwui naomayara Jahoshaphatna kapime sai;

¹⁶ Ahitubwui nao Zadok eina Abiatharwui nao Ahimelechna pāngmon sai, kala Shavshana kapime sai;

¹⁷ kala Jehoiadawui naomayara Benaiahna Chereth eina Pelethnaobingwui raimitungli yanga; kala Davidwui naongarābingna awungawui otpamli otva̱ sāsera.