1 THOTRINCHĀN 16 - Kathara Bible (BSI)

¹ Davidna ngarān kahai kachonshimlungli athumna Varewui ningkhami oko chi zanghaihaowa; kala rikkatāchigat eina ningyatchigatla Vareli pha̱phayai.

² Davidna rikkatāchigat eina ningyatchigat kupkahai tharan Davidna Prohowui ming singda mibing saikorali somi;

³ kala sha̱nao mayarnao mateila Israel saikorali khamui hāngkharip, sāmarim akharip, kala drakhātheikao hāngkharip da yaowa.

⁴ Chili lāngda Prohowui ningkhami oko mangāli pamda Vareli pomi khavai masot mikhavai, ningkashi chithei khavai Levinao mi kaikhali kapangsanga.

⁵ Asaphna kathāna sai, awui thili Zechariah, Je-iel, Shemiramoth, Jehiel, Mattithiah, Eliab, Benaiah, Obed-edom, kala Je-iel; athumna tingteilā eina lyre singa, kala Asaphna kortar katinga,

⁶ Benaiah eina Jahaziel pāngmonna Varewui tuingashit oko ngalemli talla̱ atam makaila khongpama.

Masotkhami Laa

⁷ Chiwui thili, Davidna Proholi ningkashi khamiwui laa Asaph eina achinā ngarāna sākhavai rimeithuida phāsanga.

⁸ O Proholi ningkashi milu, amingli ngakaolu; awui otsak mibingli theingasaklu!

⁹ Amingli masotlaa sālu, awui matakhak kahai otsak hāngmilu.

¹⁰ Kathara amingli tekmateiranu, Proholi kaphābingwui ning mathānranu!

¹¹ Prohowui pangshap phālu, ana ngasokhami phāchinglu!

¹² Ana matakhak kahai ot sākahai phaningunglu, maphaningkharar otsak, ana hangtā kahai mashun bichar saikora!

¹³ O awui rao Abrahamwui naothei, kapangkhui kahai, Jacobwui naomayarabing!

¹⁴ A ithumwui Proho Varelaka; okathui hupta ana bichar sākhamena.

¹⁵ Awui tuingashit khamalai mavaimana; ana kaso kahai tuila thot thingthing phaningchinga,

¹⁶ Abrahamli tuingashit sākahai, Isaacli ngashitsang kahai,

¹⁷ awui shiyan sāda Jacobli hangkhami, khangachei maleila Isaacli ngashit kahai,

¹⁸ “Canaan ngalei nali mira, hi nawui shimlui sāra.” da hanghai.

¹⁹ Athum kateokhalakha, mina matheikhami atamli, chili ram kazata sāda,

²⁰ yur akhawui eina yur akhali, wungram akhawui eina wungram akhali zatlakha,

²¹ ana nathumli khipānakha mayansai ngasakmana; athumwui vang eina awungabingli khararda,

²² hānga, “Ina tharchisinmi kahaiali masāphāphālu, iwui marānbingli sākashi masālu!” da hānga.

²³ Okathui hupta Proholi solu! Thangkachida awui huikhami tui hāngmilu.

²⁴ Awui tekhamatei miyur saikorali chishātlu, awui matakhak kahai otsak yur saikorali hānglu!

²⁵ Kaja Prohova hakmahālaka, khayāshilak eina khorumphalungra; vare saikorawuitungli Ali ngacheerang phaningra.

²⁶ Kaja miwui varebing meoma̱ mānga; kha kazingram Prohona sai.

²⁷ Khangamla, khayākakāla awui mangāli lei; yāng kala khamathānla awuili leisera.

²⁸ Amingli mikharān O miyurwui shimkhur saikora, Proholi masot chigatlu, tekhamatei, pangshap Proholi milu.

²⁹ Amingli tekhamatei mikharān khuirāda amingli milu kathara sāri shaksāda; Proholi khorumlu;

³⁰ okathui hupta ali ngacheelu; apuk-apaga mangachei khavai ana rungshingmihaira.

³¹ Kazingramna mathānranu, okathuina ringphāranu! kala saikorana, “Prohona munga” da hāngranu!

³² Ngayi kala chiwui lungli khaleibingna ngaphaoranu, luiwukna kala chiwui lungli khalei huptana mathānranu.

³³ Chieina ngahong thingna Prohowui mangāli khamathānwui vang laa sāra, kaja ana okathuili bichar sākhavai rai.

³⁴ Proholi ningkashi milu, kaja a kaphāna; kaja awui makhangachei leikashi katang mavaimana!

³⁵ Hithādala hānglu: “Ithumli ngatangmilu, O ithumwui huikhame Vare, ithumli kahuimilu yur khangateiwui eina kazipkhuida kahuimilu; kathara nawui mingli ningshichingra, tekhamatei chiwui vang masot chigatra!

³⁶ Israelwui Proho Vare chili katang mavaila soranu” Chieina mi saikorana “Amen” da hāngda Proholi masot chigata.

Jerusalem eina Gibeonli Khokharum

³⁷ Thangthangwui sakhangayi ot chi, Prohowui tuingashit okowui ngalemli pamda otram ngatha̱ching khavai, Davidna Asaphli ngasoda achinā ngarāli chili haihaowa.

³⁸ Obed-edomlila ngasoda awui mi hangtharukta chishat chili haihaowa, kaja Jeduthunwui naomayara Obed-edom eina Hosahna khāmong khamayona sai.

³⁹ Kala pāngmon Zadokli ngasoda achināngarā pāngmonbinglila Prohowui tabernacle pam chiya, Gibeonwui kajuiya pamli haihaowa,

⁴⁰ Israelli Prohona kakaso kapi kahai athishurda hanphutungli rikkatāchigat ngathor ngazin pha̱phayāching khavai kahaina.

⁴¹ Athumli ngasoda Heman eina Jeduthunla Prohowui makhangachei leikashi chiwui vang ali ningkashi mikhavai mingsinda hokakhui athum zangsera.

⁴² Kathara laa sākhavai Heman eina Jeduthunna talla̱ eina kortar singa. Jeduthunwui naomayarabingli khāmong mayon ngasaka.

⁴³ Chiwui thili mi saikora kachichāshiwuili ungserhaowa, Davidla ashi shimli somi khavai unghaowa.