1 THOTRINCHĀN 14 - Kathara Bible (BSI)

Jerusalemli Davidna Kasāsābing

¹ Tyrewui awunga Hiramna Davidli paomebing chihovai; kala shim sākhavai cedarthingla, ngalung mistrila, thing mistrila chihovai.

² Chi theilaga, Prohona ali Israelwui awunga sakhangasakna, kala awui yur Israelli mai kākhangasakna da theikhui.

Jerusalemli Davidwui Nao Pharākasang

³ Davidna Jerusalemli leilakha prei chungmeida khui, kala mayarnaola sha̱naola kachungkha pharai.

⁴ Jerusalemli leilakha pharākakhui naobingwui aming hina: Shammua, Shobab, Nathan, Solomon,

⁵ Ibhar, Elishu-a, Elpelet,

⁶ Nogah, Nepheg, Japhia,

⁷ Elishama, Beeliada, kala Eliphelet.

Philistinenaobingli Khayui

⁸ Davidli Israel katongawui awunga sangda tharchisinmihaira kaji kashā eina Philistinenaobingna Davidli phāvai: kala Davidna chi kashā eina athumli ngarar khavai angaroka.

⁹ Chitharan Philistinenaobingna Rephaimwui tampākli ngaponzatsai.

¹⁰ Kala Davidna Vareli ngasana, “Philistinenaobingli mavāngararrakhala? Nana athumli iwui pāngli horsangmirala?” da khangahān eina, Prohona ali, “Vālu, athumli nawui pāngli horsangmira.” da hānga.

¹¹ Chieina ana Baal-perazimli vāda athumli yuihaowa, kala Davidna, “Kong kashok thāda yangkashibingli Varena ipāng eina yuingasakhaira” da hānga. Chiwui vang eina apam chili Baal-perazim da hoi.

¹² Yangkashebingna athumwui vare nothaserhaida, Davidna riktā ngasakhaowa.

¹³ Philistinenaobingna latluida tampākli rangararluiya.

¹⁴ Davidna Vareli ngasankhalui tharan, Varena hānga. “Athumwui thili mavālu, kha kuikhuilaga balsam thing khalei chili kāroda athumli ungngararlu.

¹⁵ Kala balsam thingrong tungli mi kazatkhon kashā tharan nathumna shokngararlu; kaja, Philistinenaobingli sāthat khavai Varena rida vahaira.”

¹⁶ Varena kakaso athishurda Davidna sai, kala Gibeon eina thuida Gezer vāshungda Philistinenaobingli sāthata.

¹⁷ Davidwui mingkhamayāng ngalei saikorali vāshunga, kala Prohona yur saikorawui ningli ngachee khavai sangmi.