1 THOTRINCHĀN 11 - Kathara Bible (BSI)

Davidli Awunga Kasang

¹ Chiwui thili Israel saikorana Hebron ngaleili Davidwuili kazip ngarumda hānga, “Yanglu, ithum nawui ashee asāna.

² Achālakha Saulna awunga salakhala, Israel mibingli thānshokkhame chi nana; kala nawui Proho Varena nali, ‘Nana iwui Israel mibingli homra, kala nana iwui Israel mibingli mungra’ da hangkahaina.”

³ Chiwui vang Israelwui kathāna saikorana Hebronli awungawuili vai; kala Prohowui mangāli Davidna athumli tuingashit akha sai. Kala Prohowui tui Samuelna hāngkahai athishurda Israelwuitungli awunga sākhavai Davidli tharkachisin thao neomi.

Davidna Zion Kakhui

⁴ David eina Israel saikorana Jerusalemli vai, chiya Jebus, Jebusnaobingna pankhavai apamna.

⁵ Jebusnaobingna Davidli, “Na hili marāpaimara” da hānghaowa. Chithālala Davidna Zion, chiya Davidwui keinung chi ngapaikhui.

⁶ Davidna, “Jebusnaobingli shaothatkharepā china raimi kathāna sāra.” da hānga. Kala Zeruiahwui nao Joabna sāthatrithui kajiwui vang ana kathāna sāhaowa.

⁷ Davidna raipan khamakang chili kapamwui vang Davidwui keinung da kahona.

⁸ Keinung chiwui kuikhamarei Millo eina thuilaga kuimareimitta ngaveiphinhaowa; kala mavākapei keinung chiwui pambing chi Joabna chiphokhui.

⁹ Ashangva̱wui Prohona ali ngasokhamiwui vang Davidna mataisangkhangai mataisanghaowa.

Davidwui Kapingabing

¹⁰ Chitharan Davidwui raimi kathānabing chi hina, Israelwui pongli Prohona hāngkahai tui chiwui athishurda Davidli awunga sāngasak khavai Israel saikora eina ngarumda wungramwui vang panglāk eina kakatombing chi hina.

¹¹ Hi Davidwui kapinga raimibingwui otsakna: Hachmonwui Jashobe-am chi kapinga mi kathumwui phungva̱na. Ana sakkhali mi shākathum kazei eina rungthata.

¹² Kapinga kathumwui kakhane chi Ahohli khalei Dodowui nao Eleazarna.

¹³ Philistinenaobingna rai saukida kakazip tharan ana Davidli ngasoda Pas-dammimli pamsai. Luipam akhali nāpai kachungkha matheisai, kala athumna Philistinenaobingwui eina yāmhaowa.

¹⁴ Kha ana lui chiwui alungthungli awui pheinganin khuida Philistinenaoli shaothatserhaowa; kala Prohona hakmahālak eina rai yuimiya.

¹⁵ Raithana thumrāwui ngachaili athum kathumna, Davidna pamkhavai Adullamwui lungkhurli vai; chitharan Philistinepashi Rephaim tampākli rairum sāpamsai.

¹⁶ Atam chili Davidna raipanlungli pamsai; kala Philistinewui raimi Bethlehemli leisai.

¹⁷ Davidna mangngaireoreo eina, “Iyavo, Bethlehemwui ngavei ngalemli khalei ra̱khong chiwui tara̱ mimangsi kaja chāng!” da hānga.

¹⁸ Chieina kapinga kathum china Philistinenaobingwui rairumphung muivālaga Bethlehemwui ngaveipheili khalei ra̱khong chiwui tara̱ asokkhuilaga Davidli khuiungmi. Kha Davidna chi mamangmana; ana Prohowui mangāli heishokta hānga,

¹⁹ “Vare mangāli ina hithāda masālakmara. Mirin hamlaga khavabingwui ashee ina mangrala? Kaja athumwui mirin hamlaga hi khuikhaungna.” Chiwui vang eina ana mamangthuwa. Kapinga kathum china hikathā otsakbing sāshapa.

²⁰ Chitharan Joabwui achinā Abishaina thumrāwui kathāna sai. Ana mi shākathumli kazei eina rungthathaida, athum kathumwui thāda masot samphanga.

²¹ Thumrā chiwui ngachaili a aming zatmeithuida ana kathāna sai; kha athum kathumwui kaping makashungmana.

²² Jehoiadawui naomayara Benaiah, Kabzeelli khalei rai khamarāka mina; hakkhamahā ot kasā mina, ana Moabwui ariel khani sāthata. Kala thangkha horam thakmahungda leilakha leikhur lungli kazingkha̱ akha zangsathatkhui.

²³ Kala khuining phangā kajui Egyptwui mi akhoka akhali shaothata. Egyptpa chiwui pāngli kazei rā-kapemrikha akha singsai; kha Benaiahna khāmshui singlaga awui kazei chi angapaikhui, kala mipa chili akhalattawui kazei chieina rungthata.

²⁴ Jehoiadawui nao Benaiahna hikathā ot sāda, kapinga kathumwui thāda masot samphanga.

²⁵ Thumrāwui ngachaili aming zatlaka, kha kathumwui chithāda makashungmana. Davidna awui ngakkhame sāngasaka.

²⁶ Raimibingwui ngachaili kapingabing chiya, Joabwui achinā Asahel, Dodowui naomayara Bethlehempa Elhanan,

²⁷ Harodwui Shammoth, Pelonwui Helez,

²⁸ Ikkeshwui naomayara Tekoali khalei Ira, Anathotwui Abi-ezer,

²⁹ Hushathpa Sibbecai, Ahohpa Ilai,

³⁰ Netophahwui Maharai, Baanahwui naomayara Netophahpa Heled,

³¹ Benjamin shang Gileadli khalei Ribaiwui naomayara Ithai, Pirathonwui Benaiah,

³² Gaash kongpheili khaleiya Hurai, Arbathpa Abiel;

³³ Baharumwui Azmaveth, Sha-albonwui Eliahba,

³⁴ Gizonpa Hashem, Hararpa Shageewui naomayara Jonathan,

³⁵ Hararpa Sacharwui naomayara Ahiam, Urwui naomayara Eliphal,

³⁶ Mecherathpa Hepher, Pelonpa Ahijah,

³⁷ Carmelwui Hezro, Ezbaiwui naomayara Naarai,

³⁸ Nathanwui achinā Joel, Hagriwui naomayara Mibhar,

³⁹ Ammonpa Zelek, Be-erothwui Naharai, Zeruiahwui nao Joabwui raisāri phungme,

⁴⁰ Ithriwui Ira eina Gereb,

⁴¹ Hitpa Uriah, Ahlaiwui naomayara Zabad,

⁴² Reubenpa Shizawui naomayara Adina, Reuben shangwui kathāna kala thumrāna ali ngasozata;

⁴³ Maacahwui naomayara Hanan, kala Mithnawui Joshaphat,

⁴⁴ Ashteratpa Uzzia, Aroer shangwui Hothamwui naomayara khani Shama eina Je-iel,

⁴⁵ Shimriwui naomayara Jedia-el, kala agato Tizipa Joha,

⁴⁶ Mahavipa Eliel, kala Elna-amwui naomayara khani Jeribai eina Joshaviah, Moabpa Ithmah,

⁴⁷ Eliel, Obed, Ja-asiel, athum Mezoba-itenaosera.