1 THOTRINCHĀN 10 - Kathara Bible (BSI)

Saulshi Vanaongarā Kathi

¹ Chitharan Philistinenaobingna Israelnaobingli rai ngararda Israelpāshi yāmhaowa, kala Gilboa Kaphungli thisanghaowa.

² Philistinenaobingna Saul eina anaomayarabinglila ngaphankhuida awui naomayara Jonathan, Abinadab, kala Malchishualila sāthatse haowa.

³ Rai pangkhangai panghaida Saulli malā eina kapza̱haowa.

⁴ Chieina Saulna awui raisāri phungkhame chili, “Nawui raighai sutshokta ili tothathaolu, chi maningakha ahui marimkashokbing hina ili zeingaruishilak eina sahenra.” da hānga. Kha raisāri phungkhami china ngacheenahaida mamayāthuwa. Chiwui vang eina Saulna awui raighai khuilaga khalatta ngaronthathaowa.

⁵ Awui raisāri phungme china Saul thikahai chi kathei eina ala akhalatta raighai eina ngaronthathaowa.

⁶ Chithāda, Saulla anaomayara kathum, ashi shimkhur thitkha sāhaowa.

⁷ Leiwukli kapam Israelnaobingna, Saulla, anaomayarabingla thiser kahaiwui vang ashi raimi yāmkahai chi theilaga, athumwui keinung chihohaida yāmserhaowa; kala Philistinenaobingna chili apamhaowa.

⁸ Akhama kathā Philistinenaobingna ot akhangapon atamli Saulla, anaomayarabingla Gilboa kaphungli thiserhaisai.

⁹ Athumna Saulwui raisāri raikhui, kala akui rangkhui; laga mibingna kala athumwui meoma̱na shākhavai pao mida apam kachiva̱li paome shivata.

¹⁰ Awui raisāri athumwui khorumshimli haihai, kala akui Dagonwui shimli hokthanghai.

¹¹ Kha Saulli kasā chi Jabesh-gileadwui mibingna kashā eina,

¹² rai khamarākabingna vāda Saulwui angun kala anaomayarabingwui angun akhui; kala aram Jabeshli khalei shirimthingpheili ara̱kui chifahaida zimiksho shinithang kakhum eina pama.

¹³ Saulna ningtongda mashitkasangwui vang thihaowa; kaja Proholi mashitsangmada awui kahāng manganāla thānmi khavai khanongli angasana;

¹⁴ kala Prohowui thankhami mangahānmana. Chiwui vang eina Prohona shaothathaowa, kala awui wungram Jessewui nao Davidli mihaowa.