1 SAMUEL 9 - Kathara Bible (BSI)

Saulli Awunga Kakapang

¹ Benjaminwui mi akha aming Kish hoda leisai, Benjamin shimkhurwui Aphiahwui naomayara, Bekorathwui naomayara, Zerorwui naomayara, Abielwui naomayarana; kashānga mina.

² Awui naomayara Saul hoda yarkhoka akha leisai. Israelwui alungli ali mayar mathākhamei khipākha maleisāmana; mibingli ana ayartui eina thuida juimeisera.

³ Chitharan Saulshāvā Kishwui gadhābing shimānhaowa. Chieina Kishna anaomayara Saulli hānga, “Rao akha thānphungda gadhābing chi phāvālu.”

⁴ Kala anina Ephraimwui kaphungram kānvai kala Shalishah ngalei kanvādala phāvāya, kha masamphangthuwa. Anina Shaalim ngalei eina tangda phāvai, kha chilila maleisāthuwa. Chiwui thili anina Benjaminwui ngaleilila phāvāsera, kha masamphangthuwa.

⁵ Anina Zuph ngaleili vākashung eina Saulna ali khangaso raopa chili hānga, “Ralu, ini hanunghaosa, maningakha gadhābingli hailaklaga iniwui vang ishāvāna wukkhananghaora.”

⁶ Kha ana ngahānkai, “Yanglu, keinung hili mibingna khayākashe Varewui mi akha lei; ana kahahāng mashungsera. Ini ali angahānyangsa, ini kachishong vaakha phārakhala kaji ana hā ngmishaplapai.”

⁷ Saulna awui rao chili hānga, “Kha inina vaakha khi khuivāmira? Iniwui khamuila kānhaira, Varewui mi chili khi vāmira? Iniwui khi leili?”

⁸ Rao china Saulli ngahānkāluishitta hānga, “Iwui pāngli lupāsā shekel akha khuiphungda lei; hi Varewui mi chili amilaga iniwui shongfa hāngmi ngasaksa.”

⁹ (Khareli Israelwui alungli mi akhana Varewui tui ngahānkhuiga jiakha, ana, “Rālu, ithum khanongli vausa” da hānga; kaja aruihon marānbing da kaho hi khareli khanong hosai).

¹⁰ Kala Saulna awui raoli, “Phālakhaira, khanongli vausa,” da hānga. Chieina anina Varewui mi khaleipam keinung chili vai.

¹¹ Anina keinungli vākida kaphung kakā eina tara̱ katā ngalānao kachungkha samphangda, “Khanongpa chi hili leila?” da athumli ngahāna.

¹² Athumna, “Lei; yanglu, naniwui mangāchangli kāhaira, thākmeilu; aruichang keinung hili kharāna, kaja aja mibingna hanphutli pha̱phayā khavai lei.

¹³ Ana phazā khavai kaphung kajuili makāranglakha, nanina keinung lungli zangkhaleoda ali samphanghaora; kaja pha̱kaphayā hili ana somiki jihaoda, ana masomiranglakha khipākha mazāmara; chiwui thili horākahaibing saikora zānaora. Kaulu, samphangngalanghaora” da athumna hāngmi.

¹⁴ Chieina anina keinung chili vai. Anina keinungli kazang eina Samuelna kaphung kajuili kākhavai aniwuishong shokkharā anina thei.

¹⁵ Chitharan Saul marāranglakha ayā kathā Prohona Samuelli phongmihairasai;

¹⁶ “Akhama, atam hitharan, Benjamin ramwui eina ina mi akha chihorāra. Iwui Israel yurwui awunga sākhavai ali thao neomilu. Philistinenaobingwui pāng eina ana iwui yurbingli kanmira, kaja iwui yurbingwui kachotkachāng ina theihaira, khikhalajila athumwui khangakaokhon ili rāshunghaira.”

¹⁷ Samuelna Saulli kathei eina, Prohona ali hānga, “Ina nali mi akhawui pongli hāngkahai mi chi hina! Iwui yurbingwuitungli mungki kaji chi hipa hina.”

¹⁸ Chieina Saulna Samuelli ngaveipamli angarokta, “Khanongpawui shim kali leikhala hāngmilu” da ngahāna.

¹⁹ Samuelna Saulli ngahānkāda hānga, “Khanong chi ina; ili kajuipam chili ngasokālu; kaja aja na ili kāphazāngarumra; laga ngathorma ina nali shiunaora, kala nawui ningli kaphaning saikora chi ina hāngmira.

²⁰ Nawui gadhābing shimānda kathumthang kahai chiwui vang wukmakhanangalu, kaja chibing chi samphanghaira. Israelna kahaomeikap kaji chi khipakhala? Chi na eina navāwui shimkhur maningmala?”

²¹ Saulna, “I Israelli teomeikap kaje Benjamin shangwui eina maningmala? Kala ishi shimkhur Benjamin shangwui shimkhurbingli nemmeikap kaje maningmala? Chithakha kathāda nana ili hikathā tui hāngpairakhala?” da ngahānkai.

²² Chieina Samuelna Saul eina awui raoli shimlungli thānzangda, athum kharā mi thumra sha̱khawui mangāshong chipama.

²³ Kala Samuelna hamkahangali, “Ina, ‘Ngateida haisalu’ kaji yar chi khuirālu,” da kasoi.

²⁴ Chieina hamkahanga china aphei eina asai chi Saulwui mangāli haimi; kala Samuelna hānga, “Yanglu, yar sākahai chi nawui mangāli rungmihaira, zālu; khikhalajila retmi kahai atam chi maungshungranglakha eina tangda nawui vang yar sakahaina yaruili zāngarumlu.” Chithāda chithang Saulna Samuelli phazāngaruma.

²⁵ Athumna kaphung kajuiwui eina keinungli katā tharan, shimtungli Saulwui vang pet sāmihaisāda ana chili pikhui.

Samuelna Saulli Awungapam Thao Neokhami

²⁶ Chiwui thili kazing kathang eina Samuelna Saulli shimtungli kāmathota, “Thuilu, ara ina nali shiunhaora.” Chieina Saulna ngakarthuida ani shongfali ngasovai.

²⁷ Athumna zatmamānda keinung ayar vākashung eina Samuelna Saulli hānga, “Raopāli inili rida zathaolu da hānglu, kala a rithui kahai eina kasha̱kha hili nganinglu, ina nali Varewui tui hāngmira.”