1 SAMUEL 8 - Kathara Bible (BSI)

Israelna Awunga Akha Kapo

¹ Samuel sarkahai eina, ana awui naomayarabingli Israelli bichar sāngasaka.

² Naomayara pharākharewui ming Joel hoi kala kakhanewui ming Abijah hoi; Beer-shebali anina bicharsame sāsai.

³ Chithālala anina avāva̱wui kasā thāda masāmana, kha aniwui kānnā khavai khaleishong ngareithuihaowa; kaja anina pheisā zālaga bichar mashun ngui ngasakhaowa.

⁴ Chieina Israelwui khararnaobing saikorana kazipkhuilaga Ramahli vāda Samuelli samphanga,

⁵ kala ali hānga, “Yanglu, na sarhaira kala nanaomayara khanina nawui thi mashurmana; chiwui vang eina yur khangateiwui thāda ara ithumli mungkhavai awunga akha kapangsang milu.”

⁶ Kha, “Ithumli mungkhavai awunga akha phasang milu” kaji kashā eina, Samuel maringphāthuwa. Chieina Samuelna Proholi seihā sai.

⁷ Kala Prohona Samuelli hānga, “Athumwui kahahāng chi ya jihaolu; kaja athumna nali makhuikasang maningmana, ili makhuikasangna.

⁸ Athumna ili kasāsā khavāvā saikorawui athishurda, ina athumli Egyptwui eina thānshokthang eina thuida aja rāshungda, ili horhailaga khangatei varebingli otram khangatha̱ chithāda, nalila athumna chithāda sāda lei.

⁹ Chieina ara athumwui kahāng chi nganāhaolu; kala athumli mungki kaje awungana sāki kaji apongbing chi athumli hāngchitheilu.”

¹⁰ Chieina Samuelna ali awunga rākapobing chili Prohowui tui saikora chi hānga.

¹¹ Ana hānga, “Nathumwuitungli khamunga awunga china hithāda sāra: ana nanaomayarabingli khuira kala awui siguigari kala sigui katonga raimi sāngasakra, kala kaikhali awui siguigari mangāli zatngasakra;

¹² akhalattawui vang thingthingwui kathāna, hangphangāngāwui kathāna kapangsangra; kala kaikhali awui lui ot sāngasakta mā hātngasakra; ngayarda raiwui zeighai-ngahā kala siguigariwui otyur semngasakra.

¹³ Ana nanao ngalāva̱bingli, thao neokhamiva̱, hamkahang, kala khamui kasā ot sākhavai khuira.

¹⁴ Ana nathumwui eina mathāmeikap kaji luila, yāmguila, olive yāmguila, khuida awui raobingli mira.

¹⁵ Ana nathumwui eina theishirai khum tharāwui akha, luivāt saikorawui einala ana khuilaga awui otva̱bingli kala araobingli mira.

¹⁶ Ana nathumwui rao mayarnaobing kala rao sha̱naobing, mathāmeikap kajebing khuihaora kala mathameikap kaje nawui sei, gadhā awui ot sākhavai khuihaora.

¹⁷ Ana nathumwui yao ashangva̱wui khum tharāwui akha khuira, kala nathum awui raonao sāra.

¹⁸ Kala chithang nathum khalattana kapangkakhui awungawui vang eina nathumna chapngachāra; kha chithang nathumli Prohona mangahānkāmimara”.

¹⁹ Kha mibingna Samuelwui tui makhuisangngaithuwa, kala athumna hānga, “Masāpaimara! kha ithumwuitungli awunga leiphalungra,

²⁰ kaja, ithumla yur kateibingwui thāda awunga leida ana ithumli mungra kala ithumwui rai kasāli ana mangāli thānda ngararra” da hānga.

²¹ Kala mibingwui tui saikora chi shālaga Samuelna Prohowui mangāli tui chi latluida hāngchithei.

²² Kala Prohona Samuelli hānga, “Athumwui kahāng chi ya jihaolu, kala awunga akha sangmihaolu.” Chieina Samuelna Israelwui mibingli “Kachicha ramli ungserhaolu” da hānga.