1 SAMUEL 30 - Kathara Bible (BSI)

Davidna Amalekbingli Khayui

¹ Chitharan kakathumathang Davidna awui mibingli ngasoda Ziklagli ungkashung tharan, Amaleknaobingna Negeblila Ziklaglila rai rātāhairasai. Athumna yuihaida Ziklag mei sa̱tāmihairasai,

² kala chili leikasā sha̱naobing, khararnaosan mateila, tukchipthuihairasai, sakathatva akhala masāthatmana, kha athumli khuiphungda thuihaowa.

³ Kala David eina awui mibingna keinungli ungkhayang tharan, aram mei sa̱tāmihairasai, kala athum preiva̱ngarā, naomayarabing tukthuiserhairasai.

⁴ Chieina David kala ali khangasobingna soso ungchapta yang makānranglakha eina tangda chapa.

⁵ Davidwui preiva̱ khani Jezreelwui Ahino-am eina Carmelwui Nabalwui rameiva̱ Abigaillila tukthuihairasai.

⁶ Davidla wukkhananglākhaowa, kaja mibingna ali ngalung eina horthatra jihaowa. Khikhalajila naomayarabing tukthuiser kahaiwui vang mibingna ning chotnāhaowa. Kha Davidna awui Proho Varewui lungli pangshap samphanga.

⁷ Kala Davidna pāngmon Abiathar, Ahimelechwui naomayarali, “Ephod khuirālu” da kasoi. Chieina Abiatharna Davidli ephod chi khuivāmi.

⁸ Kala Davidna Proholi ngasana, “Ina raimibingwui thili kharomvārala? Ina athumli ngaphanshaprala?” Ana “Kharomvālu, kaja nana athumli ngaphanlakra, kala angatangkhuilakra” da ngahānkai.

⁹ Chieina Davidna ali khangaso shātharuk chi thānphungda Besor kongli khavā eina, mazatkathukbingli chili nothahaowa.

¹⁰ Kha Davidna shāmati thānphunglaga kharomthuihaowa, kha mi shākhani chotnāhaida Besor kong mamakānkārarthuda haihaowa.

¹¹ Egyptwui mi akha tampākli leisāda athumna Davidwuili thānunga, kala athumna ali khamui mishai kala tara̱ mimanga,

¹² kala athumna khaorātheiwui khamuikainao akha, kala drakhāthei amazān khani da mi. Kala ana chi shaikahai thili awui ning mathingungrasai; kaja kathumthang ngashun-ngayā ana khikha mashai mamanglakmana.

¹³ Kala Davidna ali “Na khipāshikhala, kala na kachiwui eina kharākhala?” da hānga. Ana ngahānkai, “Iya Egyptwui mina kala Amalek akhawui raona; I kazā kahaiwui vang iwui akhavāna nothahaida kathumthanghaira.

¹⁴ Ithumna Negebwui Cherethbing, Judahwui pam, kala Calebwui Negebli rai atai, kala ithumna Ziklagla mei sa̱tāmihaira.”

¹⁵ Kala Davidna, “Rai akatābing chili na ili thānvāmishaprala?” da ngahāna. Ana hānga, “Ili masāthatmara, lah iwui akhavāwui pāngli mahorsangmimara da Varewui mingli shākhi sakha, ina nathumli thānvāra.”

¹⁶ Chieina ana thānkhavā tharan, yanglu, athum ngalei pemda morsonglaga phāshak-phazāda pheichak sāsai; kaja Philistinenaobingwui eina kala Judahwui eina athumna kachungkha angaponkhui.

¹⁷ Davidna yupyapsap eina thuilaga akhama ngazin eina tangda angararda, ut katonga raimi shāmati maningla akhala mataimimana; ut katonga raimi shāmati chi yāmshokhaowa.

¹⁸ Amaleknaobingna khuithui kahai saikora chila, apreiva̱ khanila Davidna akankhuisera.

¹⁹ Kateola khareila, naongalāva̱ kala naomayarabing, khuithui kahai saikora Davidna akhuiluishitsera.

²⁰ Davidna athumwui seila, yaola ngapaikhuilaga mibingna chi homungda “Davidna angapon kakhuina” da awui mibingna hānga.

²¹ Chiwui thili Davidna awui mi mazatthukmada Besor kongli nothā kahai athumwuili latkhaung eina, athumna David kala ali khangasobingli angaroka. kala Davidna athumli akhanganai eina shālam sai.

²² Davidli ngasokhavābingwui ngachaili makhayā ning kateo mi kaikhana, hithāda hānga, “Makharabingle kachichā preiva̱ kala naongarā maningla, ithumna angaponkakhui hi mamimara.”

²³ Kha Davidna, “Chimathāpaimara, ichināngara! yangkashebingwui eina Prohona ithumli huimihailaga chithāda masāpaimara.”

²⁴ Khavābingna khavāman khuira, shim khamayonbingle yar masāmara kaji nali khipāna nganāsangrakhala? da hānghaowa.

²⁵ Kala chithang eina thuida aja rāshungda ngaraichada yar kasā hi Israelwui shiyan-chikan kala sharphahor sāchinghaowa.

²⁶ Davidna Ziklagli ungkashung eina, ana awui ngasotnaobing Judahwui khararnaobinglila ngaponkakhui chi yar savāsera, kala “Hi Proholi yangkashebingwui eina ngaponkakhui nathumwui vang khamina” da hānga.

²⁷ Bethelli, Negebwui Ramothli, Jattirli,

²⁸ Aroerli, Siphmothli, Eshtemoali,

²⁹ Racalli, Jerahmeelwui keinungli, Kenwui keinungli;

³⁰ Hormahli, Borashanli, Athachli,

³¹ Hebronli, Davidli ngasoda awui mibingna khavā pam kachiva̱li ngayarmisera.