1 SAMUEL 29 - Kathara Bible (BSI)

Philistinenaobingna Davidli Makhamayā

¹ Chitharan Philistinewui raimi saikora Aphekli kaziphaowa; kala Israelwui mibing Jezreelwui ura̱pamli rairum sai.

² Philistine wungnaobingna thingthing, shāshā ngaherlaga zata kala Davidna awui mili thānlaga Achishli ngasolaga khanukshong zata,

³ Philistine raimi kathānabing china “Hebrewnaobing hi hili khi sākazatkhala?” da hānga. Kala Achishna Philistinewui raithānabingli, “Israelwui awunga Saulwui rao David hina iwuili rāpamda zingkum kasāngkhahaira; a kharā eina thuilaga aja eina tangda khikha khayon akhala masāmana” da ngahānkai.

⁴ Kha Philistinewui raimi kathānabingna ali malungvāthaida hānga, “Hanung ngasakhaolu, athumli ngasoda rai masāpaimara, nana athumli mikahai apam chili hanung ngasakhaolu; khipāna theira ithumli khalatta ngararluilapai. Ashi akhavāli ana kathāda asamphangrakhala? Mibing hiwui akui rangkakhui maningla?

⁵ Aramnaona pheichak eina ngasoda, ‘Saulna thingkhali sāthata, kala Davidna thingtharāli sāthata’ da akha eina akha laa kaphoka David chi hipa maningmala?”

⁶ Chieina Achishna Davidli hokhuida hānga, “Nawui ning kathar Prohowui ming singda kahāngna, kharethang eina thuilaga aja eina tangda ina nawui khayon matheilakmana, kala ajawui rai hili ini ngasoshang ngasotā sāra da phaningsai. Kha wungnaobingna mamayāmana.

⁷ Chieina hanunghaolu, chingri eina unghaolu; kaja nana Philistine wungnaobingli maringkaphā masāranu.”

⁸ Chieina Davidna Achishli hānga, “Ina khi khayon sāhaokhala? Nawuili otram rangatha̱kaphok eina thuida aja rāshungda khi theihaoda, ishāmei awungali ngasoda rai khangarar mavāpaimara kajikhala?”

⁹ Kala Achishna ngahānkāda hānga, “Iwui miktāli na Varewui kazingrao shātmakaka thai; chithālala Philistinewui raimi kathānabingna, ‘Raikhangararli ithumna ali mangasovāmara’ jihaowa.

¹⁰ Chieina nawui raobingli thānlaga ngathorshong ungulu, ngathorthakva̱ zingthan ngasha̱da zatulu.”

¹¹ Chieina Davidna awui mibingli thānphungda ngathorthakva Philistine ngaleili hanunghaowa. Kha Philistinenaobing Jezreelshong vāhaowa.