1 SAMUEL 25 - Kathara Bible (BSI)

David eina Abigail

¹ Chitharan Samuel thihaida Israel saikora rakazipta awui vang chapngachai, kala athumna ali awui shim Ramahli chizanhaowa. Chiwui thili Davidna Paranwui lamhāngshong tāhaowa.

² Kala Moanli mi akha leisai, ava Carmelli leihkhalon mina. Ava shānglaka; awui yao thingkathum, me thingkha da leisai. Ana yaohah chichāpta Carmelli pamsai.

³ Mi chiwui ming Nabal hoi, apreiva̱li Abigail hoi. Preiva̱ chi theithangmeilaka, azakla mathālaka; kha agaharava tamot eina achamla maphāmana; a Calebwui mina.

⁴ Lamhāngli Davidna leilakha Nabal yaohah kachichapa rārāli da shai.

⁵ Chieina Davidna yaronnao tharā chihoda hānga, “Carmelli vālu, kala Naballi iwui ming singda asamphanglu.

⁶ Kala hithāda shālam asālu, ‘Nala, nashi shimkhur kala nawui khalei saikora chingri kahai ngasāranu.

⁷ Nawui yao kachungkha lei kaji ina shāhaira; nawui yao kahombing ithumli ngasopamda ithumna khikha makaphā masālakmana, atam hirankha Carmelli ngasokapam hili athumwui ot khikha kashimānla maleimana.

⁸ Nawui yaronnaobingli ngahānyanglu, kala athumna nali hāngsera. Chiwui vang eina iwui mibingli khalumashanmilu; kaja ithum phanit zimiksholi kharāna. Nawui khalalei naraobingli kala nanaomayara Davidli khamilu da kapona’ da ahānglu.”

⁹ Davidwui yaronnaobing china Naballi asamphanglaga Davidwui ming eina ahānga, kala athumna chili angaraipama.

¹⁰ Nabalna Davidwui raobingli ngahānkai, “David khipākhala? Jessewui nao khipākhala? Aruihon akhavābingwui eina yāmkazata rao kachungkha lei.

¹¹ Iwui yaohah kachichāpbingwui vang ngarān kahai khamui, tara̱ kala sā hi, kachiwui eina kharākhala kaji makathei athumli mizā-mimanghaorala?”

¹² Chieina Davidwui yaronnaobingna thuihaowa, kala latungda ali unghāngsera.

¹³ Kala Davidna awui mibingli hānga, “Mi kachiva̱ raighai thāngkhuiserlu!” Kala athum kachiva̱na raighai thāngkhuiserhaowa, Davidla awui raighai thāngkhui; kala athum mi shāmati sha̱khana Davidwui thi shurda thuihaowa, kha shākhanina shim mayonpama.

¹⁴ Kha awui rao yaronnao akhana Nabal preiva̱̱ Abigailli hānga, “Yanglu, lamhāngwui eina Davidna awui paomebing chihorāda ishameili rākhoruma; kala ana athumli zeikhamhaowa.

¹⁵ Chithālala athumva phālaka, ithumli athumna makaphā masāmana; athumli hirankha ngasozatta tampākli zatlakha otnaola akhanida mashimānlākmana;

¹⁶ ngashun ngayā mateila ithumna yao hompamlakha athumna phākho thāda mayonmi.

¹⁷ Chieina hi theida khikasā phāmeirakhala kaji nana chukmajayanglu; ishameiwuitungli kala shimkhurli makahatlākla makaphā leiphalunghaora; ava achei-arei makatheiwui vang khipānakha mahāngpaimana.”

¹⁸ Chiwui thili Abigailna katotlak eina khamuishom shākhani, drakhāra̱ sangkhavai akhao khani, yao hemkazak kahai phangā, māngatai luk mati, kala drakhāthei akao amazān shākha, khaorāthei eina kasā khamui ahāng shākhani, gadhābingli shaksāmi.

¹⁹ Kala ana ashi yaronnaobingli hānga, “Nathum mangāli zatsālu; yanglu, I nathumwui thili rārāsanaora.” Kha ana agahara Naballi mahāngmana.

²⁰ Kala ana gadhāli tongda phungreina khayin kahaishong eina tai, yanglu, David eina awui mina awuishong tārāsai; kala ana athumli angaroka.

²¹ Davidna hithāda hānghairasai, “Mi hina khalei saikora, lamhāngli ina mayonmida akhala mashimān ngasaklak kaji hi arema ngasāhaira; kapha sākhamiwui vang ana ili makaphā hanmihaira.

²² Ngathorma, awui mayarnao saikorali akhanida mataimila masāthatser si kaje Varena Davidli theiranu.”

²³ Abigailna Davidli kathei eina, ana gadhāwui eina tunglaga ana ngaleili ngakhumshām khayākashi mi.

²⁴ Kala ana aphei singda hānga, “Khayon saikora chi iwuitungli tāranu, amei, narao iwui kapo hi khanganāmilu, kala naraowui tui kakhuisangmilu.

²⁵ Ameina achei-arei makathei Nabalwui tui makhuimilu; kaja aming thāda ala chithai, Nabal chi awui mingna, khangui chi awuili lei. Kha ameina chihokharā mibingli narao I masamphangthuwa.

²⁶ Chieina ara, amei, Prohowui ming singda kahāngna kala nana katheina, Prohona nawui eina ashee tāngasakta athut makhui khangasak hi theilaga narao ina kapona; kaja nawui yangkashe saikora, kala nali makaphā sākhangaibing Nabal thāda khonkashe ngasāserranu.

²⁷ Kala ara narao ina khuikharā ot hi ishameiwui thi kashur raobingli kakhuingasakmilu.

²⁸ Narao iwui khalāng kapheomilu da poli; kaja ishāmeina Proho wui vang rai ngararhaowa da mashoila Prohona nawui shimkhurli somira, kala nana ringlakha eina tangda nali makaphā akhala masamphangmara.

²⁹ Kalikhada mibingna nali kharomda namanglā khuikhavai rālala, nawui Proho Varewui kharingabingwui ngachaili ishameiwui manglā thummihaida mayonmira; kha yangkashebingwui manglāva kachāk-kathai thāda thaivāserhaora.

³⁰ Kala ishameiwui kaphawui vang Prohona hāngkahai athishurda sāmi kahai chitharan, kala Israelwui awunga sākhangasak tharan,

³¹ ameiwui khanang khavai apong, lah ningkachot maleimara; kaja maram maleila nana ashee matā ngasakmana, kala nakhalattawui vang athutla makhuimana. Prohona ameili mathālak eina ungshung khangasak chitharan narao ili kaphaningungmilu.”

³² Chieina Davidna Abigailli hānga, “Aja ili samphang khavai nali chihokharā Israelwui Proho Vare chili soranu!

³³ Ashee tākhangasakwui eina kala ikhalattawui vang athut hāngsangki kajiwui eina pāng khalan khangasaka nalila, kala nawui theithangkhameila sokhami ngasāranu!

³⁴ Kaja nashili kakhanang mami khavai sākhame Israelwui Vare Prohona katheina, kaja nana aja rida marāsamphangsi kaje, akhama ngathor nashi mayarnao akha eina tangda mataimimara.”

³⁵ Chiwui thili preiva̱ china khuikharā chi khuilaga Davidna hānga, “Chingri eina nawui shimli ungulu; nawui tui ina khuisangmihaira, kala nawui kapo mayāmihaira.”

³⁶ Kala Abigailna Nabalwuili ungkashung eina, Nabalna awui shimli awunga thāda morsongsai. Kala mariphaoda ningmahaisor eina leisai. Chiwui vang eina ana kazing mathangranglakha ali khituikha mahāngmana.

³⁷ Kala ngathorshong zamkhamarip mathing kahai eina, apreiva̱na Naballi otsak saikora kahāng eina, a ningthenghaida kathi thāhaowa.

³⁸ Kala tharāthang sha̱khawui thili Prohona Naballi sāthathaowa.

³⁹ Nabal thihaira kaji Davidna kashā eina, ana hānga, “Ili zeikakharuia Naballi athut hāngsangkhame, kala makaphā otsakwui eina ipāng thummi kahaia Proho chili masot chigatli! Nabalwui makaphā chi awuitungli khalatta Prohona tāngasakmihaira.” Chiwui thili Davidna Abigailli apreiva̱ sākhavai akhui ngasaka.

⁴⁰ Kala Davidwui raobing china Carmelli vāda Abigailli ahānga, “Apreiva̱ sākhavai nali akhuilu da Davidna ithumli kachihona.”

⁴¹ Ana ngakarthuida ngaleili ngakhumshāmzangda hānga, “Yanglu, narao iya ishameiwui raobingwui phei pheomiki kaje rao sha̱naona.”

⁴² Kala Abigailna totot shaksākhuilaga, awui sha̱nao phangā thānphunglaga gadhā tongda Davidwui paomebingli shurthuwa; kala apreiva̱ sāhaowa.

⁴³ Davidna Jezreelwui Ahino-amlila khuida, khanini apreiva̱ sathathuihaowa.

⁴⁴ Saulna anao ngalāva̱ Michal, David preiva̱ chi Gallimli khalei Laishwui naomayara Paltili mihaowa.