1 SAMUEL 24 - Kathara Bible (BSI)

Davidna Saulli Masākathat

¹ Saulna Philistinenaobingli kharomvālaga hankhaung eina, “Yanglu, David En-gediwui lamhāngli leida lei” da rāhānga.

² Chieina Saulna Israelwui eina mi thingkathum kapangkhuilaga David kala awui mibingli phavā khavai Sirao Lunghārli vai.

³ Kala ana shongfa ngalemli yaoshim sākahaipamli vākashung tharan, lungkhur akha leisāda chili Saulna zangngasāmkhui. Chitharan David eina awui mibing lungkhur chiwui alung thukmeithui kaji chili pamsai.

⁴ Kala Davidwui mibingna ali hānga, “Prohona, ‘Yanglu, nawui yangkasheli ina nawui pāngli horsangmira kala nana phai kaji chi sāra’ da kahāng chi aja ungshunghaira.” Chieina Davidna ngakarthuida kasainakha Saulwui kachon amarei angahunkhui.

⁵ Kala ana Saulwui kachon angakakkakhui chi phaninglaga David ning chothaowa.

⁶ Davidna awui mibingli “Prohowui thao neomi kahaiya mi chili thatheilaga, ina ishameili ipāng kapar otsak hikathā sākhavai Prohona mamayāmara” da hānga.

⁷ Chiwui vang eina Davidna awui mibingli zakshilāk eina khararda Saulli masāthatpaimara jihaowa. Kala Saulna ngakarthuida lungkhurwui eina awui vāki kajishong thuihaowa.

⁸ Chiwui thili Davidla ngakarthuida lungkhurwui eina shoklaga Saulli, “Awunga, ishāmei” da shok hoi. Kala Saulna kapeikhaung eina Davidna ngakhumshāmda khayākashi chithei.

⁹ Kala Davidna Saulli hānga, “Khisāda nana mibingwui tui nganāda, ‘Yanglu, Davidna nali makaphā sākida lei’ da kahāng chi khuisanghaokhala?

¹⁰ Yanglu, aja zimiksho, namik eina theihaira, lungkhurlungli leilakha Prohona nali iwui pāngli horsangmi; kala kaikhana sāthathaolu da hānga, kha ina nali chihomi kahaina. Ina hānga, ‘Ishameili ipāng maparmara; kaja Prohona ali thao neomi kahaina.’

¹¹ Theilu, ishāvā, nawui kachon khara̱ hi, kaja ina nawui kachonmarei ngakakkhuilaga nali masāthatmana; hi eina nana theira, iwui khalāng lah nali sākashi khikha maleimana kaji theilu. Nana imanglā khuikhavai sālala iva nawuitungli morei masālakmana.

¹² Prohona iniwui ngachaili bichar sāranu, Prohona ili nawui vang athut khuirano; kha ipānga nali makaphā masālakmara.

¹³ Kharar chānjam kahāng thāda, ‘Makhayāwui eina makhayā shoka’; kha ipāng eina nali makaphā masāmara.

¹⁴ Israelwui awungana khipāli phāzatkhala? Kala nana khipāli kharomkazātkhala? Fa kathi phākazatla, jika kachāknao phākazat!

¹⁵ Chiwui vang eina Prohona bichar sāranu, kala iniwui ngachaili tuitak khuimiranu; kala iwui vang phaningmida napāngwui eina kanmiranu.”

¹⁶ Davidna tuibing hi hāngkup kahai eina Saulna hānga, “Hi nawui khonla, inaomayara David?” da panglāk eina chapa.

¹⁷ Kala Davidli hānga, “Ili na ngarongmeikhara; kaja ina nali kalāshi khavai sai, kha nana ili kaphā sāmi.

¹⁸ Kala Prohona aja ili nawui pāngli horsangmilaga nana ili masāthatla kayākha mathada sāmikhala kaji nana hānghaira.

¹⁹ Kaja mi akhana awui yangkasheli samphanglaga thāda chiho kahai khipā leikhala? Nana ili aja sākhami hiwui vang Prohona nali khamathā sāman miranu.

²⁰ Kala yanglu, nana Israelwui awunga sālakra kaji, kala nawui pāngli Israel wungram reisangra kaji ina theihaira.

²¹ Chiwui vang eina iwui ara̱-azāli makatatmara, kala ishi shimkhurwui eina iwui ming makatatmara da Prohowui mingli shākhi sālu.”

²² Kala Saulwui kahāng thāda Davidna shākhi sai. Chiwui thili Saulna shimli unghaowa; kha David eina awui mibingna raipanshong vāhaowa.