1 SAMUEL 21 - Kathara Bible (BSI)

Davidna Saulwui eina Khayām

¹ Chiwui thili Davidna Nobli, pāngmon Ahimelechwuili vai, kala Ahimelechna kathirriri Davidli angarokta hānga, “Khipākha mangasola namāng kharā kachiwui vangkhala?”

² Chieina Davidna pāngmon Ahimelechli, “Awungana ili ot akhawui vang kachihona, kala ‘Ina kachihowui pongli kala khiwui vang kachihokhala kajila khipālikha matheingasaklu’ da hāngkahaina. Yaronnaobingli ngasoda apam akhali ot chi sāki kaji leili, da hānga.

³ Napāngli khi leimameilikhala? Ili khamuitang phangā khamilu, maningkha khalalei chi milu.”

⁴ Chieina pāngmon china Davidli ngahānkai, “Khangachā khamui iwuili maleimana, kha kathara khamui leili; kalikhada nawui yaronnaobingna sha̱naobingli phasā mangarumsaakha shaipaira.”

⁵ Kala Davidna pāngmon chili ngahānkai, “Kachangkhatta ina rai khavā tharan ithumwui eina sha̱naobing ngateithui ngasakchinga; khangachā shongzatlila yaronnaobingwui khorkhong thara, chithākha ajawui atamli kayākha tharmataimeirakhala?” da hānga.

⁶ Chieina pāngmon china kathara khamui chi ali khuimi; kaja Ngasokhamiwui khamui maningla katei maleisāthuwa, chi Prohowui mangāli kakhuina. Khuithuithang zimiksho lumturtur kahai khamui eina shinki kajina.

⁷ (Chithang, apam chili Saulwui seikahoma akhavā; Doeg kaho Edomwui mi, tharmathengkhui khavai leisai.)

⁸ Kala Davidna Ahimelechli hānga, “Nawui pāngli kazeilala raighailala makhaleikhala? Kaja awungawui vang kathaka ot leihaoda iwui kazeila raighaila I makhuiphāthuwa.”

⁹ Chieina pāngmon china hānga, “Elahwui tampākli nana shaokathata Philistinepa Goliathwui raighai chi leili; kachon eina romlaga ephodwui akhanukshong haidalei; nana khuiga jiakha chi khuilu, khangatei maleimana.” Chieina Davidna “Chili phākhamei maleimana; khuirālu” da hānga.

¹⁰ Kala chithang Davidna Saulwui eina yāmlaga Gathwui awunga Achishwuili vai.

¹¹ Kala Achishwui raobingna ali hānga, “Hi David, ngalei hiwui awunga chi maningmala? Laa kala pheichak sālaga, ‘Saulna thingkhali sāthata, kala Davidna thingtharāli sāthata, da athumna kaphok maningmala?’ ”

¹² Chieina Davidna chi shālaga ningli shak jihaoda Gathwui awunga Achishli ngacheelakhaowa.

¹³ Chieina ana awui acham ngateihang eina sālaga athumwui mangāli pārekhaowa, kala ngaveiwui khāmonglila yekkazamsanga, amorhālila machora̱ longkharareida zata.

¹⁴ Chieina Achishna awui raobingli hānga, “Yanglu! mi hi kapāna, khisāda nathumna ali hili khuirākhala?

¹⁵ Iwuili kapā teona leihaoda nathumna ngashan sanganao khavai ali iwuili khuikharāla? Hikatha mi iwui shimli rāpairala?”