1 SAMUEL 20 - Kathara Bible (BSI)

Jonathanna Davidli Khangachon

¹ Chieina Davidna Ramahli khalei Naiothwui eina yāmlaga Jonathanli ungngahāna, “Ina khi sāhaokhala? Iwui khi khayon lei? Kala navāwui mangāli khi morei sahaoda ili sāthat khavai khangarānkhala?”

² Kala ana ali hānga, “Khikha maleilakmana! Na mathilakmara. Yanglu, ishāvāna ili mahāngla kateola lah khareila masāmana; kala ishāvāna khiwui vang hi ili ngathumrakhala? Chi mamashungmana.”

³ Kha Davidna ngahānkai, “Nana ili leikashi navāna mathālak eina thei; chiwui vang eina, ‘Na wukkhananghaipaishina’ da makahāngra. Kha Prohowui ming singda kahāngna kala nanala katheina kaja, I kathiwui eina pheikārkhamaya.”

⁴ Chieina Jonathanna Davidli hānga, “Nana kahahāng chi ina sāra.”

⁵ Davidna Jonathanli hānga, “Yanglu, akhama changwokna, kala ina mashoila awungali tableli phazāngarumki kaji zimikshona; kha kakathumathang ngazin eina tangda luili ayāmngathum khavai ili khamayāmilu.

⁶ Kalikhada navāna ili phaakha ‘Davidna aram keinung Bethlehemli ungkhavai ili saklak eina pohaowa; kaja shimkhur saikorawui kumkumwui pha̱kaphayā leihaowa’ da hāngmilu.

⁷ Laga ana ‘Phai!’ jiakha narao iwui vang phāhaira, kha kalikhada ana malungvāthaiakha, theilu kaja ana makaphā ngarānhaira.

⁸ Chiwui vang naraoli lumashanda phaningmilu, kaja narao iniwui khathara tuingashit makaikapai sāhaira. Kha iwui khayon leiakha ili nakhalattana sāthathaolu, kaja khiwui vang navāwui pāngli ili nana horsangmisānikhala?”

⁹ Kha Jonathanna hānga, “Maninglakmana! Kalikhada ishāvāna nawuitungli makaphā sākhavai khangarān ina theisi kaja, ina nali mahāngmarala?”

¹⁰ Chieina Davidna Jonathanli hānga, “Kalikhada navāna nali thurda ngahānkākha ili khipāna hāngmira?”

¹¹ Kala Jonathanna Davidli hānga, “Ralu, ini luishong vāusa.” Chieina anina luishong vai.

¹² Kala Jonathanna Davidli hānga, “Israelwui Vare Prohona theiranu! Akhama hitharan, maningkha kakathumathang yanglu, ina ishāvāli kharakyanglaga ana nali kaphā sangaisakha, ina nali marāhāngmarala?

¹³ Kala nali ishāvāna makaphā sākida leisāda ina kalikhada nali yāmkhavai marāhāngakha, Jonathan, ili Prohona theiranu. Ishāvāli Prohona ngasokhami thāda nalila ngasomiranu.

¹⁴ Kalikhada I mathila ringsaakha, okpei khavai Prohowui khangavap leikashi chi ili kachitheimilu;

¹⁵ kala nawui ningkatong leikashi chi iwui shimkhurwui eina makatathaialu, Prohona Davidwui yangkashe okathuili khalei saikorali katathaisa-jilala,

¹⁶ Jonathanwui ming Davidwui shimkhur eina makatatmihairanu. Kala Davidwui yangkashebingli Prohona athut khuimiranu.”

¹⁷ Kala Jonathanna akhalatta leikashi thāda Davidli leishihaoda; Davidli awui leikashi chi eina khangashit sāngasaka.

¹⁸ Chiwui thili Jonathanna hānga, “Akhama chāngwokna; na maraakha nawui pam masaihaora.

¹⁹ Kala kakathumathangla na makharā thatheihaora, chieina lungkhor ngalem lākhavāk, khare kachāng nana leikasā lungkhorpam chili ayām ngathumhaolu.

²⁰ Kala chiwui ngalemli ina pānkatam thāda malā kāpta kathum shira.

²¹ Kala yanglu, ina yaronnao chili, ‘Malāthingbing chi aphākhuilu’ da hāngra. Kala ina ali, ‘Yanglu, malāthingbing chi nawui hishong lei, chibing chi khuilu’ jiakha shoklu, kaja Prohowui ming singda kahāngna, nali kalāshi khavai maleimana; khikha mathāmara.

²² Kha ina yaronnao chili, ‘Yanglu, malāthingbing chi nali vāmeida lei’ jiakha zatulu; kaja nali Prohona chihokhamina da theilu.

²³ Kha inina ngazek kahai hiwui pongle yanglu, iniwui ngachaili Prohona theimichingra.”

²⁴ Chiwui vang Davidna luili yāmngathumhaowa; kala chāngwokthang awungana phazā khavai pama.

²⁵ Awungana khangachā thāda awui pam phākhoshong pama; Jonathanna kāroda pama, kala Abnerna Saulwui ngalemli pama, kha Davidwui pam masaihaowa.

²⁶ Chithālala chithang Saulna khikha mahānglakmana, kaja “Khikha shokhao-aili, khangarang kathā leihao-aili” da phaninga.

²⁷ Kha akhama kathā, chāngwok kakhanethangla Davidwui pam masailuihaowa. Chieina Saulna anaomayara Jonathanli, “Kachiwui vang eina Jessewui naomayara David phakazāli ayāla ajala makharākhala?” da ngahāna.

²⁸ Jonathanna Saulli ngahānkai, “Davidna Bethlehemli ungkhavai ili saklak eina chihomilu da poi,

²⁹ ana hānga, ‘Ili kazatngasakmilu; kaja iram keinungli ishi shimkhurwui pha̱kaphayā ot kasāli ili ungzanglu da ishāmeina kasohaida lei. Chieina nana mayāmiakha ichināngarāli khaungyangga’ da hānga. Hiwui vang eina a phakazāli makharāna.”

³⁰ Chieina Saulna Jonathanli malungvāthaida ali hānga, “Makhamashungva̱, ngakaikashe sha̱naowui nao na, nakhalatta maishi khavai, kala navāli khayāmalā khavai Jessewui naoli kapangkakhuina kaji ina matheimara da kaphaningla?

³¹ Jessewui nao okathuili ringlakha eina tangda, nala nawui wungramla reikasang mavaimara. Chiwui vang ali aphākhuimilu, ali sāthatphalungra.”

³² Chieina Jonathana avāva̱ Saulli ngahānkai, “Khiwui vang ali sāthatrakhala? Ana khi sāhaokhala?”

³³ Kha Saulna alila sāthat khavai kazei eina phara. Chieina Jonathana chi theilaga, avāva̱na Davidli sāthatphalungra kaji theikhui.

³⁴ Chieina Jonathana malungvātlak eina tablewui eina ngakarthuida kachāng chiwui kakhanethang maphazāthuwa, kaja avāva̱na Davidli maishi khangasakwui vang awui ning chotlakhaowa.

³⁵ Ngathorshong Jonathanna naoshinao akha thānphunglaga David aniwui ngashit kahaipam chili vai.

³⁶ Kala ana naoshinao chili hānga, “Ina kapvā kahai malāthing chi yongvāda aphākhuilu.” Nao china yongkhavā eina, khangatei akha ali kānda kapvālui.

³⁷ Kala Jonathana kāpvā kahaipamli nao china vākashung eina, Jonathanna, “Malāthing chi nawui chili kānvada khalei maningmala?” da nao chili vaovai.

³⁸ Kala Jonathana ali hithāda hānga, “Thakha chili mapamalu, thākta unglu.” Chieina naoshinaopā china totot khuilaga akhavāwuili unghaowa.

³⁹ Kha nao china khikha matheimana; Jonathan eina David māngna katheina.

⁴⁰ Kala Jonathana awui khutlaibing chi naoshinao chili milaga hānga, “Shimli khuiunghaolu.”

⁴¹ Kala nao chi unghaikhaleoda, Davidna lungkhor ngalemwui eina shoklaga ngakhumshāmda kathumshi, kala ani akha eina akha maya̱khui ngaroka, kala David mavānranglakha eina tangda chapngaruma.

⁴² Chiwui thili Jonathanna Davidli hānga, “Chingri eina thulu; Prohowui mingli inina ngashit ngarok kahai chiyākha chi ‘Iniwui ngachaili, kala iniwui ara̱-azāwui ngachaili Prohona nganingmira’ kaji chi mashimānda leichingra.” Davidna thuihaowa, kala Jonathanna shimshong unghaowa.