1 SAMUEL 17 - Kathara Bible (BSI)

Davidna Goliathli Shaokathat

¹ Chitharan Philistinenaobingna rai sākhavai raimi kazipa; kala Judahwui ngalei Socohli kazipa, kala Ephes-dammimli khalei Socoh eina Azekahwui ngachaili rairui sai.

² Saul kala Israelwui mibingla kazipkhui, kala Elahwui tampākli rairui sai, kala Philistinenaobingli ngarar khavai sai.

³ Philistinenaobingna kaphung akhali nganinga, kala Israelnaobingna akhapali nganinga, angachaili tampāk akha lei.

⁴ Philistinewui ngachaili kapanga mi akha, Gathwui Goliath kaho, awui akho feet chiko laga pāngmayā parkha kajui mi akha zangsai.

⁵ Awui kuili pithraiwui kuihon ngahona, kala khaihor kathā pithrai phahon ngavai, kala phahon chiwui kharit kg. hangphangāda shini sha̱khana.

⁶ Pithraiwui pheimakhei sanga, kala pithraiwui zeisa̱nao akha yartuili parphunga.

⁷ Kala awui zeipa̱ kapem rikhaya, kala awui zeivar chi kg. shini sha̱kha rita; kala awui chāngvei phungmena awui mangāli zata.

⁸ Ana nganingda Israelwui raimibingli vaowa, “Raiwui ngarar khavai pareng sahailaga chili khi sāpamli? I Philistinenao maningmala, kala nathum Saulwui rao maningmala? Nathumwui ngachai eina mi akha kapangkhuilu, laga ili tāngarokranu.

⁹ Ana ili ngararshapta sathathaiakha ithum nathumwui rao sāra; kha ina yuihaida ali sathathaiakha nathum ithumwui rao sāda ithumli otram ngatha̱ra.”

¹⁰ Kala Philistinepa china hānga, “Aja ina Israelwui raimibingli kakasir hina; nathumwui mi akha ili chihozanglu, chithāda ini ngararra.”

¹¹ Saul kala Israelnao saikorala tui chi kashā tharan ning suitāhaowa kala ngacheeshunhaowa.

¹² Chitharan David hi Judahwui Bethlehemli khalei Ephrath shimkhurwui Jesse kaho naomayarnao chishat leikasapawui naona. Saulwui atamli ava rarlakhairasai.

¹³ Jessewui nao khararra kathumva Saulwui thi shurda rai vāhairasai; athumwui aming, naochizaili Eliab, kakhaneli Abinadab, kala kakathumali Shammah hoi.

¹⁴ Davidna nao paishona; khararra kathumna Saulwui thi shurthuihaowa,

¹⁵ kha Davidva Bethlehemli avāva̱wui yao homda Saulwuili ungkhashi vākhashi da sai.

¹⁶ Zimiksho hangmatithangwui vang Philistinepa china ngathor ngazin rākasirchinga.

¹⁷ Kala Jessena anaomayara Davidli hānga, “Nameingarāwui vang māngatai shungkha, kala khamui tang tharā hi rāmrahli thākta khuivāmihaolu;

¹⁸ kala seina̱ makhan atang tharā hila thingkhawui akhavāli khuivāmilu. Namei ngara kathamameida leilikhala ayanglu, kala athumwui eina machut akha khuiunglu.”

¹⁹ Chitharan Saulla kala Israelwui mi saikorala Elah tampākli pamda Philistinenaobingli rai ngararsai.

²⁰ Davidna ngathorthak thuilaga yaobing chi yao khamayonawui pāngli haimihailaga, avāva̱na kakaso athishurda kashakazā chi khuiphungda khavā eina, raimibing rai sākhavaipamli ngavaorei vāmahungsai.

²¹ Kala Israelnaobing eina Philistinenaobing raimi eina raimi ngaherlaga rai ngarar khavai yangngasunga.

²² Kala Davidna awui ot chi khamayonawui pāngli haimihailaga raimiwui alungli achinā ngarāli asamphanga.

²³ Achinā ngarāli chan ngazekta leilakha, yanglu! Gathwui kapanga Goliath kaho chi Philistinebingwui eina shoklaga kharewui thāda ana shokkasira. Davidna awui kahāng chi shai.

²⁴ Israelwui mi saikorana ali theilaga, awui ngalem eina yāmhaowa, kala athum ngacheekhailakhaowa.

²⁵ Kala Israelwui mibingna hānga, “Shokkhanganinga mi hili na theihairala? Ana Israelwui mibingli kasir khavai kakālaka; kala ali sākathata mi chili awungana sinā lupā kachungkha mida shāng ngasakra, kala anao ngalāva̱la mira; kala ashi shimkhurli Israelwui alungli ningkhān ngasakra jihaira.”

²⁶ Awui ngalemli khanganingbing chili Davidna hānga, “Israelwui eina maikashi khuithuimiki kaji Philistinepa hili sākathata chili khi sāmira jikhala? Kaja kharinga Varewui raimili kakasira ahui marimkashoka Philistinepa hi khini jikhala?”

²⁷ Kala mibingna “Ali sākathata chili hāngkahai chithāda samiranu” da ngaraikacha tui chi hāngsera.

²⁸ Mibingli Davidna khangazek chi ashi khararra Eliabna shālaga malungvātlakhaida Davidli hānga, “Hili khi tāsā kajikhala? Yao kateokha khalei chi lamhāngli khipāli haimihailikhala? Nawui ning chukmaja̱phāphā kaji, kala nawui wuklung makaphā ina thei; kaja na rai khangarar yangkida katāna.”

²⁹ Chieina Davidna hānga, “Ina khi saluihaokhala? Khangahān māngla mangahānpai kajila?”

³⁰ Kala awui eina ngareithuihaida khangateili chi tākam eina angahānlui kaji eina athumla kharewui thāda hāngserpapama.

³¹ Davidna kahāng tui chi kashā chitharan, athumna Saulli ahānga, kala ana Davidli ahokhui ngasaka.

³² Kala Davidna Saulli hānga, “Awui vang eina mi khipākhawui ning masuitaaranu; naraona Philistinepa chili angararra.”

³³ Kala Saulna Davidli hānga, “Na ali mangasungrarmara; kaja nava nganuilak eina lei, ava nganuilakha eina thuida raili kazata mina.”

³⁴ Kha Davidna Saulli hānga, “Naraona avāva̱wui yao homa; kala kazingkha̱ lah singomna yaoshangwui yaonao rākatuk tharan,

³⁵ ina athi shurvālaga akhamorwui eina angapaikhui; kala ili makeikida saakha ina morhāli yonkhuilaga shaothata.

³⁶ Narao kazingkha̱la, singomla sāthatthathuihaira, kala kharinga Varewui raimili kakasira ahui marimkashoka Philistinepa hila chithāda thira.”

³⁷ Chieina Davidna hānglui, “Kazingkha̱ kala singomwui pāngmayā eina kankhame Proho china, Philistinepa hiwui pāng eina kanmira.” Chieina Saulna Davidli, “Vālu, kala Prohona nali ngasomiranu” da hānga.

³⁸ Chieina Saulna Davidli awui sāri shaksāmi; pithraiwui kuihon akuili ngahonmi, kala khaihor kathā kachon ngavaimi.

³⁹ Kala Davidna raisāri tungli raighai ngaveikhui, kha masangkasaithuda, mazatthukthuwa. Chieina Davidna Saulli, “I hieina ngasoda mazatrarmara; kaja I hikathā masangkasaimana” da hānglaga raishokhaowa.

⁴⁰ Chieina ana awui khāmshui apāngli singkhui, kala kongrānaowui eina lunghailānao phangā hākhuilaga awui yaohomkhaoli sanghai, awui shairong apāngli singphunglaga Philistinewui mi chili vanganaiuwa.

Davidna Goliathli Khayui

⁴¹ Kala Philistinepa china, awui chāngvei phungkhamena mangā zatta Davidli vanganaiuwa.

⁴² Philistinepa china Davidli theilaga, machāpmilakthuwa; kaja Davidva, mainao hungping eina azak mathālak kahai naoshinao akhana.

⁴³ Kala Philistinepa china Davidli hānga, “I fala, chiwui vang khāmshui singlaga kharāla?” Kala awui varebingli mingzailaga Davidli khonshi.

⁴⁴ Philistinepa china Davidli hānga, “Iwuili rālu, ina naphasā yongkazat vānaoli kala ramsāli chishaira.”

⁴⁵ Chieina Davidna Philistinepa chili hānga, “Nana raighai kazei kala zeisa̱nao singlaga rai, kha iva nana kakasira saikorawui Proho, kala Israelwui Varewui ming singda kharāna.

⁴⁶ Prohona aja nali iwui pāngli horsangmida ina nali ngaphitsangra, kala nakui rangra; kala aja Philistinewui raimi ashangva̱wui angun yongkazata vānao kala ramsāli chishaida, Israellungli Vare lei kaji okathuili khalei saikorana theira,

⁴⁷ kala hili kazipta khaleibingna, Prohona raighai eina kala kazei eina kankhami maningmana, kaji theikhuira; kaja hi Prohowui raina, ana nathumli ithumwui pāngli horsangmira.”

⁴⁸ Philistinepa china ngakarthuida Davidli nganaimamān kaji eina, Davidna totot ngarar khavaipamli angaroka.

⁴⁹ Kala Davidna awui khaoli pāng khamāsangda chiwui eina lunghaila akha khuishokta shairong chieina kakāp eina Philistinepa chiwui khaveili atheira̱ chi ngaphumhaowa, kala a ngakhumshām eina ngaleili pisanghaowa.

⁵⁰ Chithāda Philistinepa chili Davidna shairong kala lunghailānao akha eina yuihaowa; David raighaila makhuiphungmana.

⁵¹ Chieina Davidna yongvālaga Philistinepa chiwuitungli kānganingda awui raighai sutkhui; kala chieina akui rangkhui. Philistinenaobingna athumwui raikapinga thikahai chi kathei eina athum yāmserhaowa.

⁵² Kala Israel eina Judahwui mibingna athumli Gath vāshungda, kala Ekronwui ngavei vāshungda kharomvai; kala Sha-araim eina thuida Gath kala Ekron vāshungda kharomvāda Philistinenaobing kachungkha sāthathaowa.

⁵³ Kala Israelnaobingna kakharomwui eina latungda Philistinenaobingwui thongthāng ungngapona.

⁵⁴ Kala Davidna Philistinepawui kui Jerusalemli khuiunga, kha ana awui raisāri awui kachonshimli haihaowa.

⁵⁵ Davidna Philistineli ngararkida khavā chitharan, Saulna ali theida awui raimi akhavā Abnerli hānga, “Abner, naoshinaopā hi khipāshinaokhala?” Abnerna, “Kathākhala, I matheimana” da hānga,

⁵⁶ Kala awungana hānga, “Naoshinaopā hi khipashinaokhala da ngathingkhuilu.”

⁵⁷ Kala Davidna Philistinepali sāthathailaga hankhaung eina, Abnerna ali hokhuida, Philistinepawui kui chi chichanglaga awungawuili thānvai.

⁵⁸ Kala Saulna, “Yaronnao, na khipashinao mayarakhala?” da ngahāna. Kala Davidna, “Bethlehemli khalei narao Jessewui naomayarana” da ngahānkai.