1 SAMUEL 13 - Kathara Bible (BSI)

Philistinenaobingli Rai Kasā

¹ Saulna mungkaphok atamli a zingkum…li zatsai, kala ana kum khani…Israelli munga.

² Saulna Israelwui mi thingkathum kapangkhui; mi thingkhani ali ngasoda Bethel kaphungram kala Michmashli pama, kala thingkhana Jonathanli ngasoda Benjaminwui Gibe-ahli pama, kateibing chiya kachichashiwui rāmrahli chihounghaowa.

³ Jonathanna Gebali khalei Philistinewui raimi pamkhavai apam chi yuihaowa; kala chi Philistinenaobingna shāhaowa. Kala Saulna, “Hebrewnaobingli shāranu” da talla̱ khonga.

⁴ Kala Philistinewui shipaibingli Saulna maikashi mihaira kaji Israelnaobingna kashā tharan, kala Israelnaobingli Philistinenaobingna ningkachaihaira kaji kashā tharan, mi saikorali Gilgalli Saulli ngarum khavai ngahota.

⁵ Kala Philistinenaobingna Israelli ngarar khavai siguigari thingthumra, sigui katonga raimi thingtharuk, kala raimi shamadruwui situiyakha kazipkhui; kala Beth-avanwui zingshoshong Michmashli rairum asai.

⁶ Israelwui mibingna athumwui kasak chi theilaga (kaja mibing chili panglāk eina ngasunghaowa), mibingna akhur-akhaili, lungkhurli, lunghārpamli kala chikhurpamli, tara̱ ngarung khavaili;

⁷ lah Jordan makān khavai kānda Gilead eina Gad ngaleili yāmvāda ngathumthuihaowa. Saulva Gilgalli pamsai, kala ali khangasobing kathirririhaowa.

⁸ Samuelna retmi kahai atam athishurda Saulna shinithang ngarai; kha Samuel Gilgalli matāthuwa; kala mibingla yāmmamānhaowa.

⁹ Chieina Saulna, “Rikkatā kachigat eina ningyatchigat chi ili khuirālu” da hānga. Kala ana rikkatā kachigat chi chigata.

¹⁰ Ana rikkatā kachigat chi kupkhaleoda, yanglu, Samuel rārāsai; kala Saulna ali samphang khavai shokngarokta shālam sai.

¹¹ “Nana khi sāhaokhala?” da Samuelna ngahāna. Kala Saulna hānga, “Mibingna iwui eina yāmmamān kahai chi ina kathei eina, kala retmi kahai zimiksho athishurda nala marāthu, kala Philistinenaobingla Michmashli rākaziphaoda,

¹² Ina hānga, ‘Ara Philistinenaobingna Gilgalli iwuitungli rārotrali, Prohowui ningkachāng ina mapokhuiranga’ jihaoda I khalatta rikkatā kachigat chi namda chigat kahaina.”

¹³ Chieina Samuelna Saulli hānga, “Nana mangma̱lak eina sāhaira; nali kaso kahai athishurda nawui Proho Varewui ningkhami nana mamayonthura; achāva, Prohona nawui wungram Israelwuitungli mashimānla sākāhairara.

¹⁴ Kha ara nawui wungram maleiluimara; Prohona awui ningkachāng mi akha pākhuihaira; awui mibingwuitungli wungnao sākhavai kapangkhuihaira; khikhalajila Prohowui kakaso nana mashurthuwa.”

¹⁵ Kala Samuelna ngakarthuida Gilgalwui eina Benjaminwui Gibe-ahli vāhaowa. Kala Saulna awui mi shānyanglaga athum shātharuk sha̱kha leisai.

¹⁶ Saulla naomayara Jonathanla, kala anili ngasokasābing chila Benjaminwui Gebali pamhaowa; kha Philistianaobinga Michmashli rairum sāpama.

¹⁷ Kala Philistinenaobingwui eina, ngarar khavai khum kathum shoka; khumkhana Shual ngaleiwui Ophrahshong,

¹⁸ khangatei khumna Beth-horonshong, kala khangatei khum akhapāna lamhāngshong Zeboim tampākli ngashāntap kazanga kaphungrenshong vai.

¹⁹ Chitharan Israel ngalei vāpeida mari kasā maleisāmana; kaja Philistinenaobingna hānga, “Hebrewnaobingna athum khalattawui vang kazei, lah raighai sākhuihaipaishina”;

²⁰ kha Israelwui mi kachiva̱na kārphāng, yorpak, ngahā, kala chāngkui kathā kharākhui khavai Philistinenaobingwuili asakhui;

²¹ kala kārphāng, yorpak katha kakharāman lupāsā shekel khumkathum wuili akhum khani; kala ngahā, kala seihomthing kharākhamili lupāsā shekel khum kathumwuili akhum akha khuisai.

²² Chieina rai sāthang Saul eina anaomayara Jonathan maningla, anili khangasobing khipākha raighaila, kazeila masingsamana.

²³ Kala Michmashwui makānkhavaili Philistinewui raimibingna nganingphinhaowa.